10
1 Diusu ja mesa jacuatsasiati cuana israelita cuana tiataidha Cristo epue jepuiti ai quisa saida cuana tuna ebuetsua puji bahui. Beju tueda jacuatsasiati cuana a putsu, aimue Cristo sa ai saida cuana einatsuta huecuana mahue. Ed'eji su tueda pamapa mara Diusu peje su jairutsuati cuana ja aimue detse Diusu peje su nimebutsepi ata cua huecuana mahue. 2 Ahua tueda jairutsuati cuana ja cristiano cuana sa jucha cuana dhipataidha su, ¿jucuaja puji ni da, da su pamapa mesa daja irutsuataidha huecuana? Ahua ene tueda jairutsuati cuana ja saitiataidha huecuana su, da su aimue detse juchaji jabatita cua puidha mahue. 3 Enei hue, tueda jairutsuati cuana ja pamapa mara cristiano cuana pibametaidha tuna sa jucha cuana jepuiti. 4 Beju animalo cuana sa ami ja aimue detse cristiano cuana sa jucha cuana dhipata cua mahue.
5 Da putsu, Cristo ja ye mundo su pueana su, uja Tata Diusu atana:
Miqueda tsada mahue animalo manujiji jairutsuati cuana.
Miada ema equita tiana mi peje su ema eirutsuati puji.
6 Miqueda tsada mahue animalo cuana pamanuameta huecuana.
Daja huecha animalo sa equita cuana patiumeta huecuana.
Aimue tueda ai cuana tupu saida mahue jucha cuana edhipape puji.
7 Tata Diusu, hue ema upia mique tsada ya puji.
Da puji ema pueana.
Daja, mique quirica su derejiji yani ema jepuiti.
8 Beju daja Cristo ja Tata Diusu ataidha. Diusu sa tsada mahue animalo manujiji jairutsuati cuana. Tsada mahue mesa animalo cuana sa equita tiumejiji jucha cuana edhipape puji. Moisés chenu sa jacuatsasiati cuana ja daja ebuetsuatani biame, aimue tueda ai cuana tupu saida jucha cuana edhipape puji. 9 Mepibaenique Cristo ja Tata Diusu uja ataidha: “Tata Diusu, hue ema upia mique tsada ya puji.” Equene animalo manujiji jairutsuati cuana beju apemetana. Mesa equita quitaita jairutsuati putsu, tueda animalo jairutsuati cuana apemetana. 10 Da su Diusu ja jiahue ecuana mesa dharejiji cuana yatani, Cristo ja Diusu sa tsada atana putsu. Piada nuati hue tusa equita quitaita Diusu peje su curusu su irutsuatana ecuana sa jucha cuana edhipa puji.
11 Pamapa sacerdote cuana ja pamapa tsine tueda animalo manujiji jairutsuati cuana atiyuatiyu ape bue mahue. Beju tueda jairutsuati cuana ja aimue jucha cuana edhipapetani mahue biame, daja hue atiyuatiyu eirutsuatani huecuana Diusu peje su. 12 Jesucristo mu piada nuati hue Diusu peje su jairutsuatiana cristiano cuana sa jucha cuana edhipape puji. Daja ape putsu, Tata Diusu sa bai eni bene cielo su aniuteeniana Diusu neje tupupai ecuatsasia epu puji. 13 Dapia eid'uatani Diusu ja tu neje jamajaitiji cuana pishitiame putsu, tusa eme su eichata teje. 14 Piada jairutsuati neje bahui Cristo ja mesa dharejiji cristiano cuana nimebutsepiaenitana. 15 Espíritu Santo ja tueda ecuana eshanapameenitani. Uja tueda puidha Diusu sa quirica derejiji yani su:
16 Neicha jamitsuti eichacua yama etiayu huecuana.
Da tiempo su yama quema jacuatsasiati cuana eshanapamepeyu huecuana.
17 Beju tuna sa ai madhada cuana eperdonayu.
Tuna sa jucha cuana dhipape putsu, aimue yama neicha epibayu mahue.
18 Da su Diusu ja cristiano cuana sa jucha cuana perdona putsu, aimue beju Diusu peje su irutsuaji cuana neicha irutsua taji pu cua mahue jucha cuana sa puji.
Diusu peje su ecuaneseda janariati taji
19 Da putsu, edue cuana, Diusu yani iyuda saida eti jude su iyuame mahue neje ecuaneda nubi cua Cristo sa ami jepuiti. 20 Mesa equita ecuana sa jucha cuana jepuiti Diusu peje su curusu su jairutsuatiana putsu, ecuaneda Diusu yani huacuinati cua. Ecuaneseda Diusu peje su ecuinahu edid'i eichacua yani. Jiahue aimue aiya biame ecuana nahuebata cua Diusu peje su enariati puji, eid'e eni Jesús ja ecuana Diusu peje su ecuinati puji etsahuatani putsu. 21 Da su edue cuana, menariatija Diusu peje su, ecuana sa sacerdote aida Jesús ja ecuaneseda puji Tata Diusu ebajatani putsu. 22 Da su beju pamapa muesumu butsepi neje menariatija. Tu peje su jubida menimetucheatija. Daja ecuaneda Diusu nariati cua, Cristo ja mesa ami neje ecuana saitiatana putsu. Aimue beju ecuaneda juchaji jabati cua mahue. Cuaja equene cristiano cuana jarucuatitaidha Diusu mebajaji mahue su nime, daja Diusu ja ecuana Espíritu Santo tia putsu ecuana rucuatana tu saida emebaja puji. 23 Diusu ja mesa tiajiji jamitsuti eichacua cuana ecuana neje yapetayu putsu, be paichaderatija Cristo jepuiti jabuetsuati cuana pia jabuetsuati cuana tije ya puji. 24 Metsahuatija ecuaneda cama huamahuama ibuneda ebati puji, daja huecha ai saida cuana ya puji. 25 Da putsu, be mepuerijiji jadhitati hora cuana su, cuaja piada piada cuana eputani nime. Be tuna nime mepuji. Edhitatiani je, menimetucheametija huamahuama, Echua Puji Jesucristo tipeida epue putsu.
26 Ahua quebata ja Cristo sa jabuetsuati saida cuana shanapa putsu biame, ene quita piba neje eichaderata su, aimue detse tueda d'eji su pu cua mahue, Cristo sa jabuetsuati saida cuana ichaderatana putsu. 27 Diusu ja tueda cuati castigo su ebeituenitayu pamapa Diusu neje jamajaitiji cuana neje tupupai. 28 Mepibaenitique Moisés chenu sa jacuatsasiati cuana su. Da tiempo su ahua quebata ja tueda jacuatsasiati cuana jei aja mahue yatani su, beta ahua quimisha etuaquisaji yani su, da su beju tuseda manu taji puidha, tu neje aimue ai jaibunebati mahue putsu. Daja epuani Moisés chenu sa jacuatsasiati cuana su. 29 Daja huecha Diusu ja mesa Ebacua eichaderatani cuana jubida ecastigaenitayu, tusa ami ai puji saida mahue nime ebatani huecuana putsu. Espíritu Santo eichaderatani huecuana putsu, Diusu sa jaibunebati cuana di eichaderatani huecuana. Da putsu, Diusu ja cuati castigo jubida neje ecastigaenitayu huecuana. Tueda Cristo sa d'uichajiji ami jepuiti Diusu ja mesa dharejiji cuana d'eji su yatani, cuaja mesa jamitsuti eichacua cuana epuani batame. 30 Beju Diusu uja puidha mesa quirica derejiji yani su: “Quema puji bahui cristiano cuana castiga taji. Yama echujetia castigo neje.” Uja neicha mesa quirica su derejiji epuani: “Diusu ja mesa dharejiji cuana biame ejuzgatayu.” 31 ¡Aba, eid'e eni Diusu ja ecastigatani cuana!
32 Mepibaenitique micuaneda equene Diusu sa quisa saida cuana id'abapiruana su. Da tiempo su cristiano cuana ja micuana duininibapirutana. Micuana sufri apirutana huecuana biame, paciencia neje micuaneda tucheana. 33 Piada piada cuana micuana neje jashishatiana. Daja huecha micuana ichetana huecuana pamapa cristiano cuana butse su. Piada piada micuana aimue daja sufri ametana huecuana mahue biame, micuaneda pia sufri yametani edue cuana ba putsu, tsahuana huecuana. 34 Daja huecha terijiji cuana micuaneda tsahuana. Cristano madhada cuana ja micuana sa ai cuana mejemitana biame, beidaji neje micuaneda tucheana, micuana sa cielo su ebia su saida eni ai cuana aimue micuana aiya biame emetsita mahue, micuaneda bahue putsu. 35 Da su menimetucheaderatique Echua Puji peje su. Be meichaderaji tueda janimetucheati cuana. Ahua micuaneda daja hue enimetucheaderati su, cielo su micuaneda ecuinati. 36 Ahua daja hue enimetucheaderati su, micuaneda Diusu sa ai tsada cuana yape. Ahua daja micuaneda ya su, Diusu ja micuana pamapa mesa jamitsuti ai saida cuana etiatayu. 37 Beju uja derejiji yani Diusu sa quirica su:
Hua chidi hue beju Diusu sa Jabeituti Deja epue puji.
Aimue etsunuta mahue beju.
38 Quebata ema peje su enimetucheati su, tueda yama saida ebatsu.
Tusa ema peje su janimetucheati jepuiti eid'e yanieniti.
Ahua cristiano madhada cuana iyuba putsu, ema peje su enimetuchearijiti su, da su aimue ema tu neje beidaji epu mahue.
39 Beju ecuaneda mu aimue daja mahue. Aimue ecuaneda Diusu sa castigo su eputita cuana nime mahue. Beju ecuaneda Diusu peje su enimetucheatiani putsu, d'eji su epueni.