1 মাবুদে মুছারে কইলা, “তুমি আর হারুন, হারুনর পুয়াইন নাদাব আর আবিহু, আর বনি ইসরাইলর সত্তইর জন মুরব্বি নেতা আমার গেছে উঠিয়া আও। আইবার বালা তুমরা দুরই থাকি আমারে সইজদা করিও। 2 অইলে খালি তুমি একলা আমার কাছাত উপরে আইবায়, আর কেউ নায়। এরার লগে আর কুনু বনি ইসরাইল যানু না উঠে।”

3 মুছায় মানষর গেছে আইয়া মাবুদর হক্কল কালাম আর আইন-কানুন হুনাইলা, ইতা হুনিয়া হকল মানষে একলগে কইলা, “মাবুদে যততা বাতাইছইন ইতা হক্কলতা আমরা মানমু।” 4 মাবুদর বাতাইল হকল কালাম মুছায় লেখিয়া থইলা। বাদর দিন ফজরে উঠিয়া পাড়র লামাত এখান কুরবানি খানা বানাইলা, আর বনি ইসরাইলর বারো গুষ্টিরে ইয়াদ রাখার লাগি বারোগু খুটা বানাইলা। 5 বাদে তাইন বনি ইসরাইলর জুয়ান অকলরে পাঠাইলা আর তারা মাবুদর নামে বউত জালাইল কুরবানি দিলা, আর বউত বিছাল জবো করিয়া ছালামতি কুরবানিও দিলা। 6 মুছায় কুরবানির লউর অর্ধেক নিয়া কয়টা বাটিত থইলা, আর বাকি অর্ধেক নিয়া কুরবানি খানার উপরে ছিটাই দিলা। 7 বাদে তাইন আল্লার লগে মিলনর উছিলার নিয়ম-কানুন লেখা কিতাব খান তিলাওত করি মানষরে হুনাইলা। ইতা হুনিয়া মানষে জুয়াপ দিলা, “আমরা মাবুদর হকল হুকুম হুনমু, তাইন যততা কইছইন হকলতা মানমু।” 8 অখান হুনিয়া মুছায় লউ লইয়া মানষর উপরে ছিটাইয়া কইলা, “ই লউ অইলো আল্লাই মিলনর হউ উছিলার লউ, যে উছিলা মাবুদে তান হকল শর্ত মাফিক তুমরার লগে বওয়াল করছইন।”

9 তেউ মুছা, হারুন, নাদাব, আবিহু আর বনি ইসরাইলর সত্তইর জন মুরব্বি নেতা পাড়র উপরে উঠলা। 10 তারা নিজর চউখে বনি ইসরাইলর আল্লা পাকর দিদার দেখলা। তারা দেখলা, আল্লার পাও মুবারকর তলে আছে, চকচকা লীলমনি পাথরর তৈয়ারি ছাতর লাখান, আছমানর নমুনায় ছাফ। 11 বনি ইসরাইলর মুরব্বি অকলে আল্লারে দেখলেও তাইন এরারে মারার লাগি আত তুললা না। তারা তান দিদার পাইলা আর খাওয়া-দাওয়া করলা।

12 বাদে মাবুদে মুছারে কইলা, “তুমি অউ পাড়র উপরে আমার কান্দাত আও, আইয়া কয় দিন রও। মানষরে তালিম দিবার লাগি আমার যে হুকুম-আহকাম পাথরর উপরে লেখছি, অতা আমি তুমারে দিমু।” 13 তেউ মুছায় তান খাদিম ইউছারে লগে লইয়া পাড়ো উঠলা, আর মুছা আল্লার পাড়ো গেলা। 14 তাইন মুরব্বি অকলরে কইয়া গেলা, “আমরা ফিরত আইবার আগ পর্যন্ত আপনারা আমরার লাগি অনো বার চাইবা। হারুন আর হূর আপনারার কাছাত আছইন, কুনু কাইজ্জা-ফসাদ লাগলে এরার গেছে যাইবা।” 15 মুছা পাড়ো উঠতেউ আস্তা পাড় মেঘর চাকায় গুরি গেলো, 16 আর তুর পাড়র উপরে মাবুদর নুরর তজল্লি জাইর অইলো। ছয় দিন আস্তা পাড় মেঘর চাকায় গুরা রইলো। সাত নম্বর দিন অউ মেঘর চাকা থাকি মাবুদে মুছারে ডাকিলা। 17 বনি ইসরাইলে মাবুদর নুরর তজল্লি দেখলা, তারা দেখলা পাড়র উপরে আগুনির লাখান জলের। 18 পাড় বাইয়া উঠি-উঠি মুছা হউ মেঘর ভিতরে হামাই গেলা। তাইন চাল্লিশ দিন, চাল্লিশ রাইত হউ পাড়ো রইলা।