1 Xránadxu Dios naque̱' xel-la' naxaní' chia',

¿Nu benne' gaca guchebe̱' neda'?

Xránadxu Dios naque̱' Benne' dxucu'uje̱' neda'.

¿Nu benne' gaca guzúe̱' neda' lu da sté̱bele̱'e̱?

2 Gate guléchaj benne' ca' dxelune̱' da cale̱la chia',

ne benne' ca' dxeledábague̱' neda' chee̱ xuluzría xi'e̱ neda',

na' gulechégüe̱', ne xeajlecházie̱'.

3 Láqueze xeléchaj tu cue' benne' dxjaque̱' wedil-la neda',

benne' ca' dxeledábague̱' neda', quebe zrébequeza'.

Láqueze xuluzúe̱' neda' lu wedil-la, neda' guxrén lázrequeza' Dios.

4 Tu da gunábeda' Xránadxu Dios.

Da nigáze sa lazra', da naca na chee̱ sua' lizre Xránadxu

chee̱ gulaba lazra' ca naca da xrtante̱ chee̱ Xránadxu,

ne chee̱ guchálajle̱na' Le̱' lu xudau' lá'azxa chee̱'.

5 Le̱' gucache chawe̱' neda' lu lataj lá'azxa chee̱'

Gucache chawe̱' neda' lu lataj cheé̱queze̱' naga zúaqueze̱'.

Guzúe̱' neda' tu naga se̱ cháweda'.

6 Nadxa gune̱' guzétaja' benne' dxeledábague̱' neda',

na' nen dute̱ xel-la' dxebé gutia' béadu ca' guzúa'-ba'

Gúl-laqueza', ne tu güe lá'anazqueza' Xránadxu.

7 Xran, ben chi'a gate ne dxuláwizra' Lue'.

Bexache lazre' neda', ne beche̱be chia'.

8 Lu xichaj lázrdawa' benda' chi'u, gunníu': “Bexilaj chia'.”

Xexílaja' chiu', Xran.

9 Quebe gucache lau' chia' neda'.

Lu xel-la' dxezrá'a chiu' quebe xebigu' naga zua' neda',

Nacu' Benne' dxácale̱ne̱' neda'.

Quebe gusanu' neda', ne quebe cueaj xichju' neda',

10 Lácala xulusán xra xrna'a neda',

tu xecá'azqueze Xránadxu Dios neda'.

11 Bse̱de neda' da dxaca lazru' guna', Xran,

ne ble'e neda' da li lazre' da dxal-la' guna',

lawe' da zaj naxán benne' dxeledábague̱' neda'.

12 Quebe gu'u lataj benne' dxeledábague̱' neda'

xelune̱' chia' da dxelaca lazre̱'

lawe' da zaj naxechaj benne' we̱n lazre' neda'

nen benne' dxelaca lazre̱' xulusaca zi'e̱ neda'.

13 Xránadxu Dios guche̱be lazre̱' le'eda' da xrlátaje chee̱'

La quebe guxéajle̱'a da nigá, na' gute ni'a na'a.

14 Le cueza xelá' Xránadxu.

Le gutipa lázrele, na' Le̱' guzé̱ chúchue̱' le'e.

Awe', le cueza xelá' Xránadxu.