1 Be̱ lá'ana Xránadxu Dios, lue', bénne'du xu'a.

Be̱ lá'ana Le̱' lá'azxa, dute̱ da naca'.

2 Be̱ lá'ana Xránadxu, lue', bénne'du xu'a,

ne quebe gal-la lazru' ca da chawe' da nune̱' chiu'.

3 Dxunite lawe̱' chee̱ xúgute̱ dul-la nabaga'a.

Dxexune̱' neda' ca naca xúgute̱ xízrawe̱' da xu'a.

4 Dxuxúe̱' neda' chee̱ quebe gatia'.

Lu xel-la' zri'i lazre' chee̱', ne xel-la' dxexache lazre' chee̱'

5 Dxuzánle̱'e̱ da chawe' da dxaca chia' chee̱ xegá'ana'

ne benne' wal-la ca dxaca chee̱ tu bsia.

6 Xránadxu Dios dxuchi'e̱ chee̱ da dxaca chee̱ benne'

ne dxucá'ana chawe̱' da dxaca chee̱'.

7 Blé'ene̱' Moisés da ca' gulú'u lazre̱' gune̱',

ne be̱'e̱ lataj benne' Israel ca' belelé'ene̱' da ca' be̱ne̱'.

8 Naca Xránadxu Benne' dxexache lazre', ne Benne' zri'i lazre'.

Quebe dxezrá'azie̱', san zrente̱ naca xel-la' zri'i lazre' chee̱'.

9 Quebe nníaqueze̱', ne quebe zrá'aqueze̱'.

10 Quebe dxudée̱' dxi'u lu da ba xa' ca naca zria

ne quebe ne guzría xi'e̱ dxi'u ne̱ chee̱ dul-la da nabágadxu.

11 Ca sibe naca xabáa lawe' xe̱zr la xu,

caníqueze naca xel-la' zri'i lazre' zren chee̱' nen benne' ca'

12 Ca zitu' naca naga dxalaj gubizra, ne naga dxebía na,

caníqueze dxucuase̱' zitu' dul-la da nabágadxu.

13 Ca zri'i lazre' naca xra bidu ca' nen zrí'inequeze̱',

caníqueze naca zri'i lazre' Xránadxu nen benne' ca'

14 Le̱' nézene̱' ca nácadxu lu be̱la' dxen chee̱dxu.

Dxajsá lazre̱' nácadxu xu xrte.

15 Ca naca xel-la' nabán chee̱dxu, nácadxu ca tu xixre'.

Dxegúladxu ca tu xiaj xixre',

16 na' dxedé be' dxua na le̱ na, na' dxexenite na,

na' québedxa nu dxelé'equeze le̱ na.

17 Ca naca chee̱ benne' ca' dxelape̱' ba lá'ana Xránadxu,

zúale̱ xel-la' zri'i lazre' chee̱' benne' ca' chadía chacanna,

na' xel-la' xrlátaje chee̱' zúale̱queze na xúgute̱ zri'ine zre sua

18 benne' ca' dxelúnqueze̱' ca naca xel-la' wezría nune̱',

ne benne' ca' dxelune̱' ca zaj naca da nadxixruj be'e̱.

19 Nuzúa Xránadxu lataj chee̱' xabáa naga dxe'e̱ dxenná be'e̱.

Nácaqueze̱' Wenná Bea lawe' xúgute̱ da zaj zua.

20 Le güe lá'ana Xránadxu, le'e, gubáz chee̱ xabáa ca',

Nácale benne' wal-la, ne benne' chúchule̱'e̱,

na' dxunle ca dxenná Le̱', ne dxuzé̱ nágale ca dxe̱'e̱ le'e.

21 Le güe lá'ana Xránadxu, le'e, dxenná beale xabáa.

Nácale we̱n zrin chee̱', ne dxunle ca dxaca lazre' Le̱'.

22 Le güe lá'ana Xránadxu, xúgute̱le le'e ba nun Dios le'e,

zrale xúgute̱ lataj naga dxenná bea Le̱'.

¡Be̱ lá'ana Xránadxu, lue', bénne'du xu'a!