Ala xa masenyi Annabi Esayi bɛ
Masenyi nde yi Kitaabui xa fe ra
Annabi Esayi xa kitaabui findixi masenyi belebele nan na duniɲa birin bɛ. Alatala a xilixi nɛ, a xa Yudaya mangɛe Osiyasi, Yotami, Axasi, nun Xesekiya mali a sago kolonde. Mangɛ ndee nu birama kuyee fɔxɔ ra, ndee nu e yɛtɛ taxuma mangɛ booree ra naxee sɛnbɛ gbo e bɛ. Na birin kui Annabi Esayi naxa a masen e bɛ, a Alatala gbansan nan nɔma mixi malide. Kuye tan findixi wuri sɛnbɛtare nan na. Duniɲa mangɛe fan findixi ibunadama gbansan nan na, naxee mu nɔma sese ra Ala xa maragiri ya ra. Alatala nan findixi duniɲa mangɛ sɛniyɛnxi ra.
Isirayila bɔnsɔɛ fu nun firinyi nu fatanxi mangɛya firin nan na. Naxan nu na kɔɔla mabiri, a xili Isirayila. Naxan nu na yirefanyi mabiri, a xili Yudaya. Annabi Esayi xa kitaabui a masenma e firin birin Ala matandixi ki naxɛ, e fa xanin konyiya kui ɲamanɛ ma na xa fe ra. Beenun na xa raba Yudaya, Alatala naxa yi masenyi fi a xa namiɲɔnmɛ ma alako a xa ɲama xa ratanga na birin ma, kɔnɔ ɲama mu tin e tuli matide Ala ra. Mangɛ nde alɔ Xesekiya naxa kata birade Ala fɔxɔ ra, kɔnɔ booree tan mu tin na ra fefe ma.
Na kui Ala xa ɲaxankatɛ naxa bira e birin fɔxɔ ra, e fa xanin konyiya kui Babilɔn bɔxi ma. Namiɲɔnmɛ xa kawandi findixi marasi nan na won birin bɛ. Mixi naxan tondima a tuli matide Alatala ra, a xa fe fama nɛ xun nakanade. Kɔnɔ Annabi Esayi xa masenyi luma nɛ alɔ boore namiɲɔnmɛe xa masenyi. E birin a falama a ibunadama xa yunubie a niyama nɛ e xa ɲaxankatɛ sɔtɔ, kɔnɔ e man Ala xa hinnɛ masenma naxan a niyama mixie xa tuubi, e gbilen e xa yunubie fɔxɔ ra, Ala fa e rakisi.
Ala xa kisi ɲɔxun. A fɔlɔma duniɲa nan ma, a fa aligiyama li. Mixi naxee birama Ala waxɔnfe fɔxɔ ra, e hɛɛri toma nɛ na ɲɛrɛ kui. Duniɲɛigiri xɔrɔxɔ, kɔnɔ naxan luma Ala xa fe kui, a xunnakeli toma nɛ. Annabi Esayi man a masenma, yi duniɲa na ɲɔn, Ala fama nɛ a xa ɲama rasode a xɔnyi, bɔɲɛsa nun baraka luma dɛnnaxɛ. Na kisi fan. Ala xa won mali na sɔtɔde a xa hinnɛ saabui ra. Amina.
Ala xa masenyi Annabi Esayi bɛ
1
Isirayila xa sɛrɛxɛ kanaxie a xa yunubie xa fe ra
1 Masenyi naxee goro Amosu xa di Esayi ma, Yudaya nun Darisalamu xa fe ra, Yudaya mangɛe Osiyasi, Yotami, Axasi, nun Xesekiya xa waxati.
2 Alatala nan masenyi tife,
koore nun bɔxi birin xa e tuli mati a ra.
Alatala naxɛ,
«N bara die xuru, n e ramɔ,
kɔnɔ e bara muruta n ma.
3 Ninge yati a kanyi kolon,
sofale fan a kolon a kanyi donse sama a bɛ dɛnnaxɛ.
Kɔnɔ Isirayila tan mu sese kolon,
n ma ɲama mu sese fahaamuxi.»
4 Ɲaxankatɛ na yi ɲama yunubitɔɛ bɛ,
naxan yunubi kote xaninma,
naxan findixi fe ɲaaxi rabae ra,
naxan findixi di murutaxie ra.
E bara mɛ Alatala ra,
e Isirayila xa Sɛniyɛntɔɛ mabere,
e e kobe raso a ra.
5 Wo na ɲaxankatɛ fenfe munfe ra?
Wo tondixi gbilende Alatala ma munse ma?
Wo bara fura wo xunyi ma, wo tɔɔrɔxi wo bɔɲɛ ma.
6 Kelife wo sanyi ma han wo xunyi, wo xa fefe mu lanxi.
Wo xa fie ya mu ixaxi, e mu maxirixi, ture yo mu saxi e ma.
7 Wo xa bɔxi bara kana, wo xa taae bara gan.
Si gbɛtɛe na wo xa daxamui donfe wo ya xɔri,
e na a birin tongofe e yɛtɛ bɛ.
8 Siyoni taa na a kerenyi ma alɔ bage di xɛ tagi,
alɔ leele naxan tixi mɛrɛ ma,
alɔ taa naxan nabilinxi yaxuie ra.
9 Xa Alatala Sɛnbɛma mu mixi ndee rakisi won bɛ nu,
won bara lu nu alɔ Sodoma nun Gomora taae.
10 Wo wo tuli mati Alatala xa masenyi ra,
wo tan naxee maniyaxi Sodoma kuntigie ra.
Wo xa won Marigi Alatala xa sɛriyɛ ramɛ,
wo tan naxee luxi alɔ Gomora ɲama.
11 Alatala naxɛ,
«N munse rabama wo xa sɛrɛxɛ wuyaxie ra?
N bara luga yɛxɛ kontonyi sɛrɛxɛe ra,
n bara luga xuruse bɔrɛgɛxie ture ra.
Tuurae, yɛxɛɛe nun si kontonyie wuli mu rafan n ma.
12 Nde wo xilixi fafe ra n ma hɔrɔmɔbanxi tɛtɛ kui, tife ra n ya i?
13 Wo ba fafe hadiya fufafu ra.
Surayi xiri mu rafan n ma fefe ma.
Wo xa kike nɛɛnɛ salie, wo xa malabui lɔxɔɛe, wo xa malanyie, nun wo xa salie xungbee,
e sese mu rafanxi n ma.
14 N wo xa kike nɛɛnɛ salie xɔnxi,
wo xa sali birin bara n bɔɲɛ raɲaaxu n ma.
15 Wo na wo bɛlɛxɛe itala sali kui tɛmui naxɛ,
n na n ya ragalima nɛ alako n naxa fa a to.
Hali wo maxandie bira e boore fɔxɔ ra,
n mu e ramɛma, barima faxɛtie nan wo ra.
16 Wo lu fe fiixɛ kui, wo wo yɛtɛ rasɛniyɛn,
wo ba yunubie rabafe n ya i.
17 Wo wo matinkan fe fanyi rabade,
wo lu tinxinyi kui,
wo mixi kobie makiiti,
wo kiridie nun kaaɲɛ ginɛe xun mafala.»
18 Alatala naxɛ, «Wo fa, won xa wɔyɛn.
Hali wo xa yunubie to bara wo manɔxɔ,
wo nɔma fiixɛde fɔɛn.
Hali e sa xɔsi nɛ alɔ garɛ gbeeli,
e nɔma nɛ fiixɛde alɔ xuruse fiixɛ fate maxabe.
19 Xa wo tin wo tuli matide n na,
wo yi bɔxi daxamui donma nɛ,
20 kɔnɔ xa wo sa tondi n natinmɛde,
santidɛgɛma nan wo sɔntɔma.»
Alatala xui nan na ki.
21 Yi taa luxi nɛ alɔ ginɛ naxan nu dugutɛgɛxi a xa mɔri ma
a fa mɛ a ra, a findi langoe ginɛ ra.
A singe a nu tinxin a fanyi ra,
kɔnɔ yakɔsi a bara findi faxati ra?
22 I xa gbeti bara findi se kanaxi ra,
i xa wɛni bara sunbu ye ra.
23 I xa mangɛe bara muruta, e findi muɲɛtie ra,
buɲa tinxintare rafan naxee ma.
Na kui e mu kiridie malima,
e mu kiiti fanyi sama kaaɲɛ ginɛ xa tɔɔrɛ xa fe ra.
24 Alatala Sɛnbɛma xui nan ya, na xa fe ra.
Isirayila Marigi Ala Sɛnbɛma naxɛ,
«N ɲaxankatɛ dɔxɔma nɛ n gerefae ma,
n na n gbe ɲɔxɔ n yaxuie ma.
25 N gbilenma nɛ n yi sa ra i ma a xɔrɔxɔɛ ra,
n i rasɛniyɛn alɔ gbeti gbi bama ki naxɛ tɛ ra,
alako i xa ba tinxintareya ma.
26 N kiitisa tinxinxie tima nɛ wo xun alɔ singe,
n marasima fanyie luma nɛ wo tagi alɔ tɛmui dangixi.
Na dangi xanbi, i xili fama nɛ falade
‹Taa tinxinxi naxan dugutɛgɛxi.›»
27 Siyoni xun sarama nɛ tinxinyi ra,
tuubi mixie kisima nɛ tinxinyi saabui ra.
28 Kɔnɔ gbaloe goroma nɛ murutɛlae nun yunubitɔɛe ma,
halaki lu mixie fɔxɔ ra, naxee e kobe soma Alatala ra.
29 Wo fama nɛ yaagide fɔtɔnyi ra wo nu kuye batuma dɛnnaxɛ.
Wo yaagi belebele sɔtɔma nɛ na yiree xa fe ra.
30 Wo fama nɛ lude alɔ wuri bili lisixi,
ye mu na naxan ma.
31 Sɛnbɛma sɛnbɛ ɲɔnma nɛ,
a tan nun a xa wali birin gan,
a rakisima yo mu lu na.