1 Lu dute̱ xel-la' dxebé le gul-la chee̱ Dios, Bénnea' dxutipe̱'

Lu da ba neza chee̱le le cuezre xa'a lau Dios chee̱

2 Le gul-la, ne le capa xídedau'.

Le quinne xrtan da con zríadi'i na du, ne da dxúl-lale̱nle.

3 Le gucuezre luzu da dxulucuezre̱' gate naca beu' dxe'ene,

da naca na zra nuzúadxu gundxu laní lá'azxa.

4 Naca na tu da dxun na ba xen xelún benne' Israel ca',

da bdxixruj bea Dios xelún zri'ine zre sua Jacob.

5 Bzue̱' na ca tu da gulé'e lau na zri'ine zre sua José

naga benda' tu xrtizra' bénneache da quebe guxéajni'ida'.

6 Gunná Dios: “Begúa' xua' da buludé̱'e̱' benne' chia' ca'.

Bsezrá'a benne' chia' ca' da zi'i.”

7 Lu da ba xa' da guzúale, bláwizrale neda', na' bselá' le'e.

Beche̱ba' chee̱le naga nagacha' lu beuj bza gate na'

na' bxua' ájala gunle naga zaj de̱ beaj nisa zaj nazí le Meriba.

8 Le xene, bénneache chia', na' gusízreda' le'e.

Le'e, benne' Israel, che dxaca lázrele sile da dxennía',

9 quebe gápale tu dios chee̱ benne' xula,

ne quebe guzú zríbele lau tu dios chee̱ benne' zitu'.

10 Neda', Xránale, naca' Dios chee̱le.

Bebéaja' le'e lu xe̱zr la xu Egipto.

Le salaj dxú'ale, na' gunna' da gágule.

11 Bénneache chia' quebe belúe lazre̱' da gunnía'.

Benne' Israel ca' quebe gulaca lazre̱' xelezí' lu ne̱'e̱ neda'.

12 Chee̱ le̱ na' bsana' benne' ca' lawe' da gulaque̱'

Belune̱' ca da guléquene̱' xrlátaje.

13 Che la gulebé' gunne xue bénneache chia' chee̱ da gunnía',

ne che la belún benne' Israel ca da ble'eda' le̱',

14 na' chadite̱ bzria xi'a benne' guledábague̱' le̱',

ne gudíl-lale̱na' benne' guledíl-lale̱ne̱' le̱'.

15 Che la belún benne' Israel caní,

na' benne' ca' dxelecuídene̱' Xránadxu buluzúe̱' xrtizre̱',

(san chadía chacanna zaj nabague̱' zria),

16 na' Dios gune̱' xelawe̱' zrua' xtila cháwedau',

ne gune̱' xelélajquezne̱' nen bzrína'dau'.