1 मिनु लेंशा अय्‍युबमी 2 “परमप्रभु यावे ब्रोंइशा बाक्‍शो खोदेंशो पा आं ठीक पशो आ पर्बम मारेइ मदे। नेल्‍ल क्‍येङा ठेयब सक्ति पाइश्‍शोम आं थुं खाइक्‍पाइश्‍शो बाक्‍ब। 3 गो आं रांम सोक्‍त बाक्‍म सम्‍म, परमप्रभु आ सोक्‍त आं नेंम बाक्‍म सम्‍म, 4 गो मारेइ जोल मपाइनुङ। मिनु मिलो शिलो मपाइनुङ। भजन संग्रह ३४:१४ 5 गो गेपुकी ठीक बाक्‍‍नीनी, दे मदेंनुङ। गो मबेक्‍ङा सम्‍म आं रिम्‍शो पतीक मप्रोंइनुङ। 6 गो आं ठीक पतीके कली गेनायो मप्रोंइनुङ। गो मबेक्ङा सम्‍म दोस मताइब बाक्‍नुङ। प्रेरित २४:१६; १कोरिन्‍थी ४:४

7 आं जोरी सत्रु परमप्रभु यावे आ अरेशो मटीब खोदेंशो दुम्‍मल। आं कली मदाक्‍बपुकी ठीक मपाइब खोदेंशो दुम्‍मल। 8 परमप्रभु यावे आ अरेशो मटीब मुर बेक्‍चामेनु, परमप्रभुम मेको आन सोक्‍त लाइक्चावानु, मेको आन के मार आस बाक्‍बा ङा? लूका १२:२० 9 श्‍येत जचा चिक्‍तमेनु, आन ङाक्‍शो परमप्रभुमी नेंबा ङा? 10 मार, मेकोपुकीम नेल्‍ल क्‍येङा ठेयब सक्ति पाइश्‍शो कली मिम्‍शा ग्‍येरसीनीमी? मेकोपुकीम गेना हना यो मेको कली मिम्‍शा पुंइनीमी ङा? 11 गो इन कली परमप्रभु आ पशो आ पर्बम शेंनुङ। गो नेल्‍ल क्‍येङा ठेयब सक्ति पाइश्‍शो आ मिम्‍शो मख्रुइक्‍नुङ। 12 मेको गे नेल्‍लेम ताइतीनी। गेपुकी मारदे फश लोव़ पाइनीनी?

13 परमप्रभु यावे आ अरेशो मटीब आन कली गेशो भाग एकोन बाक्‍ब। नेल्‍ल क्‍येङा ठेयब सक्ति पाइश्‍शोम शिशी मपाइक्‍ब आन कली गेशो भाग एकोन बाक्‍ब। हितोपदेस १३:२२; उपदेसक २:२६ 14 मेको आन तौ शुश बाक्‍तेक्‍म हना यो, मेकोपुकी तरवारम क्‍योरशा साइक्‍चा पुंइसीनीम। मिनु मेको आन चच युइ रूथ्री जचा मताइनीम। अय्‍युब २१:१९ 15 मिनु लीशोपुकी बेक्‍तीक रोइ पा बेक्‍शा थिम्‍चा पुंइसीनीम। मिनु आन मीशपुकी रोंका मपाइनीम। 16 मेकोपुकीम फुरक खोदेंशो पा चांदी खुप्‍ताक्‍म हना यो, खप खोदेंशो पा शुश वासी तेल्‍तेक्‍म हना यो, 17 मेकोपुकीम तेल्‍नीमी, तन्‍न ठीक पाइबपुकीम फेक्‍नीम। मिनु मेको आन चांदी दोस मताइब आन कली योक्‍शा गेनीम। 18 मेको आन खिं ग्‍‍योव़ खोदेंशो पा सेल्‍शो बाक्‍ब। अङगुर रू खाल पाइब मुर आन बाक्‍‍तीके खोदेंशो दुम्‍ब। 19 मेको शोंप पाइश्‍शो दुम्‍शा इप्‍नीम। तन्‍न मुल रे मोदेंशो मदुम्‍नीम। मेको बोक्‍मानु, मेको नेल्‍ल लने थुम्‍शो बाक्‍ब। 20 शुश हिंतीकेम मेको आन कली बारशो ब्‍वाक्‍कुम खोदेंशो पा सुम्‍ब। मिनु नाक्‍दो फश गिवारमी मेको आन कली योल्‍ब। 21 पूर्ब ङा फशेमी मेको आन कली बेर पा योल्‍ब। मिनु मेको आन बाक्‍तीके योल्‍चा पुंइसीनीम। 22 फशेमी शिशी मपथु, मेको आन कली योल्‍ब। मिनु मेकोपुकी मेकेर रे प्रोक्‍चा माल्‍नीम। 23 मेको फशेमी मेको आन कली तशा, आन गुइ फ्रेक्‍नीम। मेको आन बाक्‍तीकेम मेको आन कली शुक्‍शी पाइब” देंमाक्‍त।