1 Le xen da nigá, le'e, benne' xúgute̱ cue' xe̱zr la xu.

Le guzé̱ nágale, le'e, benne' dute̱ xe̱zr la xu,

2 le'e, benne' blau, ne le'e, benne' xezícadxa,

le'e, benne' gunní'a, ne le'e, benne' xache'.

3 Guchálajqueza' xel-la' sina,

ne guzéajni'ida' le'e da xu'u lázrdawa'.

4 Guzé̱ naga' tu dizra' sina.

Gúl-laqueza' chee̱ tu da nagache,

ne quinnia' da zríadi'i na du che̱n.

5 ¿Bizr chee̱ na' dxun na ba xen zreba' lu zra chee̱ da ste̱be,

gate naxechaj da cale̱la neda' da dxelún benne'

6 Benne' ca' dxuluxrén lazre̱' da zaj de̱ chee̱',

ne dxulucá'ana szren cuine̱' lawe' da zaj nápale̱'e̱.

7 Quebe xelezéquene̱' xelexá'awe̱' le sa' ljwezre̱',

ne quebe gaca xulunézruje̱' Dios da guselá na le̱'

8-9 chee̱ tu xelaca bánzqueze̱',

ne chee̱ cabata' xeluzru be̱l-la' dxen chee̱'

lawe' da zrente̱ naca da dxexa'u na xel-la' nabán chee̱ bénneache,

ne cabata' seque' nu benne' quízruje̱' na.

10 Xelelé'ene̱' dxelátequeze benne' sina ca',

ne xelúzrue̱' cáte̱ze dxaca chee̱ benne' xala ca',

ne chee̱ benne' lázrdau zide' ca',

na' dxulucá'ane̱' xel-la' gunní'a chee̱' lu na' benne' xula ca'.

11 Dxeléquene̱' wazráqueze zri'ine zre sue̱' chadía chacanna,

na' xelexegá'ana lizre̱' chee̱ xelaca na chee̱ xúgute̱ cuen

na' dxelu'e̱ la xe̱zr la xu chee̱' ca' ca zaj nazí láqueze̱'.

12 Quebe xelexegá'anatequeze bénneache lu da ba lá'ana.

Zaj naque̱' ca be̱ xixre' ca', be̱ dxeláteba'.

13 Ca da dxelune̱' naca na da xálaze,

na' dxelexezaca ba lazre' xrtia ljwezre̱' ca' nen da dxelennaze̱'.

14 Zaj naque̱' ca tu cue' zrila' zjácaba' lataj ba xa',

Benne' xrlátaje ca' xelenná bé'ene̱' benne' gunní'a ca'

na' xelebía xi' da ca' guta' chee̱',

na' lataj ba xa' gaca na naga tu xelezúazqueze̱'.

15 Dios xexá'awe̱' xel-la' nabán chia' lu lataj ba xa'

lawe' da xeché̱'e̱ neda' naga zúaqueze̱' Le̱'.

16 Quebe su' ste̱be gate nu benne' dxezrué'ene̱' xel-la' gunní'a,

ne gate dxune̱' lizre̱' da zácale̱'e̱dxa,

17 lawe' da gate gatie̱' quebe bi xexu'e̱,

ne quebe chéajle̱ xel-la' gunní'a chee̱' le̱'.

18 Lácala dxácate̱ naca bane̱' dxe̱ cuine̱' zue̱'

na' dxelúe lá'ana bénneache le̱' gate dxe̱pe bane̱',

19 san chu'e̱ naga zaj zra xra xrtawe̱' ca',

ne cabátadxa lé'ene̱' xel-la' naxaní'.

20 Bénnea' dxelapa bénneache le̱' ba lá'ana san quebe

naque̱' ca be̱ xixre' ca', be̱ dxeláteba'.