1 येसु यहूदीया रागी ङा बेथलेहेम सहरमी जरमेसे बाक्‍त। मेना मेकेर हेरोद पिप बाक्‍माक्‍त। मिनु येसु जरमेसेनु, सोरुल कोव़शा, जोक्‍ब तुइक्‍ब नां दाप्‍तीक रे यरूसलेममी जाक्‍मा बाक्‍त। लूका २:१-७ 2 मिनु यरूसलेममी जाक्‍शा “यहूदी आन पिप ते जरमेसे? मारदे हना गोपुकीमी पूर्ब ङा रागीम आ सोरुल ताइतक। मिनु गो मेको कली ठेयब सेल्‍थ जाक्‍तक। ते बाक्‍मा?” देंमा बाक्‍त। गन्‍ती २४:१७ 3 मिनु पिप हेरोद नु यरूसलेममी बाक्‍बपुकीमी मेको आन लोव़ नेंशा, आन थुं ग्‍येत्‍थ लुक्‍च दुम्‍मा बाक्‍त। 4 मिनु हेरोदमी ठेयब चढ़ेब नु सास्‍त्री आन कली खुप्‍शा “ख्रीस्‍त ते जरमेसीबा?” दे हिल्‍लो पामी बाक्‍त। सास्‍त्री यहूदी आन कली परमप्रभु यावे आ अरेशो लोव़ शेंब बाक्‍शो बाक्‍तेक्‍म। 5 मिनु मेकोपुकीमी “यहूदीया ङा बेथलेहेम सहरमी जरमेसीब। मारदे हना परमप्रभु यावे आ लोव़ पाइबमी मीका ५:१; यूहन्‍ना ७:४२ 6 ‘ए यहूदीया ङा बेथलेहेम सहर, यहूदीया ङा सहर नेल्‍ल क्‍येङा आइक्‍च महिक्‍सीशो सहर मनवे। मारदे हना इं इस्राएली आन कली सासन पाइब बेथलेहेममी जरमेसीब’ दे ब्रेक्‍शो बाक्‍ब” दे शेंदमे बाक्‍त। मीका ५:२

7 मिनु हेरोदमी मेको आन लोव़ नेंशा सुइमी मतुइक्‍थु, नां दाप्‍तीके रे जाक्‍शो सोरुल कोव़ब आन कली ब्रेत्‍तीमी बाक्‍त। मिनु मेको सोरुल गेना ग्रूमे, दे रुबा बाक्‍त। 8 मिनु “लो, मुल बेथलेहेम सहर लने। मेकेर जाक्‍दीश्‍शा, मेको आल मालीन। मिनु थिश्‍शा आं कली यो शेंदीन। गो यो लशा ठेयब सेल्‍नुङ” दे सोइक्‍तीमी बाक्‍त।

9 मिनु मेकोपुकीमी पिप आ लोव़ नेंशा, आन लां खोदमे बाक्‍त। मिनु नां दाप्‍तीकेमी तशो सोरुलमी आन कली लां कोंइदीमी बाक्‍त। लां कोंइना कोंइन नक थिशो आल बाक्‍तीके आ सोरुल ख्रा दिक्‍माक्‍त। 10 सोरुल ख्रा दिक्‍शो तशा, शुश ग्‍येरशा आल आ बाक्‍तीकेमी ओव़मा बाक्‍त। 11 मिनु ओव़शा, आल नु आल आ ममा मरीयम कली तामे बाक्‍त। मिनु आन पोक्‍च थेक्‍शा आल कली ठेयब सेल्‍मे बाक्‍त। मिनु आन कुरशो थैलो प्राक्‍शा, सुन धूप नु ब्रोव़शो रिना पाइब थोव़क ग्रुंइशा ख्रेत्‍तमे बाक्‍त। भजन संग्रह ७२:१०,१५; यसैया ६०:६ 12 आल कली ग्रुम्‍ने थुम्‍शा, आन रागी लेत्‍‍ची ना परमप्रभु यावेमी ङोमुमी “पिप हेरोद कली लेंशा मग्रुमीने” दे तुइक्‍पाइक्‍मी बाक्‍त। मिनु यरूसलेम लतीक लां हेरशा, आन रागी लेम्‍मा बाक्‍त।

13 मेकोपुकी लमा नोले काबु योसेफमी ङोमुमी परमप्रभु यावे आ स्‍वर्ग ङा गेय पाइब का फो ग्रूशो तवा बाक्‍त। मेकोमी “मोबु आस कली लाइश्‍शा, एकेर रे प्रोक्‍शा, इजीप्‍त रागी जाक्‍दीश्‍शा, लेत्‍तीन मदेंङ सम्‍म बाक्‍कीन। मारदे हना पिप हेरोदमी आल कली साइक्‍चा, दे माल्‍चा चिक्‍ताक्‍व” दे मदा बाक्‍त। 14 मिनु योसेफमी निन्‍द्रा रे सेंसीशा छुल बोक्‍शा, मोबु आस कली लाइश्‍शा मेको, नाक्‍दोन इजीप्‍त प्रोक्‍मा बाक्‍त। 15 मिनु इजीप्‍त रागीमी जाक्‍दीश्‍शा, पिप हेरोद मबेक्‍म सम्‍म मेकेर बाक्‍मा बाक्‍त। मो दुम्‍शोमी परमप्रभु यावे आ लोव़ थमा दुम्‍माक्‍त। साइ नेसी परमप्रभु यावेमी आ लोव़ पाइब रे पा “इजीप्‍त रे लेत्‍तो, दे आं तौ कली ब्रेत्‍ताक्‍ङ” दे देंशो बाक्‍माक्‍त। होसे ११:१

16 पिप हेरोदमी मार पवा बाक्‍त देंशा हना “मेको सोरुल कोव़शा जोक्‍ब तुइक्‍बपुकीमी जोल पाइयीमी बाक्‍त” दे तुइश्‍शा चुरमाक्‍त। मिनु आन देंशो लोव़मी “पिप मेना जरमेसीब” दे मिम्‍शा, मेको पिप दुम्‍ब आल कली थिन्‍ने मचाप्‍तीके बेथलेहेम सहर एर ओंथ गाउं ङा बर्स निक्‍शी मलाक्‍शो वोंइश आल नेल्‍ल आन कली माल्‍ना माल्‍न साइक्‍पाइक्‍मी बाक्‍त। 17 मो पवानु, परमप्रभु यावे आ लोव़ थमा दुम्‍माक्‍त। साइ नेसी परमप्रभु यावेमी आ लोव़ पाइब येरमीया रे पा 18 “रामाह सहरमी रोंका पा ङाक्‍शो नेंसीब। राहेलमी ङाक्‍ना ङाक्‍न बाक्‍ब। सुइमी लेम्‍ने मचाप्‍नीम। मारदे हना आ आल साइक्‍चा पुंइसाक्‍म” देंमाक्‍त। येरमीया ३१:१५; उत्‍पत्ती ३५:१९

19 मिनु नोले पिप हेरोद बेक्‍माक्‍त। मिनु काबु इजीप्‍त रागीम बाक्‍शो योसेफ ङोमु तवानु, परमप्रभु यावे आ स्‍वर्ग ङा गेय पाइबमी 20 “मोबु आस कली लाइश्‍शा, इस्राएल लेश्‍शा लावो। आल कली साइक्‍चा माल्‍बपुकी बेक्‍तेक्‍म” देंमाक्‍त। प्रस्‍थान ४:१९ 21 मिनु योसेफमी मोबु आस कली इस्राएल लेत्‍ता बाक्‍त। 22 मिनु लेश्‍शा जाक्‍दीश्‍शा, यहूदीया रागीमी हेरोद आ तौ अरकीलाउस पिप दुम्‍शो बाक्‍त देंशो नेंशा, यहूदीया रागीमी बाक्‍चा हिंमाक्‍त। मिनु लेंशा ङोमुमी “यहूदीयामी मबाक्‍कीन। गालील रागी लशा बाक्‍कीन” दे माइक्‍चा पुंइसे बाक्‍त। मिनु गालील रागी लमा बाक्‍त। 23 मिनु गालील ङा नासरथ सहरमी जाक्‍दीश्‍शा बाक्‍मा बाक्‍त। मारदे हना साइ नेसी परमप्रभु यावे आ लोव़ पाइब आन लोव़ थमा दुम्‍चा माल्‍बाक्‍माक्‍त। मेकोपुकीमी “मेको कली नासरी देंनीम” देंशो बाक्‍मा बाक्‍ब। लूका २:३९; यूहन्‍ना १:४६