1 मिनु येसु परमप्रभु यावे आ खिं रे ग्रूशा लमेनु, आ शेंसीबपुकीमी “एको खिं दोमो कोल्‍पा गिश दारपाइश्‍शा सेल्‍शो बाक्‍माक्‍त” देंतेक्‍म। 2 मिनु येसुमी “मुल ओमो ठेयब नु दारपा सेल्‍शो ताइतीनी। नोफा दाइश्‍शा नेनीने, नोले ब्रेश्‍शा, फुल्‍लु का यो ख्रोप्‍शा मलीब” देंत। लूका १९:४४

3 मिनु जैतून डांडामी जाक्‍दीश्‍शा बाक्‍मेनु, आ शेंसीबपुकी यो जाक्‍शा “एको इन देंशो लोव़ गेना दुम्‍बा? इन जाक्‍ची ना ङा चिन्‍ड मार तांइसीनीमी? मिनु रागी नुप्‍चवा बाक्‍त, दे दोपा तुंइ‍सीबा?” दे हिल्‍लो पाम्‍तेक्‍म। प्रेरित १:६-८ 4 मिनु येसुमी “सुइमी इन थुं मक्‍यामेक्‍ल, दे होस पा बाक्‍कीन। 5 मारदे हना शुश मुरपुकीमी आं नें ब्रशा ‘गो ख्रीस्‍त नङ’ देंशा, मुर आन थुं क्‍यानीम। यूहन्‍ना ५:४३; १यूहन्‍ना २:१८ 6 लडाइ दुम्‍शो लडाइ ङा लोव़ शुश नेंनीनी। मेको लोव़ नेंशा महिनीन। मोदेंशो दुम्‍चा माल्‍ब, रागी नुप्‍चा चहिं इच्‍ची मजा। 7 मारदे हना ङोंइती जात जात नु राज्‍य राज्‍यमी लडाइ पाइनीम। रागी रागीमी अन्‍काल दुम्‍ब, एर ओंथ ख्रिनु कुइब। 8 मो दुम्‍मेनु, श्‍येत दुम्‍चा गोवा बाक्‍त, दे तुंइ‍सीब।

9 इन कली खेदा पा शुश श्‍येत गेनीम, साइक्‍नीम। नेल्‍ल जात ङा मुरपुकीमी आं पर्बम इन कली मदाक्‍थु आइक्‍च सेल्‍नीम। मत्ती १०:२१-२२; यूहन्‍ना १६:२ 10 मिनु शुशेमी थमा सुइक्‍चा प्रोंइनीम। खेदा पाइब आन कली वारच पाइनीम। वारच आन दातेमी काइ मदाक्‍मुइनीम। 11 परमप्रभु यावे आ लोव़ दूली शेंबपुकी शुश बोक्‍शा, दूली पा शेंशा, शुश मुर आन थुं क्‍यशा गेनीम। मिनु परमप्रभु यावे आ राज्‍य ङा लां प्रोंइपाइक्‍नीम। २पत्रुस २:१; १यूहन्‍ना ४:१ 12 पाप पचा शुश बारतीके शुशेमी वारच पमुचा, दाक्‍मुचा प्रोंइनीम। २तिमोथी ३:१-५ 13 सु सु चहिं नेल्‍ल क्‍येङा नोले सम्‍म थमा सुइक्‍चा मप्रोंइथु बाक्‍नीमी, मेकोपुकी श्‍येत जचा रे ब्रोंइशा, गेना हना यो परमप्रभु यावे नु बाक्‍चा ताइनीम। मत्ती १०:२२; प्रकाश १३:१० 14 परमप्रभु यावे आ राज्‍य आ पर्बम चहिं नेल्‍ल रागी ङा मुर आन कली तुइक्‍पांइसीब। मारदे हना नेल्‍लेमी तुइक्‍चा माल्‍नीम। मिनु नोले रागी नुप्‍ची जाक्‍ब।

15 परमप्रभु यावे आ खिं ग्रांग्रा सेल्‍नीम, दे परमप्रभु यावे आ लोव़ पाइब दानीएलमी ब्रेक्‍शो लोव़ थमा दुम्‍शो तनीनु ‘पढेबपुकीमी रुप्‍मेक्‍ल’ दानीएल ९:२७, दानीएल ११:३१ 16 यहूदीया रागीमी बाक्‍बपुकी डांडा ग्‍येत्‍थ प्रोक्‍मल। 17 बारदलीम बाक्‍बमी ‘खिं ओव़शा, मारेइ लाइक्‍चा ताइनुङ’ दे ममिम्‍तमेक्‍ल, तन्‍न दिव दाव प्रेक्‍शा प्रोक्‍मल। लूका १७:३१ 18 रूमी गेय पाइबपुकीमी ‘फेक्‍तीक का लाइक्‍नीकी’ दे खिं लेश्‍शा मलमल, तन्‍न आन गेय थु था प्रोंइशा प्रोक्‍मल। लूका २३:२९ 19 आल कुरशो नु दूध तूब आल पाइश्‍शो मीश मुर अरु क्‍येङा शुश श्‍येत जाइनीम। 20 नाइक्‍तीक नाक्‍त नु हिउंदमी मोदेंशो श्‍येत मदुम्‍ल, दे परमप्रभु यावे कली पुनीने। 21 परमप्रभु यावेमी रागी सेला रे मुल सम्‍म सुइमी मतुइश्‍शो श्‍येत जाइनीम। मोदेंशो श्‍येत जचा लेंशा गेनायो मदुम्‍ब। दानीएल १२:१ 22 मोदेंशो श्‍येत जतीक नाक्‍त शुश नाक्‍त दुम्‍त हना, सुइ मब्रोंइनीम वा। तन्‍न आ योव़शो आन पर्बम परमप्रभु यावेमी मेको श्‍येत शुश नाक्‍त लीचा मगेब।

23 मिनु मुरपुकीमी ‘ख्रीस्‍त एकेर जाक्‍त, मेरेक बाक्‍ब, कोव़थ गाक्‍कीन’ देंतेक्‍म हना, थमा मसुतीने। 24 मारदे हना शुशेमी ‘गो ख्रीस्‍त नङ’ दे जोल पा गाक्‍नीम। ‘परमप्रभु यावे आ लोव़ पाइब नकी’ दे जोल पाइबपुकीमी चिन्‍ड नु छक लाक्‍चा ङा गेय कोंइनीम। मो पशोमी परमप्रभु यावे आ योव़शो आन कली यो लां प्रोंइपाइक्‍चा माल्‍नीम। ब्‍यवस्‍था १३:२-४; २थिस्‍सलोनिकी २:८-९; प्रकाश १३:१३ 25 मेको नेल्‍ल दुम्‍चा ङोंइतीन गो इन कली नेल्‍ल शेंशा तुइक्‍पाइक्‍तन्‍नी। 26 मेकोपुकीमी ‘सुइ मबाक्‍तीके गोरशो रागीमी ख्रीस्‍त बाक्‍ब’ देंतेक्‍म हना, थमा सुइश्‍शा कोव़थ मलने। ‘खिं आगा ङा कोठामी ख्रीस्‍त बाक्‍ब’ देंतेक्‍म हना, थमा मसुतीन। लूका १७:२३-२४ 27 नां दाप्‍तीकेमी चिला पवानु, छेङछेङ पा नां पेरतीकेमी सम्‍म तांइसीशो खोदेंशो पा, रागीम जरमेशो आ जाक्‍ची ना दुम्‍ब। 28 सिनु बाक्‍तीकेमी गिद्ध आंमा बेरशा जाक्‍नीम। लूका १७:३७; प्रकाश १९:१७-१८

29 रागीम मोदेंशो श्‍येत दुम्‍ने नुम चोटी, सरीङमी चिन्‍ड तांइसीनीम। नां आ छेङछेङ जाम्‍शा, जिक रिक्‍शो तांइसीब। तास्‍ला आ हाम्‍सो यो जाम्‍ब, सोरुल खपीम दोक्‍नीम। सरीङ ङा सक्ति हिम्‍सीनीम। यसैया १३:१०; प्रेरित ६:१२-१३; २पत्रुस ३:१० 30 मिनु सरीङमी रागीम जरमेशो आ चिन्‍ड तांइसीब। मिनु नेल्‍ल जात ङा मुरपुकी ङाक्‍नीम। रागीम जरमेशो कली गोस्‍स तारी बाक्‍शा, सक्ति नु ठेयब छेङछेङमी यिशो ताइनीम। प्रकाश १:७; मत्ती २६:६४; दानीएल ७:१३-१४; प्रकाश १९:११-१३ 31 मिनु रागीम जरमेशोमी परमप्रभु यावे आ स्‍वर्ग ङा गेय पाइब आन कली तुराही ताप्‍पा, रागी तेइ तेइ रे परमप्रभु यावे आ योव़शो नेल्‍ल आन कली खुप्‍शा चाक्‍थ सोइक्‍ब। 32 फोव़शी रवा कोव़शा शेंसीने। फोव़शी रवा आ कोच्‍वा दाप्‍शा कुशो तनीनु, बर्खा ओव़माक्‍त, दे तुइक्‍नीनी। 33 आं देंशो लोव़ थमा दुम्‍शो तनीनु, आ जाक्‍ची जाक्‍माक्‍त, दे तुइक्‍नीनी। 34 नोफा दाइश्‍शा नेनीने, एको जात मनुप्‍थु, आं देंशो थमा दुम्‍ब। 35 सरीङ नु रागी नेल्‍ल जाम्‍शा लाइनीम, आं लोव़ चहिं गेना हना यो लीब। मत्ती ५:१८; यसैया ५१:६

36 मोदेंशो गेना दुम्‍बा, सुइमी मतुइक्‍नीम। परमप्रभु यावे आ स्‍वर्ग ङा गेय पाइबपुकीमी यो मतुइक्‍नीम। तौमी यो मतुइक्‍ब। आफोमी ला तुइक्‍ब। प्रेरित १:७ 37 रागीम जरमेशो जाक्‍मेनु, मुरपुकीमी नोआह आ पालामी पशो खोदेंशो पाइनीम। लूका १७:२६-२७; उत्‍पत्ती ६:९-७,२३ 38 नोआह आ ठेयब डोंगा मओव़म सम्‍म मुरपुकीमी जना जन, तूना तून, ग्‍युंबे पना पन नु ग्‍युंबे पांइसीन सीन बाक्‍शो बाक्‍मा बाक्‍त। 39 नेल्‍ल आन कली ब्‍वाक्‍कुमी मयोल्‍दा सम्‍म मारेइ मतुइश्‍शो बाक्‍मा बाक्‍त। रागीमी जरमेशो आ जाक्‍ची नाक्‍त यो मोदेंशो दुम्‍ब। 40 वोंइश मुर निक्‍शी रूमी बाक्‍नीसी, का लाइक्‍चा पुंइसीब, का प्रोंइशा वोइक्‍चा पुंइसीब। 41 मीश मुर निक्‍शी यात हिल्‍ना हिल्‍न बाक्‍नीसी, का लाइक्‍चा पुंइसीब, का प्रोंइशा वोइक्‍चा पुंइसीब। लूका १७:३५ 42 इन प्रभु गेना जाक्‍बा, दे मतुइक्‍नीनी। मोपतीके गेना हना यो सासीशा बाक्‍कीन। मत्ती २५:१३ 43 खिं ङा मुरुमी ‘आपो नाक्‍दो खुइपुकी खुइ पथ जाक्‍नीम’ दे तुइक्‍ताक्‍व हना, मेको नाक्‍दो मइप्‍थु बाक्‍शा, खुइ पचा मगेन वा। १थिस्‍सलोनिकी ५:२ 44 गेना हना यो सासीशा बाक्‍कीन। मारदे हना रागीम जरमेशो इन मतुइक्‍थु जाक्‍ब।

45 होव़पमी आ खिं कोव़ब कली जची जाक्‍मेनु, जचा गेचा, दे अरेशा वोइक्‍चा पुंइसीशो खोदेंशो रिम्‍शो थुं पाइश्‍शो गेय पाइब सु बाक्‍बा? 46 आ होव़प लेश्‍शा जाक्‍शा, आ गेय पाइबमी आ देंशो टिशा पशो तशा ‘रिम्‍शो’ पाप्‍तीवी देंब। 47 नोफा दाइश्‍शा नेनीने, होव़पमी आइक्‍के बाक्‍शो नेल्‍ल मेको आ गुइमी जिम्‍मा गेब। मत्ती २५:२१-२३ 48 मरिम्‍शो थुं पाइश्‍शो गेय पाइबमी चहिं आ होव़प लम नोले ‘इच्‍ची ना मजाक्‍ब’ दे मिम्‍शा, २पत्रुस ३:४ 49 अरु गेय पाइब आन कली जिचा पोक्‍शा, श्‍येत गेशा तुप्‍शा, शांबु राकसी दुक्‍ब नु काथा बाक्‍शा पाइब। 50 आ ममिम्‍शो मतुइश्‍शो नाक्‍त खिं ङा होव़प लेश्‍शा जाक्‍ब। 51 मिनु मेको कली तुप्‍शा, फस सेल्‍शा कपटीपुकी नु काथा वोइक्‍ब। मेकेर मुरपुकी आन ख्रुइ शेप्‍शा ङाक्‍नीम।