1 Hozrot Isau oila Allar oada ḳora hou al-Mosi, ikan zera ekin ḳore, tarar zonom oise Allar nur taki. Zano ni, ze manshe kunu ma-bafore mohobbot ḳore, he erar aoladreo mohobbot ḳorbo. 2 Te Alla Pakor aoladre mohobbotor befar kila buzaitam? Alla Pakre mohobbot ḳoria tan hukum-ahkam mania solleu buza zae, amra hasau tan aoladre mohobbot ḳori. 3 Allar hukum-ahkam mania solau oilo Allare mohobbot ḳora. Ar tan hukum-ahkam mana to kub ḳoṭin kunu ḳam nae. 4 Ḳaron Allar nuror aolad oḳol i zogotor ufre zoei oin, ar zogotor laṛait ze zinishor bole zoei oisi, ikṭa oilo amrar iman. 5 Hozrot Isau oila Allar ḳas maear zon Ibnulla, ikan zera ekin ḳore, i zogotor laṛait tarau ḳali zoei oe.

6 Isa al-Mosi oila hou zon, zein fani ar lour bole duniat aisoin. Tain ḳali fanir zoriae nae, borong hou pak gusolor fani ar solibo zan kurbanir lour bole aisoin. Ita befare Allai Pak Ruhe shakki dira, ar ou ruh to hok. 7 Ashole tino shakkie shakki dira: 8 ruh, fani ar lou, ou tin shakkir shakki eḳ shoman. 9 Manshor mukor shakki zebla amra mani, te Allar deoa shakki to aro mozbut, tan ḳas maear zon Ibnullar befare tain ola shakki disoin. 10 Ar ou maear zonor ufre zera iman ane, tarar dileo oula shakki dey. Oḳon Allai shakkire zera manche na, tara to shoeong Allareu misa matra banailise, ḳaron Allae nize tan maear zonor befare ze shakki disoin, tara ita manche na. 11 Tan shakki oilo, tain nize amrare aḳerator zindegi dan ḳorsoin, ou zindegi tan ḳas maear zonor gese ase. 12 Ze manshe ou maear zonre faise, he zindegio faise. Ar Allar hou maear zonre zera faise na, tara i zindegio faise na.

13 Baiainre, tumra zera Isa Ibnullar ufre iman ancho, tumrare zananir lagi ami ita leḳlam, tumra aḳerator zindegi failiso. 14 Oḳon amra tan dorbaro ou shaosh faisi, tan morzi mafik amra kunta magile, ita tain hunba. 15 Amra zebla zani, amra zeta magi ita tain hunoin, te eoḳano zani, tan dorbaro amra zeta magisi, ita nichchit failisi.

16 Ḳeu zudi kunu mumin baire ola eḳ guna ḳorat deḳe, ze guna moutor foti nae, te he aroz ḳorle Allae hou baire hefazot ḳorba. Ami ino ou laḳan gunar ḳota ḳoiram, zerar guna moutor foti nae. Oile mono rakio, moutor foti gunao ase, ila gunar befare aroz ḳorar lagi ami ḳoiram na. 17 Ashole hoḳol zator naformaniu guna, oile hoḳol guna to moutor foti nae.

18 Amra zani, Allar nur taki ze bonda oḳolor zonom oise, era gunar ḳamo bondi roe na. Borong Allar nure zonom loa hou ḳas maear zone tarar zanor hefazot ḳoroin, Iblise tarare ḳobza ḳorto fare na. 19 Ar amra to zani, ḳali amrau oilam Allar manush, bad-baki asta zogotu Iblisor faor tole. 20 Amra eoḳano zani, Allar ḳas maear zon aia hari amrare ou aḳol disoin, zate hok Allare amra sini. Te hok Allar loge amrar milon oise, mani tan ḳas maear zon Isa al-Mosir loge amrar milon oise. Tainu to hok Alla, tainu aḳeri zindegi.

21 O sabal oḳol, hoḳol nomunar murtifuza taki basia ro. Amin.