13
Aḳeri nosiot
1 Tumra eḳe-oinnore afon bair laḳan hamesha maea ḳorio. 2 Memandari ḳora faurio na. Zano ni, kunu kunu zone na sinia Allar firistaro memandari ḳorsoin. 3 Zel ḳanat zeta manush bondi asoin, nizoreo ola bondi mono ḳoria tarare shaijjo ḳorio, ar zerar ufre zulum-mosibot ḳora or, nize ou mosiboto foṛso mono ḳoria, tarare kial ḳorio.
4 Hoḳoleu bia-shadire ijjot ḳorio. Zamai-bour shomporkore fak-fobitro rakio. Mono rakio, Allae ku-nozori, zinakur ar luchcha oḳolor bisar ḳorba.
5 Duniabi don-samanar lalos taki horia roio. Tumrar zeta ase, ota loiau kushi roio. Allae bataisoin,
Ami kunumonteu tumare saṛtam nae,
kunu haloteu tumare falaitam nae.
6 Erlagiu amra himmot ḳoria ḳoitam fariar,
Mabud amar shohae asoin, ami ḍoraitam nae.
Manshe amar kita ḳorto?
7 Huno, ze buzurg oḳole tumrare Allar kalam talim disoin, tarar ḳota iad ḳorio. Tarar zindegir halotor ḳota balamonte sinta ḳoria, tumrao tarar laḳan imane mozbut o. 8 Isa al-Mosi gotoḳail zela asla, aizo ola asoin, ar hor-hameshau ola roiba.
9 Nanan nomunar noea noea talime zanu tumrare be-fote na ney, ḳana-finar kuṭinaṭi bishoe na tukaia, borong Allar rohomotor ufre ḳaim ro. Ila kuṭinaṭi niomor ufre zera borosha ḳorto, itae to tarar kunu lab oise na. 10 Amrar to eḳan kurbani ḳana ase, ikanor kunta ḳaibar eḳtiar Musa nobir ebadot-tambur imam oḳolor nai.
11 Gunar mafir lagi zobo ḳora foshur lou loia, Boni Israilor fordan imam oḳol ebadot-ḳanar ḳas pak zagat hamain, oile ou foshur aḍḍi-mangsho hoḳolta Boni Israilor kempor bare nia zalail oe. 12 Ou laḳan Hozrot Isao Zeruzalem ṭaunor bare gia zulum-ḳoshṭo shoijjo ḳoria mout ḳobul ḳorla, zate tan nizor lour usillae manshore guna taki pak-saf korta faroin. 13 Oḳon aukka, amra-o tan bodnamre nizor ḳando loia kempor bare tan ḳandat zaigi. 14 Ḳaron i duniat amrar lagi staei kunu ṭaun nai, amra ḳali hou ṭaunor tallash ḳorram, ze ṭaunor didar bade faimu.
15 Te oḳon amra al-Mosir zoriae loia hamesha Allar dorbaro zikir-azkar kurbani ḳori, mani duio ṭuṭe tan namor gunogan gai. 16 Nek kam ḳora ar obabi manshore dan-ḳoerat bilani faurio na, ḳaron ou laḳan kurbanie Alla Pak kushi oin.
17 Tumrar murobbi oḳolor hukum mania tarar gese mata nuaia roio, Allar dorbaro hishab deoa lagbo ḳori tara hamesha tumrar zanor faradar oia ḳam ḳorra. Oḳon tara zate kushi mone ita ḳoroin, erlagi tumra baiddo roio. Tara zudi mono duk faia tumrar lagi ḳam ḳoroin, te tumrar balai oito nae.
18 Amrar lagi dua ḳorio. Amra to zani, amrar bibeḳ saf-sofa ase, hokkol befare hok fote soltam sai. 19 Ami ḳas ḳori tumrar gese ou dua sairam, zate zoldi ḳori ami hirbar tumrar loge mulaḳat ḳortam fari.
Bidaei salam ar dua
20 Allar loge amrar milon, hor-hameshakur usilla,
furafur ḳaim ḳorar lagia,
amrar malik Hozrot Isa, nizor lou bilai dia,
meṛa falor mohan raḳal bonisoin.
Hozrot Isar moutor bade, shanti deura Alla Pake,
murda taki tanre zinda ḳorsoin.
21 Hoḳol nek kamor tofik deukka, tan morzi zugaia solar,
ar tain zeta fosond ḳoroin,
dilo otar eshki deukka, Isa al-Mosir zoriae,
en mohima hor-hamesha rouk, amin.
22 Bai oḳol, tumrar gese minot ḳorram, tumra biroḳto na oia i nosiot huno, ami kub shoṭkaṭe leḳlam. 23 Huno, amrar bai Timotie ḳalas faisoin, tain zudi shomoe moto amar ono ain, te ami tumrar gese aoar shomoe tane loge loia aimu.
24 Tumra nizor murobbi oḳolre, ar pak bonda oḳolre amar salam zanaio. Itali deshor manshe tumrare salam zanaira.
25 Tumra hoḳolor ufre Allar rohomot ḳaim rouk. Amin.