1 يٌسِيَ حّ سٌلٌمَسَشَن نَن نُ عَ رَ، عَ قِندِ مَنفّ رَ تّمُي نَشّ. عَ نَشَ مَنفّيَ حّ تٌنفٌ سَشَن نُن كٍرٍن نَبَ دَرِ سَلَمُ. عَ نفَ نُ شِلِ نّ يٍدِدَ، عَدَيَ نَشَن بَرِ بْسِكَتِ بّ. 2 عَ نَشَ قٍ رَبَ نَشَن نَقَن عَلَتَلَ مَ، عَ عَ حّرّ عَ بٍنبَ دَوُدَ شَ كِرَ شْن مَ. عَ مُ بَ نَ كِرَ مَ قٍقٍ مَ.

3 يٌسِيَ شَ مَنفّيَ حّ قُ نُن سٌلٌمَسَشَن ندٍ رَ، عَ نَشَ عَسَلِيَ شَ دِ، مٍسُلَمَ قَن شَ مَمَدِ سَقَن سّبّلِتِ شّي عَلَتَلَ شَ بَنشِ، يِ يَامَرِ رَ؛ 4 «سِفَ سّرّشّدُبّ شُنفبٍ شِلِكِيَ يِرٍ، عَ شَ كْبِرِ كْنتِ حَمَ قَشِ نَشَن نَ عَلَتَلَ شَ بَنشِ نَادّ كَنتّيٍ شْن مَ. 5 عَ شَ سٌ وَلِكّ شُنيِيٍ يِ رَ، نَشٍيٍ حْشْ سَشِ عَلَتَلَ شَ بَنشِ يَءِلَنقٍ شْن مَ. عٍ شَ عَ سٌ وَلِكّيٍ يِ رَ نَشٍيٍ نَ يِرٍ بُلَشِيٍ يَءِلَنقٍ بَنشِ شَلّ مَ، 6 نُن شَبُييٍ، بَنشِتِيٍ يِ رَ. عَ مَن شَ قِندِ وُرِ نُن فّمّ سَرٍ رَ، وَلِكّيٍ هَيِ نَ نَشَن مَ عَلَتَلَ شَ بَنشِ شَ قٍ رَ. 7 كْنْ عٍ نَشَ نَ كْبِرِ رَوَلِ كِ مَشْرِن عٍ مَ دٍ، بَرِ مَ مِشِ تِنشِنشِيٍ نَن عٍ رَ.»

8 نَ تّمُي سّرّشّدُبّ شُنفبٍ شِلِكِيَ نَشَ عَ قَلَ سَقَن سّبّلِتِ بّ، «ﭑ بَرَ وٌن مَ سّرِيّ كِتَابُي تٌ عَلَتَلَ شَ بَنشِ كُي!» شِلِكِيَ نَشَ عَ سٌ سَقَن يِ رَ، سَقَن نَشَ عَ شَرَن قْلْ عَ شُي عِتٍشِ رَ. 9 نَ دَنفِ شَنبِ، عَ نَشَ سِفَ مَنفّ يِرٍ، عَ دّنتّفّ سَ مَنفّ بّ عَ قَلَقٍ رَ، «كْبِرِ نَشَن نُ نَ عَلَتَلَ شَ بَنشِ كُي، عِ شَ وَلِكّيٍ بَرَ نَ سٌ وَلِكّ شُنيِيٍ يِ رَ نَشٍيٍ حْشْ سَشِ عَلَتَلَ شَ بَنشِ يَءِلَنقٍ شْن مَ.» 10 عَ نَشَ يِ مَسٍنيِ قَن سَ نَ قَرِ، عَ نَشّ، «سّرّشّدُبّ شِلِكِيَ بَرَ كِتَابُي ندٍ سٌ ﭑ يِ رَ.» سَقَن نَشَ عَ شَرَن مَنفّ بّ عَ شُي عِتٍشِ رَ.

11 مَنفّ تٌ سّرِيّ كِتَابُي شَ مَسٍنيِ مّ، عَ نَشَ عَ شَ سٌسٍيٍ عِبْو سُننُنيِ كُي. 12 عَ نَشَ سّرّشّدُبّ شِلِكِيَ، سَقَن شَ دِ عَشِكَمَ، مِكٍ شَ دِ عَكِبٌرِ، سَقَن سّبّلِتِ، نُن مَنفّ رَ سِمَ عَسَيَ يَمَرِ، 13 «وٌ سِفَ عَلَتَلَ مَشْرِن ﭑ تَن نُن يُدَيَ حَمَ بّ يِ كِتَابُي شَ مَسٍنيِ وَ مَ نَشَن قَلَقٍ وٌن بّ، وٌن نَشَن تٌشِ. عَلَتَلَ شَ شْنّ بَرَ فبٌ. عَ شْنْشِ وٌن مَ، بَرِ مَ وٌن بَبَيٍ مُ تِن بِرَدٍ يِ كِتَابُي شُي قْشْ رَ، عٍ مُ حّرّ كِرَ شْن مَ، نَشَن سّبّشِ نَ كِتَابُي كُي.»

14 سّرّشّدُبّ شِلِكِيَ، عَشِكَمَ، عَكِبٌرِ، سَقَن، نُن عَسَيَ نَشَ سِفَ نَمِحْنمّ فِنّ شُلِدَ يِرٍ، سَلُمُ شَ فِنّ، تِكِقَ شَ دِ، شَرَشَسِ شَ مَمَدِ. نَ فِنّ نُ سَبَتِشِ دَرِ سَلَمُ تَا نّينّ نَن كُي، عَ نُ مّينِمَ مَنفّ شَ سٌسٍيٍ مَ. شّيرَيٍ تٌ دّنتّفّ سَ نَ فِنّ بّ، 15 عَ نَشَ عٍ يَابِ، «عِسِرَيِلَ مَرِفِ عَلَتَلَ شَ مَسٍنيِ نَن يَ؛ ‹وٌ عَ قَلَ وٌ شّيمَ بّ، 16 عَ عَلَتَلَ نَشّ عَ ﭑ فبَلٌي رَفٌرٌ مَ نّ يِ بْشِ نُن عَ شَ مِشِيٍ مَ، عَلْ يُدَيَ مَنفّ عَ شَرَنشِ يِ كِتَابُي كُي كِ نَشّ. 17 عٍ تٌ بَرَ ﭑ نَبٌلٌ، عٍ نُ سُرَيِ فَن عَلَ فبّتّيٍ بّ عٍ نَشٍيٍ يَءِلَنشِ عٍ يّتّ بّلّشّيٍ رَ، ﭑ بْحّ بَرَ تٍ يِ يِرٍ شِلِ مَ. عَ لُشِ عَلْ تّ نَشَن مُ شُبٍنمَ مُكُ!› 18 كْنْ وٌ عَ قَلَ يُدَيَ مَنفّ بّ، نَشَن وٌ شّيشِ بٍ عَلَتَلَ مَشْرِندٍ، وٌ نَشّ، ‹عِسِرَيِلَ مَرِفِ عَلَتَلَ شَ مَسٍنيِ نَن يَ؛ 19 عِ تَن يٌسِيَ تٌ فَاشُ ﭑ يَ رَ عِ عِ يّتّ مَفٌرٌ ﭑ تَن عَلَتَلَ بّ ﭑ مَ مَسٍنيِ شَ قٍ رَ يِ بْشِ نُن عَ شَ مِشِيٍ شِلِ مَ، ﭑ بَرَ عِ شَ مَشَندِ سُشُ. عِ تٌ عِ شَ سٌسٍيٍ عِبْو سُننُنيِ كُي، عِ قَ وَ ﭑ يَ عِ، ﭑ بَرَ عِ شُي مّ. عَلَتَلَ شَ مَسٍنيِ نَن نَ كِ. 20 نَ شَ قٍ رَ، عِ رَفَتَمَ نّ عِ بٍنبَيٍ قّ مَ بْحّسَ كُي. عِ يَيٍ مُ قَمَ فبَلٌي بِرِن تٌدٍ، ﭑ نَشٍيٍ رَفٌرٌ مَ يِ يِرٍ مَ.›» نَ دَنفِ شَنبِ، نَ شّيرَيٍ نَشَ نَ مَسٍنيِ دّنتّفّ مَنفّ بّ.