Tai Dam Nả ꞌviạk ꞌchí ꞌchọ pên ók 3

Tẻm sư pay ha ꞌsúm ꞌhốm Chảu ꞌGiê‑ꞌsu dú ꞌmướng ꞌSa‑đê

1 Chảu ꞌGiê‑ꞌsu bók khỏi tẻm sư pay ha phủ pên ꞌlam ꞌchạư tang nả ꞌsúm ꞌhốm dú nẳng ꞌmướng ꞌSa‑đê, “ꞌTan phủ ꞌmí chết khuôn Chảu Pua ꞌPhạ cắp chết đuông đao ꞌnặn ꞌvạu#ꞌva: ꞌHáu ꞌhụ chắc ꞌviạk chảu ꞌdệt ꞌmá#ꞌnặn, chảu ꞌhiạk#ꞌva ꞌnhắng ꞌchua ꞌlới#dú, hák#ꞌva ꞌtẹ báu#ꞌmí ꞌchua ꞌlới cá#đaư. 2 ꞌHụ ꞌmưa ók#ꞌnớ, ꞌtợp ꞌhéng ꞌnéo đi ꞌnhắng ꞌmí#ꞌnặn, báu#ꞌcọ ꞌchí tai#mết. ꞌHáu hên nả ꞌviạk chảu ꞌdệt ꞌnặn báu#đi tó Chảu Pua ꞌPhạ Chảu Chom#ꞌháu. 3 ꞌSướng ꞌnặn lo ngắm ꞌhọt ꞌquám bók son chảu ép ꞌhụ đảy ꞌnghín ꞌnặn ꞌlẹo piến chaư ꞌdệt#ꞌtoi. ꞌVa chảu hák báu#ꞌhụ ꞌmưa ꞌdệt ꞌtoi ꞌquám bók son#ꞌnặn, ꞌháu ꞌchí ꞌmá ꞌchớ chảu báu#ꞌhụ ꞌsướng ꞌcốn#ꞌlặc. 4 Hák#ꞌva dú nẳng ꞌmướng ꞌSa‑đê chảu ꞌnặn ꞌnhắng ꞌmí kỉ ꞌcốn kin dú ꞌtáng đi ꞌmí#ꞌmen. Sau sôm đáng pên ꞌcốn ꞌpẹk saư pay ꞌhuôm cắp#ꞌháu. 5 Phủ đaư ꞌpẹ báu#ꞌtoi ꞌtáng#ꞌmựt ꞌcọ ꞌchí đảy pên ꞌcốn ꞌpẹk saư ꞌsướng#ꞌnặn. ꞌHáu ꞌchí báu#ꞌlựp ꞌchư phủ ꞌnặn ók sia nẳng ꞌpặp sổ ꞌchư ꞌcốn ꞌmí ꞌchua ꞌlới#ꞌlới cá#đaư. ꞌHáu ꞌchí nhẳn ꞌhụ phủ ꞌnặn tó nả Chảu Pua ꞌPhạ phủ pên ꞌPo ꞌháu ꞌtếng#cá tiên ꞌchạư ꞌTan#chảu. 6 ꞌPứng ꞌquám Chảu Khuôn Saư bók chết ꞌsúm ꞌhốm#ꞌnị, phủ đaư ꞌmí chaư#ꞌphắng, lỏ#hảư ꞌphắng#au.”

Tẻm sư pay ha ꞌsúm ꞌhốm Chảu ꞌGiê‑ꞌsu dú ꞌmướng ꞌPhi‑ꞌla‑đên‑ꞌphia

7 Chảu ꞌGiê‑ꞌsu bók khỏi tẻm sư pay ha phủ pên ꞌlam ꞌchạư tang nả ꞌsúm ꞌhốm dú nẳng ꞌmướng ꞌPhi‑ꞌla‑đên‑ꞌphia, “ꞌHáu ꞌnị hák pên phủ ꞌpẹk#saư, ꞌvạu ꞌquám ꞌmen#ꞌtẹ. ꞌHáu ꞌmí phép khắm kho khoá ꞌhướn pua Đa‑ꞌvịt, khay ók báu#ꞌmí phaư hắp#đảy, hắp sia báu#ꞌmí phaư khay#đảy. 8 ꞌHáu ꞌhụ chắc ꞌviạk đi chảu ꞌdệt ꞌmá#ꞌnặn. ꞌẶn#ꞌnế, ꞌháu khay tu ꞌvạy hảư chảu#ꞌlẹo, báu#ꞌmí phaư ꞌchí hắp#đảy. ꞌChăm#ꞌva chảu ón#ꞌsém, hák#ꞌva ꞌnhắng ꞌphắng ꞌquám ꞌlẹo báu#thiêng sia#ꞌháu. 9 ꞌSướng ꞌnặn ꞌsúm ꞌhốm phủ ảng ꞌva sau ꞌhiạk pên ꞌcốn#ꞌDiu, ꞌmen ꞌtẹ sau ꞌvạu#bẻo, sau pên mốt phái phi ꞌSa‑tan#thôi. ꞌHáu ꞌchí khốm ꞌsúm sau ꞌmá múp ꞌlống ꞌlạy tin ꞌpứng#chảu, sau chắng ꞌchí nhẳn ꞌhụ#ꞌva, ꞌháu đảy ꞌhặc ꞌpứng#chảu. 10 ꞌHáu bók hảư cứ chaư#mẳn, chảu ꞌcọ ꞌphắng#ꞌquám. ꞌSướng ꞌnặn ꞌháu ꞌchí pảy pốc au chảu khói sia ꞌchớ khổ khốn ꞌchí hên ók ꞌtua phén đin ꞌmướng#ꞌlum, ꞌpưa thử chaư ꞌcốn ꞌtếng#cá dú nẳng ꞌtếng#đin.

11 ꞌHáu ꞌchí ꞌmá ꞌhọt#ꞌvắn, chắng ꞌcoi cứ chaư mẳn ꞌluống ꞌtáng kin dú ꞌnéo chảu#ꞌmí, ꞌnhá hảư phaư ꞌmá ꞌchính au ꞌnéo sưởng khong chảu#pay. 12 Phủ đaư ꞌpẹ báu#ꞌtoi ꞌtáng#ꞌmựt, ꞌháu ꞌchí tẳng phủ ꞌnặn pên ꞌsướng sau ꞌhẹk ꞌhướn vảy ꞌsớ Chảu Pua ꞌPhạ Chảu Chom#ꞌháu, ꞌlẹo phủ ꞌnặn ꞌchí báu#ók sia sắc#ꞌtưa. ꞌHáu ꞌchí au ꞌchư siêng Chảu Pua ꞌPhạ Chảu Chom ꞌháu ꞌtếng#cá ꞌchư siêng ꞌmướng ꞌTan chảu khék#ꞌva ꞌmướng ꞌGiê‑ꞌlu‑ꞌsa‑ꞌlêm máư, ꞌmá mai sáư phủ ꞌnặn#ꞌvạy, ꞌmướng ꞌGiê‑ꞌlu‑ꞌsa‑ꞌlêm máư ꞌnặn ꞌchí ꞌlống ꞌmá cá ꞌmướng ꞌphạ nẳng Chảu Pua ꞌPhạ Chảu Chom#ꞌháu. ꞌLẹo ꞌháu ꞌchí au ꞌchư máư ꞌháu ꞌmá mai sáư phủ ꞌnặn#ꞌvạy.

13 ꞌPứng ꞌquám Chảu Khuôn Saư bók chết ꞌsúm ꞌhốm#ꞌnị, phủ đaư ꞌmí chaư#ꞌphắng, lỏ#hảư ꞌphắng#au.”

Tẻm sư pay ha ꞌsúm ꞌhốm Chảu ꞌGiê‑ꞌsu dú ꞌmướng ꞌLao‑đi‑kia

14 Chảu ꞌGiê‑ꞌsu bók khỏi tẻm sư pay ha phủ pên ꞌlam ꞌchạư tang nả ꞌsúm ꞌhốm dú nẳng ꞌmướng ꞌLao‑đi‑kia, “ꞌTan phủ khék ꞌchư ꞌA‑ꞌmen, pên chứng ꞌtoi ꞌquám ꞌmen ꞌtẹ ꞌnặm saư chaư#ꞌsư, pên phủ cốc téng đa ꞌchu ꞌnéo Chảu Pua ꞌPhạ đảy sảng téng khửn ꞌnặn ꞌvạu#ꞌva: 15 ꞌHáu ꞌhụ chắc ꞌviạk chảu ꞌdệt ꞌmá#ꞌnặn, chảu báu#dên ꞌcọ báu#ꞌhọn. ꞌHáu pháư hảư chảu dên ꞌhứ ꞌva#ꞌhọn. 16 Hák#ꞌva chảu ꞌpó ún ún#thôi, báu#dên ꞌcọ báu#ꞌhọn. ꞌSướng ꞌnặn ꞌháu ꞌchí ꞌcái chảu ók sia sốp#ꞌháu. 17 Chảu ꞌva ꞌhăng#ꞌmí, pên đi#ꞌlẹo, báu ꞌcợn#săng, hák báu#ꞌhụ chắc chảu pên ꞌcốn khổ#khốn, ín đu#ꞌmo, ꞌcặt#ꞌcúng, ta#bót, pươi ꞌmo#dú. 18 Pên ꞌsướng ꞌnặn ꞌháu chắng bók hảư chảu ꞌsự au ꞌcắm khong ꞌháu pên ꞌcắm ꞌtẹ ꞌpưa hảư chảu ꞌhăng#ꞌmí. ꞌLẹo ꞌcọ ꞌsự au ꞌchương ꞌnung ꞌpẹk saư ꞌmá pảy ꞌmo dú pươi báu#hảư nả#ꞌhại, ꞌsự da sáư ta chảu ꞌpưa hảư hên#ꞌhung.

19 ꞌHáu ꞌhặc phủ đaư ꞌcọ tít tơn bók son phủ#ꞌnặn. ꞌSướng ꞌnặn hảư ꞌhọn ꞌkhớng piến chaư ꞌváng sia ꞌluống ꞌtáng báp#ꞌsội. 20 Bớng#ꞌí, ꞌháu dú ꞌtáng ꞌnọk tói#tu. ꞌVa phủ đaư đảy ꞌnghín sương ꞌháu ꞌlẹo khay tu#hảư, ꞌháu ꞌchí khảu pay ha phủ#ꞌnặn, ꞌlẹo ꞌchí đảy kin khảu ꞌhuôm ꞌpán#căn. 21 Phủ đaư ꞌpẹ báu#ꞌtoi ꞌtáng#ꞌmựt, ꞌháu ꞌcọ ꞌchí hảư phủ ꞌnặn ꞌmí phép ꞌquiến ꞌnăng ꞌtến téng đa ꞌhuôm cắp#ꞌháu, ꞌsướng ꞌháu ꞌnị đảy ꞌpẹ ꞌtáng ꞌmựt ꞌlẹo đảy ꞌmí phép ꞌquiến ꞌnăng ꞌtến téng đa ꞌhuôm cắp Chảu Pua ꞌPhạ phủ pên ꞌPo ꞌháu ꞌnặn#lo.

22 ꞌPứng ꞌquám Chảu Khuôn Saư bók chết ꞌsúm ꞌhốm#ꞌnị, phủ đaư ꞌmí chaư#ꞌphắng, lỏ#hảư ꞌphắng#au.”