1 شِ قِرِن نَن نُ لُشِ بٍينُن سَيَمَلٍكّ دَنفِ سَلِ شَ عَ لِ، نَشَن مَن شِلِ قَلَمَ تَامِ لّبِنِتَرٍ سَلِ. سّرّشّدُبّ كُنتِفِيٍ نُن سّرِيّ كَرَ مْشْيٍ نُ نَ قّيرّ قٍنقٍ عٍ شَ عِسَ سُشُ يَنقَنتٍيَ سَابُي رَ، عٍ شَ عَ قَشَ. 2 عٍ نَشَ لَن عَ مَ، «وٌن نَشَ عَ سُشُ سَلِ لْشْي، شَ نَ مُ عَ رَ حَمَ عَ شُنيِ كٍلِمَ نّ.»

3 عِسَ تٌ نُ نَ بٍتَنِ، سِمْن كُنّ كَنيِ شْنيِ، عَ عَ دّفٍقٍ تٍيبِلِ رَ، فِنّ ندٍ نَشَ قَ. نَرَدَ لَبُندّ تُرٍ نُ نَ عَ يِ رَ، نَشَن سَرٍ شْرْشْ كِ قَنيِ. عَ نُ سَشِ عَ بِتِرّ تٌقَنيِ كُي نَشَن نُ رَقَلَشِ عَلَبَتِرَ فّمّ رَ. فِنّ تٌ بِتِرّ دّ رَبِ، عَ نَشَ لَبُندّ تُرٍ سَ عِسَ شُنيِ. 4 كْنْ مِشِ ندٍيٍ نُ نَ نَا، عٍ نَشَ شْنْ، عٍ عَ قَلَ عٍ بٌرٍ بّ، «يِ لَبُندّ تُرٍ مَكَنَشِ يِ مْولِ رَ مُنقٍ رَ؟ 5 شَ عَ سَ مَتِ نّ نُ، عَ سَرٍ نْمَ دَنفِدٍ وَلِكّ شَ حّ كٍرٍن وَلِ سَرٍ رَ، نَ كْبِرِ قَن نْ قِدٍ سٍتَرٍيٍ مَ.» عٍ بْحّ نَشَ تٍ فِنّ شِلِ مَ.

6 كْنْ عِسَ نَشَ عَ مَسٍن، «وٌ يِ فِنّ لُ نَ. وٌ نَ عَ تْورْقٍ مُنقٍ رَ؟ كّوَلِ قَنيِ نَن يِ كِ، عَ نَشَن نَبَشِ ﭑ بّ. 7 سٍتَرٍيٍ لُمَ نّ وٌ يَ مَ تّمُي بِرِن. وٌ نَ وَ عَ شْن مَ تّمُي يٌ، وٌ نْمَ قٍ قَنيِ رَبَدٍ عٍ بّ، كْنْ ﭑ تَن مُ لُمَ وٌ يِ رَ بٍ عَبَدَن شّ. 8 يِ فِنّ نْشِ نَشَن نَ، عَ نَ نَن نَبَشِ. عَ لَبُندّ سَشِ ﭑ مَ ﭑ مَ مَرَفَتّ لْشْي نَن مَ قٍ رَ. 9 ﭑ شَ نْندِ قَلَ وٌ بّ، عَلَ شَ شِبَارُ قَنيِ سَ كَوَندِ مَ دّدّ دُنِحَ بِرِن كُي، يِ فِنّ شَ كّوَلِ شَ قٍ قَن قَلَمَ نّ، مِشِيٍ شَ عٍ رَتُ عَ شَ قٍ مَ.»

10 نَ تّمُي، يُدَ سِ عِسِكَرِيٌتِ، نَشَن نُ نَ عِسَ قْشِرَبِرّ قُ نُن قِرِنيِيٍ يَ مَ، عَ نَشَ سِفَ سّرّشّدُبّ كُنتِفِيٍ يِرٍ، عٍ شَ وْيّن عَلَكٌ عَ شَ عِسَ سَ عٍ بّلّشّ. 11 عٍ تٌ عَ مّ، عٍ نَشَ حّلّشِن كِ قَنيِ رَ، عٍ كْبِرِ لَايِدِ تٌنفٌ عَ بّ. نَ كُي، يُدَ سِ نَشَ سٌ وَشَتِ قٍنقٍ عَ نْمَ عِسَ سَدٍ عٍ بّلّشّ تّمُي نَشّ.

12 تَامِ لّبِنِتَرٍ سَلِ تٌ عَ لِ، عَ لْشْي سِنفٍ، يّشّييْرّ بَمَ سّرّشّ رَ لْشْ نَشّ، عِسَ قْشِرَبِرّيٍ نَشَ عَ مَشْرِن، «عِ وَ مَ مُشُ شَ سَ سَيَمَلٍكّ دَنفِ سَلِ دٌنيِ رَقَلَ عِ بّ مِندٍن؟» 13 عَ نَشَ عَ قْشِرَبِرّ مِشِ قِرِن شّي، عَ عَ قَلَ عٍ بّ، «وٌ سِفَ تَا كُي. وٌ نَرَلَنمَ شّمّ ندٍ رَ، يٍ قّحّ دْشْشِ عَ شُن. وٌ شَ بِرَ عَ قْشْ رَ. 14 عَ نَ سٌ دّننَشّ، وٌ شَ عَ قَلَ نَ بَنشِ كَنيِ بّ، ‹كَرَ مْشْ وَ مَ عَ كٌلٌنقٍ عَ نْمَ سَيَمَلٍكّ دَنفِ سَلِ دٌنيِ دٌندٍ دّننَشّ، عَ تَن نُن عَ قْشِرَبِرّيٍ.› 15 عَ قَمَ بَنشِ كُي شُنفبٍ مَسٍندٍ وٌ بّ كٌورٍ رَ، سٍ بِرِن يَءِلَنشِ نَا عَ قَنيِ رَ. وٌ شَ سَيَمَلٍكّ دَنفِ سَلِ دٌنيِ رَقَلَ مّننِ.» 16 عَ قْشِرَبِرّيٍ نَشَ سِفَ، عٍ سٌ تَا كُي، عٍ قٍ بِرِن لِ عَلْ عِسَ عَ مَسٍن عٍ بّ كِ نَشّ. عٍ نَشَ سَيَمَلٍكّ دَنفِ سَلِ دٌنيِ رَقَلَ.

17 نُنمَرٍ تٌ سٌ، عِسَ نُن عَ قْشِرَبِرّ قُ نُن قِرِنيِيٍ نَشَ قَ. 18 عٍ نُ نَ عٍ دّفٍقٍ تٍيبِلِ رَ تّمُي نَشّ، عِسَ نَشَ عَ مَسٍن، «ﭑ شَ نْندِ قَلَ وٌ بّ، وٌ تَن نَشٍيٍ نَ وٌ دّفٍقٍ ﭑ قّ مَ يِ كِ، مِشِ كٍرٍن نَ وٌ يَ مَ نَشَن قَقٍ ﭑ يَنقَدٍ.» 19 عَ قْشِرَبِرّيٍ نَشَ سُننُن قْلْ، كَنكَن نُ قَ عِسَ مَشْرِن، «ﭑ تَن مُ عَ رَ؟» 20 عِسَ نَشَ عٍ يَابِ، «عَ كَنيِ نَ وٌ تَن مِشِ قُ نُن قِرِنيِيٍ يَ مَ، ﭑ نُن نَشَن بّلّشّ رَفٌرٌ مَ ثَانِ كٍرٍن كُي. 21 عَدَ مَ شَ دِ سِفَمَ نّ عَلْ عَ شَ قٍ سّبّشِ كِ نَشّ، كْنْ فبَلٌي نَن نَ عَدَ مَ شَ دِ يَنقَمَ بّ. عَ قِسَ نَ كَنيِ بّ هَلِ عَ مُ بَرِ نُ.»

22 عٍ تٌ نُ عٍ دّفٍقٍ، عِسَ نَشَ تَامِ تٌنفٌ. عَ تٌ تَنتُي رَ سِفَ عَلَ مَ، عَ نَشَ تَامِ عِفِرَ، عَ عَ سٌ عَ قْشِرَبِرّيٍ يِ رَ، عَ عَ قَلَ عٍ بّ، «وٌ ﭑ كٌ، وٌ عَ دٌن. يِ قِندِشِ ﭑ قَتٍ نَن نَ.» 23 نَ دَنفِ شَنبِ، عِسَ نَشَ تْنبِلِ قَن تٌنفٌ. عَ مَن تٌ تَنتُي رَ سِفَ عَلَ مَ، عَ نَشَ تْنبِلِ سٌ عٍ يِ رَ، عٍ بِرِن نَشَ عَ مِن. 24 عِسَ نَشَ عَ مَسٍن عٍ بّ، «يِ قِندِشِ ﭑ وُلِ نَن نَ، سَاتّ وُلِ نَشَن بَشِ مِشِ فبٍفبٍ بّ. 25 ﭑ شَ نْندِ قَلَ وٌ بّ، ﭑ تٌ يِ وّنِ مِنقٍ يِ كِ، ﭑ مُ يِ مِنمَ سْنْن، هَن وٌن بِرِن مَن سَ عَ مِنمَ لْشْ نَشّ عَلَ شَ مَنفّيَ نِينِ بُن مَ.»

26 عٍ تٌ فّ بّيتِ بَدٍ، عٍ نَشَ تٍ عٌلِوِ فٍيَ قَرِ.

27 عِسَ نَشَ عَ مَسٍن عَ قْشِرَبِرّيٍ بّ، «وٌ بِرِن فبِلٍنمَ نّ ﭑ قْشْ رَ، بَرِ مَ عَ سّبّشِ، ‹ﭑ شُرُ سٍ دّ مَدٌنيِ قَشَمَ نّ، يّشّييٍ قَن يٍنسٍن.› 28 كْنْ ﭑ نَ كٍلِ قَشّ مَ، ﭑ سِفَمَ وٌ يَ رَ فَلِلٍ.»

29 ثِيّرِ نَشَ عَ قَلَ عَ بّ، «هَلِ بِرِن فبِلٍن عِ قْشْ رَ، ﭑ تَن مُ فبِلٍنمَ عِ قْشْ رَ!» 30 عِسَ نَشَ ثِيّرِ يَابِ، «ﭑ شَ نْندِ قَلَ عِ بّ، تٌ كْي يَتِ، بٍينُن كٌنكٌرٍ شَ عَ رَتٍ دّيَ قِرِن، عِ عِ يّتّ رَ سَنمَ نّ ﭑ مَ سَنمَيَ سَشَن.» 31 كْنْ ثِيّرِ نَشَ عَ قَلَ سّنبّ رَ، «هَلِ وٌن بِرِن نَن سَ قَشَمَ، ﭑ مُ ﭑ يّتّ رَ سَنمَ عِ مَ!» عِسَ قْشِرَبِرّ بِرِن نَشَ فبِلٍن نَ وْيّن كٍرٍن قَلَ رَ.

32 نَ دَنفِ شَنبِ عِسَ نُن عَ قْشِرَبِرّيٍ نَشَ سِفَ يِرٍ ندٍ، دّننَشّ شِلِ فٍتٍسٍمَنِ. عِسَ نَشَ عَ قَلَ عٍ بّ، «وٌ دْشْ بٍ. ﭑ تَن شَ سَ عَلَ مَشَندِ.» 33 عَ نَشَ ثِيّرِ، يَكِ، نُن يَيَ شَنِن عَ شُن مَ. حَشَنكَتّ نُن كْنتْقِلِ نَشَ عِسَ بْحّ سُشُ. 34 عَ نَشَ عَ مَسٍن عٍ بّ، «سُننُنيِ بَرَ نْ ﭑ بْحّ رَ عَلْ عَ شَ ﭑ قَشَ. وٌ لُ بٍ، كْنْ وٌ نَشَ شِ.»

35 عِسَ نَشَ عَ مَسِفَ دٌندٌرٌنتِ، عَ عَ يَتَفِ رَقٍلٍن بْشِ مَ، عَ عَلَ مَشَندِ نَ وَشَتِ شَ مَكُيَ عَ رَ، شَ نَ سَ نْمَ رَبَدٍ. 36 عَ نَشَ عَلَ مَشَندِ، «ﭑ بَبَ، عِ نْمَ قٍ بِرِن نَ. عِ شَ ﭑ نَتَنفَ يِ حَشَنكَتّ مَ. كْنْ ﭑ سَفٌ نَشَ رَبَ، عِ تَن نَن سَفٌ شَ رَبَ.» 37 عَ تٌ فبِلٍن عَ قْشِرَبِرّيٍ يِرٍ، عَ نَشَ عٍ لِ عٍ نَ شِقٍ. عَ نَشَ عَ قَلَ ثِيّرِ بّ، «سِمْن، عِ شِقٍ نّ يِ كِ؟ عِ مُ نْشِ وَشَتِ كٍرٍن شِ شْلِ كَنَدٍ ﭑ مَ قٍ رَ؟ 38 وٌ نَشَ شِ. وٌ عَلَ مَشَندِ نّ عَلَكٌ وٌ نَشَ بِرَ تَنتَنيِ كُي. مَحْشُن قَنيِ نَ عَدَ مَ بّ، كْنْ عَ قَتٍ بّندّ تَن سّنبّ مُ نَ.»

39 عِسَ مَن تٌ عَ مَسِفَ عٍ رَ، عَ مَن نَشَ عَلَ مَشَندِ نَ مَشَندِ كٍرٍنيِ رَ. 40 عَ تٌ فبِلٍن عَ قْشِرَبِرّيٍ يِرٍ، عَ مَن نَشَ عٍ لِ عٍ شِقٍ، بَرِ مَ شِ شْلِ نُ بَرَ نْ عٍ رَ. يَابِ يٌ مُ نُ عٍ يِ عِسَ بّ.

41 عِسَ مَن تٌ فبِلٍن عٍ يِرٍ عَ سَنمَيَ سَشَن ندٍ، عَ نَشَ عَ قَلَ عٍ بّ، «وٌ شِقٍ نّ؟ وٌ نَ وٌ مَلَبُقٍ هَن يَ؟ عَ تَن نَن نَ كِ، وَشَتِ بَرَ عَ لِ. عَدَ مَ شَ دِ قَقٍ سَدٍ يُنُبِتْييٍ بّلّشّ. 42 وٌ كٍلِ، وٌن شّي. وٌ عَ مَتٌ، ﭑ يَنقَمَ بَرَ قَ.»

43 عِسَ حَن مُ نُ فّشِ وْيّندٍ، يُدَ سِ، نَشَن نُ نَ عَ قْشِرَبِرّ قُ نُن قِرِنيِيٍ يَ مَ، عَ نَشَ قَ كٍرٍن نَ عٍ نُن حَمَ، سَنتِدّفّمَ نُن فبٍنفبٍتَ سُشُشِ عٍ يِ رَ. سّرّشّدُبّ كُنتِفِيٍ، سّرِيّ كَرَ مْشْيٍ، نُن يُوِقِيٍ شَ قٌرِيٍ نَن نُ عٍ شّيشِ. 44 عِسَ يَنقَمَ نُن نَ حَمَ نُ بَرَ لَن عَ مَ، عَ شَ عِسَ مَتْنشُمَ عٍ بّ. عَ نُ بَرَ عَ قَلَ عٍ بّ، «ﭑ نَ مِشِ نَشَن سُنبُ، عَ تَن نَن نَ كِ. وٌ عَ سُشُ، وٌ عَ شَنِن، وٌ عَ كَنتَ.» 45 يُدَ سِ قّقّ قَ، عَ نَشَ عَ مَسٌ عِسَ رَ، عَ عَ قَلَ عَ بّ، «كَرَ مْشْ،» عَ قَ عَ سُنبُ. 46 نَ كُي، حَمَ نَشَ عِسَ سُشُ.

47 مِشِ ندٍ نُ تِشِ نَا، عَ نَشَ عَ شَ سَنتِدّفّمَ رَ مِنِ، عَ سّرّشّدُبّ كُنتِفِ شَ كٌنيِ تُلِ بٌلٌن. 48 عِسَ نَشَ عَ مَسٍن عٍ بّ، «وٌ تٌ مِنِشِ ﭑ شِلِ مَ سَنتِدّفّمَ نُن فبٍنفبٍتَ سُشُشِ وٌ يِ رَ، سُوتٍ نَن نَ ﭑ نَ؟ 49 لْشْ يٌ لْشْ، ﭑ نُ نَ وٌ يَ مَ، ﭑ نُ كَوَندِ تِ هْرْ مْبَنشِ كُي، وٌ مُ ﭑ سُشُ. كْنْ نَشَن سّبّشِ كِتَابُي كُي، قٌ عَ شَ كَمَلِ.» 50 نَ شَنبِ، عِسَ قْشِرَبِرّيٍ بِرِن نَشَ عٍ فِ عَ شُن مَ.

51 سّفّتَلَ ندٍ قَن نُ نَ نَشَن نُ بِرَشِ عِسَ قْشْ رَ، دُفِ نَن فبَنسَن نُ قٍلٍنشِ عَ مَ. عٍ نَشَ عَ سُشُ، 52 كْنْ عَ نَشَ مِنِ عَ شَ دُفِ كُي، عَ عَ فِ عَ مَفٍلِ رَ.

53 عٍ نَشَ عِسَ شَنِن سّرّشّدُبّ كُنتِفِيٍ شُنيِ شْن. سّرّشّدُبّيٍ كُنتِفِيٍ، يُوِقِيٍ شَ قٌرِيٍ، نُن سّرِيّ كَرَ مْشْ بِرِن نُ مَلَنشِ نَا. 54 ثِيّرِ نُ بَرَ بِرَ عِسَ قْشْ رَ، كْنْ عَ مُ نُ عَ مَكْرّ مَ عَ فبٍ رَ. عَ نَشَ بِرَ عَ قْشْ رَ هَن عَ سٌ سّرّشّدُبّ كُنتِفِيٍ شُنيِ شَ تّتّ كُي. عٍ نُن هْرْ مْبَنشِ كَنتَمَيٍ نَشَ دْشْ تّ رَ، عٍ نُ قَ عٍ مَشَرَ. 55 سّرّشّدُبّ كُنتِفِيٍ نُن يُوِقِيٍ شَ كِيتِسَ دْنشْي بِرِن، عٍ نُ سٍيدٍ قٍنقٍ عِسَ شِلِ مَ، عَلَكٌ عٍ شَ عَ قَشَ، كْنْ عٍ مُ سٍ تٌ. 56 مِشِ فبٍفبٍ نَشَ قَ عِسَ تْوحّفّدٍ، كْنْ عٍ شَ وُلٍيٍ مُ نُ لَنمَ عٍ بٌورٍ مَ. 57 مِشِ ندٍيٍ تٌ كٍلِ وُلٍ سٍيدٍ بَدٍ عَ شِلِ مَ، عٍ نَشَ عَ قَلَ، 58 «مُشُ عَ شُي مّشِ نّ، عَ عَ قَلَمَ، ‹ﭑ يِ هْرْ مْبَنشِ رَبِرَ مَ نّ، عَدَ مَ بّلّشّ نَشَن تِشِ، ﭑ فبّتّ تِ شِ سَشَن بُن مَ، نَشَن مُ تِشِ عَدَ مَ بّلّشّ رَ.›» 59 كْنْ هَلِ نَ وْيّنيِ كُي، عٍ شَ سٍيدٍحْشْيَ مُ نُ لَنشِ عَ بٌورٍ مَ.

60 نَ كُي، سّرّشّدُبّ كُنتِفِيٍ شُنيِ نَشَ كٍلِ حَمَ تَفِ، عَ عِسَ مَشْرِن، «ثٍ، عِ مُ عٍ يَابِمَ؟ يِ شّمّيٍ مُنسٍ سَقٍ عِ شُن مَ يِ كِ؟» 61 كْنْ عِسَ مُ يَابِ يٌ قِ، عَ مُ سٍسٍ قَلَ. سّرّشّدُبّ كُنتِفِ شُنيِ مَن نَشَ عَ مَشْرِن، «عِ تَن نَن نَ عَلَ شَ مِشِ سُفَندِشِ رَ، بَتُ مَنفّ شَ دِ؟» 62 عِسَ نَشَ عَ مَسٍن، «ﭑ تَن نَن نَ عَ رَ. وٌ قَمَ عَدَ مَ شَ دِ تٌدٍ، عَ دْشْشِ عَلَ سّنبّمَ يِرٍقَنيِ مَ، وٌ عَ تٌ قَقٍ رَ نُشُييٍ كُي.»

63 نَ كُي، سّرّشّدُبّ كُنتِفِ نَشَ عَ يّتّ شَ دٌنمَ سُشُ، عَ عِبْو شْنّ رَ، عَ عَ قَلَ، «وٌن هَيِ نَ سٍيدٍ فبّتّيٍ مَ يِرٍ؟ 64 وٌ بَرَ عَ مّ عَ عَلَ مَبّشُشِ كِ نَشّ! وٌ كِيتِ تٌشِ دِ؟» عٍ بِرِن نَشَ عَ قَلَ عَ لَنمَ عَ شَ قَشَ نّ. 65 ندٍيٍ نَشَ دّيٍ بْشُن قْلْ عَ مَ. عٍ نَشَ عَ يَ مَشِرِ، عٍ نُ عَ مَدِن، عٍ نُ قَ عَ قَلَ عَ بّ، «نَمِحْنمّحَ رَبَ! عَ قَلَ بَ، نَشَن عِ بْنبْشِ!» عَ تٌ سَ كْسِبِلِيٍ بّلّشّ، نٍيٍ قَن نَشَ عَ بْنبْ.

66 ثِيّرِ نُ نَ تّتّ كُي تّمُي نَشّ لَنبَنيِ، سّرّشّدُبّ كُنتِفِيٍ شُنيِ شَ كٌنيِ فِنّ كٍرٍن نَشَ قَ. 67 عَ تٌ ثِيّرِ تٌ، عَ عَ مَشَرَقٍ تّ رَ، عَ نَشَ عَ عِفبّ، عَ عَ قَلَ، «عِ تَن، وٌ نُن عِسَ نَسَرّتِكَ بِرِن نَن نُ عَ رَ.» 68 ثِيّرِ نَشَ عَ مَتَندِ، عَ عَ قَلَ، «ﭑ مُ عَ كٌلٌن عِ نَ قٍقٍ قَلَقٍ!» عَ نَشَ مِنِ تّتّ كُي. 69 كْنْ كٌنيِ فِنّ مَن تٌ عَ تٌ، عَ مَن نَشَ وْيّن قْلْ مِشِيٍ بّ نَشٍيٍ نُ نَ نَا، «عَ شَ مِشِ ندٍ نَن يَ.» 70 ثِيّرِ مَن نَشَ عَ مَتَندِ. عَ مُ بُ، نَشٍيٍ نُ نَ نَا، عٍ مَن نَشَ عَ قَلَ ثِيّرِ بّ، «نْندِ نَ عَ رَ، عَ تَن مِشِ ندٍ نَن يَتِ عِ رَ، بَرِ مَ فَلِلٍكَ نَن عِ رَ.» 71 كْنْ ثِيّرِ نَشَ سٌ عَ كَلِقٍ، عَ عَ قَلَ «عَلَ شَ ﭑ دَنكَ! وٌ يِ شّمّ نَشَن مَ قٍ قَلَقٍ، ﭑ تَن مُ عَ كٌلٌن قٍوٌ!» 72 كٌنكٌرٍ نَشَ عَ رَتٍ كٍرٍن نَ عَ دّيَ قِرِن ندٍ. ثِيّرِ نَشَ رَتُ قَ عِسَ شَ وْيّنيِ مَ عَ بّ، «بٍيمَنُن كٌنكٌرٍ شَ عَ رَتٍ دّيَ قِرِن، عِ عِ يّتّ رَ سَنمَ نّ ﭑ مَ سَنمَيَ سَشَن.» نَ كُي، عَ نَشَ سٌ وَقٍ.