1 ﭑ تَن يُدٍ نَن يِ كِ، عَلَ شَ مِشِ سُفَندِشِ عِسَ شَ كٌنيِ، نُن يَكِ نفَشَكٍرٍنمَ. ﭑ نَ يِ بَتَاشّ سّبّقٍ مِشِيٍ نَن مَ، بَبَ عَلَ نَشٍيٍ شِلِشِ، عَ نَشٍيٍ شَنُشِ، نُن عَلَ شَ مِشِ سُفَندِشِ عِسَ نَشٍيٍ مَكَنتَشِ. 2 عَلَ شَ كِنِكِنِ، بْحّسَ، نُن شَنُنتٍيَ فبٌ وٌ يِ.

3 ﭑ شَنُنتٍنيِيٍ، ﭑ بَرَ وَ بَتَاشّ سّبّقٍ وٌ مَ وٌن مَ كِسِ شَ قٍ رَ. ﭑ بَرَ وَ نَ رَبَقٍ عَلَكٌ ﭑ شَ وٌ رَلِمَنِيَ، وٌ شَ فٍرٍ سٌ وٌن مَ دَنشَنِيَ شَ قٍ رَ، نَشَن حَن بَرَ فّ مَسٍندٍ كٍرٍنيِ رَ سّنِيّنتْييٍ بّ. 4 مِشِ ندٍيٍ بَرَ سٌ وٌ تَفِ، نَشٍيٍ شَ حَشَنكَتّ حَن بَرَ سّبّ عَ رَكُيَ. كَاقِرِيٍ نَن عٍ رَ، نَشٍيٍ وٌن مَرِفِ عَلَ شَ هِننّ مَقِندِ مَ، عَلَكٌ عٍ شَ لُ قٍ حَاشِيٍ كُي، عٍ شَ عٍ كٌبٍ رَ سٌ وٌن كَرَ مْشْ كٍرٍنيِ رَ، وٌن مَرِفِ عِسَ، عَلَ شَ مِشِ سُفَندِشِ.

5 هَلِ وٌ عَ كٌلٌن، ﭑ وَ مَ وٌ رَتُقٍ قٍ دَنفِشِ ندٍيٍ نَن مَ. مَرِفِ تٌ فّ عِسِرَيِلَ حَمَ رَ مِنِدٍ مِسِرَ بْشِ مَ، عَ نَشَ عِسِرَيِلَكَ دَنشَنِيَتَرٍيٍ سْنتْ. 6 مَلٍكّ ندٍيٍ قَن تٌ عٍ يّتّ لُ بِنيّتَرٍحَ كُي، عٍ عٍ شْنيِ بّحِن، عَلَ نَشَ عٍ رَ سٌ فٍيلِ كُي، عٍ شَ لُ دِ مِ كُي هَن كِيتِ شُنفبٍ سَ لْشْي. 7 سٌدٌ مَ نُن فٌمٌرَ، عَ نُن عٍ رَبِلِنيِ، عٍ تٌ عٍ يّتّ رَقِ قٍ حَاشِيٍ مَ، عٍ نُن عٍ بٌورٍ نُ كَقُ مْولِ ندٍ رَ نَشَن مُ لَنمَ عَدَ مَدِيٍ تَفِ، عَلَ نَشَ عٍ قِندِ مِسَالِ رَ، عَ عٍ رَ سٌ تّ شْورَ نَشَن مُ شُبٍنمَ عَبَدَن.

8 كْنْ نَ مِشِ نَشٍيٍ بَرَ سٌ وٌ تَفِ، عٍ لَامَتُنيِ ندٍيٍ تٌمَ نَشٍيٍ عَ نِيَ عٍ شَ سّنِيّنتَرٍحَ رَبَ، عٍ مَرِفِ شَ يَامَرِ مَتَندِ، عٍ مَلٍكّيٍ كٌنبِ. 9 مَلٍكّ مَنفّ مِنكَيِلُ تٌ وْيّن عِبُلِسَ بّ عَننَبِ مُنسَ قُرٍ شَ قٍ رَ، مِنكَيِلُ مُ سُو سَ عِبُلِسَ شَ وْيّنيِ يَابِدٍ كٌنبِ رَ. عَ عَ قَلَ نّ فبَنسَن، «عَلَ شَ عِ مَكِيتِ.» 10 كْنْ نَ مِشِيٍ كٌنبِ تِمَ قٍ ندٍ شَ قٍ رَ، عٍ مُ نَشَن كٌلٌن. عٍ نَشَن كٌلٌن عٍ يّتّ رَ، عَ وُلَ سُبٍ شَشِلِتَرٍيٍ دَاشِ، نَ قَن مُ قِندِ سٍسٍ رَ قٌ عٍ كَنَسٍ. 11 حَشَنكَتّ نَ عٍ بّ. عٍ بَرَ بِرَ كَبِلَ شَ مِسَالِ قْشْ رَ. عٍ بَرَ بِرَ كْبِرِ قْشْ رَ عَلْ بَلَمِ، عٍ قَ لْي. عٍ بَرَ مَتَندِ تِ عَلْ كٌرَ، عٍ شُن قَ رَكَنَ.

12 نَ مِشِيٍ بَرَ وٌ شَ نفَشَكٍرٍنيَ مَلَنيِيٍ مَنْشْ. عٍ عٍ دّفٍمَ وٌ يَ مَ، عٍ مّينِمَ عٍ يّتّ نَن فبَنسَن مَ، عٍ مُ يَافِمَ. عٍ لُشِ عَلْ نُشُييٍ، قٌيٍ نَشٍيٍ رَحّرّ مَ، كْنْ عٍ مُ قَمَ تُنّ رَ. عٍ لُشِ عَلْ سَنسِ نَشٍيٍ مُ بٌفِ رَ مِنِمَ عٍ بٌفِ تّمُي. عٍ تٌ تَلَ، عٍ بَرَ قَشَ سَنمَيَ قِرِن. 13 عٍ لُشِ عَلْ بَا مْرْنيِيٍ نَشٍيٍ شُنقّ رَ مِنِمَ. نَ شُنقّ مِسَالِشِ نَ مِشِيٍ شَ قٍ حَاشِيٍ نَن نَ. عٍ لُشِ عَلْ تُنبُي نَشٍيٍ رَفَتَشِ كٌورٍ مَ، عٍ نُ لِنتَن دِ مِ كُي عَبَدَن.

14 عٍنٌكِ، عَدَ مَ تٌلٌبِتّ سٌلٌقٍرٍ ندٍ، نَشَ يِ مَسٍنيِ قَلَ عَلَ شِلِ رَ عٍ شَ قٍ رَ، «مَرِفِ نَ قَقٍ، عَ نُن عَ شَ سّنِيّنتْي وُلُ وُلُ، 15 عَلَكٌ عَ شَ عَدَ مَدِ بِرِن مَكِيتِ. كَاقِرِيٍ شَ مَكِيتِ عٍ شَ قٍ حَاشِ رَبَشِيٍ مَ. كَاقِرِيٍ شَ مَكِيتِ عٍ شَ كٌنبِيٍ شَ قٍ رَ، عٍ نَشَن قَلَمَ مَرِفِ شُن مَ.» 16 نَ مِشِ مْولِيٍ لُمَ نّ سْنشْ رَ، عٍ مُ حّلّشِنمَ، عٍ بِرَ مَ عٍ يّتّ وَشْنقٍ نَن تُن قْشْ رَ، عٍ دّ عِفبٌ، عٍ مِشِ مَدَشُمَ وْيّنيِ حْشُنمّ رَ عَلَكٌ عٍ شَ سٍ سْتْ.

17 كْنْ وٌ تَن، ﭑ شَنُنتٍنيِيٍ، وٌ شَ رَتُ وٌن مَرِفِ عِسَ شَ شّيرَيٍ شَ مَسٍنيِيٍ مَ. 18 عٍ نُ بَرَ عَ قَلَ وٌ بّ، «وَشَتِ دْنشْي، مِشِيٍ قَمَ نّ يٌدٍ عَلَ مَ، عٍ بِرَ عٍ وَشْنقٍ تِنشِنتَرٍيٍ قْشْ رَ.» 19 نَ مِشِ مْولِيٍ نَ وٌ تَفِ. عٍ وٌ شَ لَنيِ كَنَمَ نّ. عٍ بِرَ مَ عٍ يّتّ شَشِلِ نَن قْشْ رَ. عَلَ شَشِلِ سّنِيّنشِ مُ نَ عٍ بْحّ عِ.

20 كْنْ وٌ تَن، ﭑ شَنُنتٍنيِيٍ، وٌ شَ وٌ شَ دَنشَنِيَ سّنِيّنشِ رَ سَبَتِ. وٌ شَ عَلَ مَشَندِ عَ شَشِلِ سّنِيّنشِ سَابُي رَ. 21 وٌ شَ لُ عَلَ شَ شَنُنتٍيَ بُن مَ، عَلَكٌ وٌ مَرِفِ عِسَ، عَلَ شَ مِشِ سُفَندِشِ، شَ كِنِكِنِ وٌ مَ، عَ شَ وٌ رَكِسِ. 22 وٌ شَ كِنِكِنِ مِشِيٍ مَ نَشٍيٍ سِيكّشِ، 23 وٌ شَ عٍ رَتَنفَ تّ مَ. وٌ مَن شَ كِنِكِنِ بٌورٍيٍ قَن مَ فَاشُي كُي، كْنْ وٌ شَ مّينِ وٌ يّتّ مَ عٍ يَ مَ، عَلَكٌ وٌ قَن نَشَ قَ وٌ يّتّ قِندِ سّنِيّنتَرٍيٍ رَ.

24 عَلَ تَنتُ، نَشَن نْمَ وٌن نَكِسِدٍ وٌن مَ يُنُبِ بِرِن مَ، نَشَن نْمَ وٌن مَسٍندٍ سّنِيّنيِ نُن سّيوّ رَ عَ شَ نْرّ كُي. 25 عَلَ تَنتُ، نَشَن قِرِن ندٍ مُ نَ، نَشَن بَرَ وٌن نَكِسِ عَ شَ مِشِ سُفَندِشِ عِسَ سَابُي رَ. نْرّ، شُننَكٍلِ، سّنبّ، نُن نْي نَ عَ بّ بٍينُن دُنِحَ شَ قْلْ، يَكْسِ، نُن وَشَتِ نَشَن سَ قَمَ عَبَدَن. عَمِنَ.