আল্লা পাকর হুকুমে চিঠির আকারে অউ ছহিফা লেখছইন, হজরত ইছা আল-মসীর সাহাবি হজরত হান্নান (রা:)। হজরত ইছায় দুনিয়া থাকি তশরিফ নেওয়ার অনুমান ৫০-৬০ বছর বাদে অউ ছহিফা লেখা অইছে। ইখান অইলো তান লেখা দুছরা চিঠি। ইতা লেখার কালো আল-মসীর বাদ-বাকি হকল সাহাবির মউত অইগেছিল, খালি তাইন জিন্দা আছলা, এরলাগি তান পরিচয় অইগেছে, হউ মুরব্বি নামে।

ই ছহিফার মাজে বেগম ছায়েবানি কইয়া যেন গেছে লেখছইন, এইন আসলে কুনু মানুষ নায়, হউ জমানার এক জমাত। বেগমর আওলাদ বলতে, জমাতর সদইস্য। আর বেগমর বইন, লেখকর এলাকার জমাত। তাইন মুমিন ভাই অকলর গেছে মিনতি কররা, একে-অইন্যে মায়া-মহব্বত করার লাগি। আর ভন্ড মৌলানা অকলর তালিম থাকি হুশিয়ার অওয়ার লাগি কইরা। ইতায় কইতা, হজরত ইছা রক্ত-মাংসর কুনু মানুষ নায়, তাইন খালি রুহ, এরলাগি রক্ত-মাংসর শরিলে আমরা যেকুনু নাপাক কাম করতাম পারি, ইতায় কুনু অসুবিধা নায়, খালি রুহ অইলো দামি। ই ছহিফার ৭ আয়াতো আছে, “যেতায় কইন, মানুষ ছুরতে হজরত ইছা আল-মসী দুনিয়াত আইছইন না, ইলা মাত যেগিয়ে মাতে হে অইলো হউ ধুকাবাজ আর খানে-দর্জাল।”