1 ¡Nazrí'ida' Xránadxu Dios

lawe' da benne̱' chi'a, ne da gunaba' lawe̱',

2 ne lawe' da bze̱ nague̱' chia'!

Chee̱ le̱ na' guláwizra' Le̱' dxácate̱ naca bana'.

3 Guzúa' lu da ste̱be chee̱ xel-la' gute,

ne bzreba' ba zua' chu'a lataj ba xa'.

Guzúa' lu da ste̱be, ne guzaca zi'a.

4 Nadxa bláwizra' Xránadxu Dios, gunnía':

Xrana' Dios, bselá bénne'du xu'a.

5 Cháwe'le̱'e̱ naca Xránadxu Dios, ne xrlátaje naque̱'.

Awe', dxexache lazre' Dios chee̱dxu dxi'u.

6 Dxuxúe Xránadxu benne' dxexruj lazre' ca'.

Gate na' guzúa' lu da ste̱be bselé̱' neda'.

7 Be̱n dipa lazre', bénne'du xu'a,

lawe' da nun Xránadxu da chawe' chiu'.

8 Lue', Xran, bseláu' bénne'du xu'a lu na' xel-la' gute,

chee̱ québedxa cuezre we̱'a, ne chee̱ quebe cheajcházia'.

9 Ta' lau Xránadxu Dios

naga zaj zra' benne' ca' zaj naca bane̱'.

10 Guxéajle̱'a chee̱', na' chee̱ le̱ na' bchálaja', lácala guzaca zí'le̱'a.

11 Lu xel-la' dxezrebe chia', gunnía':

Zaj naca xúgute̱ bénneache benne' we̱n lazre' ca'.

12 ¿Bizra quízrujqueza' Xránadxu Dios

chee̱ xúgute̱ da chawe' da be̱ne̱' chia'?

13 Si'a lu ne̱'e̱ xel-la' weselá,

ne guláwizra' Xránadxu Dios.

14 Na'a guna' da ca' guche̱be lazra' lau Xránadxu.

Guna' na lau xúgute̱ bénneache chee̱'.

15 Xránadxu Dios dxe'e̱ gunne xue

chee̱ bénneache chee̱' gate dxelátie̱'.

16 Xrana' Dios, da li naca' we̱n zrin chiu'.

Naca' we̱n zrin chiu', ne zri'ine nu'ula we̱n zrin chiu'.

Lue' bzúzruju' da zaj nadxéaj na neda'.

17 Da güe lá'ana' Lue' gaca na ca tu béadau' gutia' lau',

ne gucá'ana szrena' Lau', Xrana' Dios.

18 Lau Xránadxu Dios guna' da ca' guche̱be lazra' chee̱',

da guna' lau xúgute̱ bénneache chee̱'.

19 Guna' na chale'aj xu'u lizre Xránadxu Dios,

da dxe' na lu'ule xe̱zre Jerusalén.

¡Gaca ba lá'azxa Xránadxu Dios!