يِ كِتَابُي قِندِشِ بَتَاشّ نَن نَ عَلَ شَ شّيرَ ثْلُ نَشَن سّبّ دَنشَنِيَتْي حَمَ مَ، نَشٍيٍ نُ سَبَتِشِ فَلَتِ بْشِ مَ. تّمُي دَنفِشِ، ثْلُ نُ بَرَ كَوَندِ تِ نَا، عَلَكٌ مِشِيٍ شَ دَنشَنِيَ عِسَ مَ. نَ بِرِن سّبّشِ عِسَ شَ شّيرَيٍ شَ تَرُشُي كُي، سٌرَ ١٣ نُن ١٤.

عِسَ شَ وَلِ تٌ قْلْ عِسِرَيِلَ بْشِ مَ، دَنشَنِيَتْي سِنفٍيٍ يُوِقِيٍ نَن نُ فبٌ عٍ يَ مَ. يُوِقِ شِلِ بَ، عِسِرَيِلَ شِلِ بَ، بْنسْي كٍرٍن نَن شِلِ عَ رَ. عٍ نَشَ لَ عَ رَ عَ عِسَ نَن قِندِشِ عَلَ شَ مِشِ سُفَندِشِ رَ، عٍ شَ نَمِحْنمّيٍ نَشَن شَ قٍ مَسٍن عٍ شَ كِتَابُي كُي. عٍ مُ عِسَ شَ سّرِيّ تٌنفٌشِ عَلْ دِينّ نّينّ، بَرِ مَ عٍ عَ تٌشِ كِ نَشّ، عِسَ شَ سّرِيّ بَرَ يُوِقِيٍ شَ دِينّ رَكَمَلِ، عَلْ عَلَ نُ بَرَ عَ مَسٍن كِ نَشّ. نَ كُي، عٍ تٌ قِندِ عِسَيَنكَيٍ رَ، عٍ مُ عٍ شَ دِينّ سّرِيّ رَبّحِن نَشَن نُ سّبّشِ تَوُرٍتَ مُنسَ نُن يَبُرَ دَوُدَ كُي. عٍ نَشَ عِسَ شَ سّرِيّ سَ سّرِيّ بٌورٍ قَرِ.

نَ سٍسٍ مُ نُ قِندِشِ قٍ شْرْشْي رَ نَ كَوَندِ نُ تِمَ تّمُي نَشّ يُوِقِيٍ نَن فبَنسَن بّ، كْنْ عِسَ شَ شّيرَيٍ تٌ نَ مَسٍنيِ كَوَندِ سِ فبّتّيٍ بّ، قٍ ندٍيٍ نَشَ مِنِ. سِ فبّتّيٍ تَن تٌ قِندِ عِسَيَنكَيٍ رَ، عٍ تَن مُ نُ تِنشِ يُوِقِيٍ شَ نَامُنيِيٍ شَ سَ عِسَ شَ سّرِيّ قَرِ، بَرِ مَ عِسَ شَ سّرِيّ نُ بَرَ عٍ وَ سَ.

نَ كُي، يُوِقِ عِسَيَنكَ ندٍيٍ نَشَ سِ فبّتّ عِسَيَنكَيٍ شِلِ كَنَ عٍ شَ سُننَتَرٍيَ شَ قٍ رَ. عٍ نَشَ عَ قَلَ عَ عِسَيَنكَ نَشَن مُ سُننَشِ، عَ مُ فّشِ كِسِ سْتْدٍ. ثْلُ تٌ نَ شَشِلِ مّ، عَ نَشَ نَ قٍ مَتَندِ، عَ قَلَقٍ رَ شَ كِسِ سْتْمَ عِسَ شَ سّرّشّ سَابُي نَن نَ، مِشِ هَيِ مُ نَ سُننّ مَ كِسِ شَ قٍ رَ. عَ مُ عَ قَلَ سُننّ مُ قَن. عَ عَ قَلَ نّ سُننّ، شَ نَ مُ عَ رَ يَامَرِ فبّتّ، عَ مُ نْمَ مِشِ رَكِسِدٍ. عِسَ شَ سّرّشّ نَن فبَنسَن نْمَ نَ رَبَدٍ.

نَ فَلَنبُي نَشَن سٌ يُوِقِ عِسَيَنكَيٍ نُن سِ فبّتّيٍ عِسَيَنكَيٍ تَفِ، عَ نْمَ شَشِلِ فبٍفبٍ قِدٍ وٌن قَن مَ. دِينّ قٍيٍ نَ نَ، عَ لَنمَ وٌن شَ نَشٍيٍ رَبَ، كْنْ عٍ مُ وٌن نَكِسِمَ. نَامُنيِ ندٍيٍ نَ نَ، وٌن نْمَ نَشٍيٍ رَبَدٍ، كْنْ عَ مُ لَنمَ وٌن شَ عٍ قِندِ تٍكُ رَ كِسِ شَ قٍ رَ. نَ بِرِن تَفِ رَ سَقٍ ندٍدِ شْرْشْ، كْنْ عَلَ شَ كِتَابُييٍ نْمَ لْننِ قِدٍ وٌن مَ نٍيٍ شَ قٍ رَ.

بَقٍ نَ قٍ رَ، عَننَبِ ثْلُ شَ كِتَابُي فَلَتِ دَنشَنِيَتْييٍ بّ، عَ مَن دَنشَنِيَتْي حّرّ كِ مَسٍنمَ وٌن بّ. شَنُنتٍيَ نَن قِندِشِ عِسَيَنكَيٍ شَ يَامَرِ سِنفٍ رَ. عَلَ شَشِلِ سّنِيّنشِ، نَشَن سَبَتِشِ دَنشَنِيَتْي بْحّ كُي، نَ نَن عَ رَحّرّ مَ عَلَ شَ كِرَ شْن مَ. نَ تِدٍ فبٌ، بَرِ مَ شَ نَ مُ عَ رَ سٍنتَنّ قٍ بِرِن نَبَمَ نّ عَلَكٌ عَ شَ عَ رَحّرّ كِرَ فبّتّ شْن مَ، نَشَن قِندِشِ يُنُبِ كِرَ رَ. عَلَ شَ وٌن نَتَنفَ نَ مَ. عَمِنَ.