27
मुर आ पर्बम कसम जशो
1 मिनु परमप्रभु यावेमी मोसा कली 2 “गे इस्राएली आन कली ‘सुइमी परमप्रभु यावे कली मुर आ पा ङा क्येट गेनुङ’ दे कसम जाप्तु हना, 3 मेकोमी २० बर्स रे ६० बर्स सम्म ङा वोंइश मुर आन पर्बम आं ताम्बु ङा चांदी के ५० शेकेल परमप्रभु यावे कली गेचा माल्नीम। शेकेल इस्राएली आन क्येट बाक्ब। शेकेल का ११.५ ग्राम चांदी बाक्ब। ताम्बु ङा शेकेल चहिं १२ ग्राम बाक्त।न्यायाधीस ११:३१; १सामुएल १:११ 4 मीश मुर आ पर्बम बाक्त हना, मेकोम ३० शेकेल गेचा माल्ब। ३० शेकेल ३६० ग्राम चांदी बाक्ब। 5 मिनु ५ बर्स रे २० बर्स सम्म ङा वोंइश आल आन पर्बम २० शेकेल गेचा माल्ब। मीश आल बाक्त हना, १० शेकेल गेचा माल्ब। 6 मिनु महिना का रे ५ बर्स सम्म ङा वोंइश आल आन पर्बम चांदी के ५ शेकेल नु मीश आल आन पर्बम चांदी के शेकेल सां गेचा माल्नीम। 7 मिनु ६० बर्स क्येङा ग्येत्थ ङा वोंइश मुर आ पर्बम १५ शेकेल नु मीश मुर आ पर्बम १० शेकेल गेचा माल्ब। ताम्बु ङा शेकेल का १२ ग्राम बाक्ब। 8 मिनु मेको मुर प्रुङग दुम्शा, गेने मचाप्ब बाक्त हना, मेको कली चढ़ेब आ ङोंइती चाक्चा माल्नीम। मिनु चढ़ेबमी मेको कसम जाइब आ चाप्शो खोदेंशो पा मेको आ क्येट देंचा माल्ब।
9 मिनु परमप्रभु यावे कली चढ़ेचा ङा बी ब्यफ, क्यारश भेडा बाक्तेक्म हना, मेको मारेइ मदुम्शो थम रिम्शो नु ग्रांग्रा मदिशो बाक्चा माल्नीम। 10 मेको आ पा ङा अरु फाइक्चा मदुम्ब। रिम्शो बस्तु आ पा ङा मरिम्शो नु मरिम्शो आ पा ङा रिम्शो फाइक्चा मदुम्ब। चढ़ेचा ङा बस्तु फाइक्तेक्म हना, मेको बस्तु निम्फा मारेइ मदुम्शो थम रिम्शो ग्रांग्रा मदिशो बाक्चा माल्नीस। 11 मिनु परमप्रभु यावे आ ङोंइती चढ़ेचा मदुम्शो ग्रांग्रा दिशो बस्तु भाव बाक्तेक्म हना, मेको आन कली चढ़ेब कली कोंइचा माल्नीम। 12 मिनु चढ़ेबम मेको बस्तु रिम्शो बाक्त हना यो, मरिम्शो बाक्त हना यो, मेको गिश क्येट लाइक्बा, दे चढ़ेबमी देंचा माल्ब। मिनु चढ़ेबमी दोशो देंबा मेको ठीक दुम्ब। 13 मेको मुरुम क्येट थाप्शा, मेको बस्तु कली प्रोंइचा दाक्ब हना, चढ़ेब आ देंशो क्येङा यो ५ भाग ङा भाग का क्येट तेम्शा गेचा माल्ब। लेवी ५:१६
14 मिनु सुइ मुरुमी परमप्रभु यावे कली खिं का चढ़ेप्तु हना, चढ़ेबमी मेको खिं कोव़शा रिम्शो बाक्म कों मरिम्शो बाक्मे ‘ओशो क्येट लाइक्ब’ देंचा माल्ब। मिनु चढ़ेबमी दोशो देंबा मेको ठीक दुम्ब। 15 मिनु मेको मुरुमी क्येट थाप्शा लेत्चा थुं पाप्तु हना, चढ़ेबमी देंशो क्येङा यो ५ भाग ङा भाग का क्येट तेम्शा गेचा माल्ब। मिनु मेको खिं मेको केन दुम्ब।
16 मिनु सुइ मुरुमी तेकोइ आंम रू परमप्रभु यावे कली चढ़ेप्तु हना, चढ़ेबमी मेको रूम दोशो वांचेर लाइबा कोव़शा, मेको आ क्येट देंचा माल्ब। होमेर का क्योव़ज वांचेर लाइब रू कली ५० चांदी के शेकेल दुम्चा माल्ब। होमेर का २२० लिटर रिक्ब पुक्तीक का बाक्ब। ताम्बु ङा शेकेल का १२ ग्राम चांदी बाक्ब।२सामुएल २४:२४ 17 मेको मुरुमी आ रू कली लेंशा प्रोंइतीक बर्स आ नोले ङा बर्स रे चढ़ेप्तु हना, मेको आ क्येट चढ़ेबमी देंशो खोदेंशो दुम्ब। लेवी २५:८-५५ 18 तन्न मेकोमी आ रू लेंशा प्रोंइतीक बर्स इच्का बर्स नोले चढ़ेप्तु हना, लेंशा प्रोंइतीक बर्स जाक्चा दोशो लीशो बाक्मे, चढ़ेबमी मेको हिक्चा माल्ब। मिनु आ देंशो क्येट रे तोक्चा माल्ब। 19 मेको मुरुमी मेको रू लेंशा फेत्चा दाक्ब हना, चढ़ेबमी देंशो क्येट क्येङा ५ भाग ङा भाग का क्येट तेम्शा गेचा माल्ब। मिनु मेको रू मेको केन दुम्ब। 20 तन्न मेकोमी मेको रू मलेप्ब हना, मेकोमी मेको रू अर्को मुर कली लेयशो बाक्त हना, मेकोमी मेको रू गेनायो लेत्चा मताइब। 21 मेको रू लेंशा प्रोंइतीक बर्सम प्रोंइशो बाक्त हना, मेको परमप्रभु यावे कली जिम्मा गेशो रू दुम्शा, चढ़ेबमी मेको रूम शोक्ब।
22 मिनु सुइ मुरुमी आंम के ममाइ, तन्न आ ग्याप्शो रू परमप्रभु यावे कली चढ़ेप्तु हना, 23 चढ़ेबमी लेंशा प्रोंइतीक बर्स सम्म हिक्शा, मेको आ क्येट दोशो बाक्मे, मोशो गेचा माल्ब। मेको नाक्तीन परमप्रभु यावे कली गेचा माल्ब। 24 मिनु लेंशा प्रोंइतीक बर्सम मेको रू सु रे ग्याप्शो बाक्मे, मेको लेंशा ताइब। 25 मिनु गिश क्येट लाइबा, मेको नेल्ल परमप्रभु यावे आ ताम्बु ङा चांदी के शेकेलम थाप्चा माल्ब। शेकेल काम २० गेरा बाक्नीम। गेरा का ०.६ ग्राम बाक्ब।
26 मिनु बी ब्यफ, क्यारश भेडा आन ङोंइती जरमेशो ब्यफ बाक्त हना यो, सांड बाक्त हना यो, बोका बाक्त हना यो, मेको ङोंइती रे परमप्रभु यावे केन बाक्ब। सुइमी परमप्रभु यावे कली गेने मचाप्नीमी। प्रस्थान १३:२,१२,१३; गन्ती १८:१५ 27 मेको ग्रांग्रा दिशो बस्तु भाव बाक्त हना, आ देंशो क्येट क्येङा ५ भाग ङा भाग का तेम्शा, लेत्चा माल्ब। तन्न मलेत्ताक्म हना, आ देंशो क्येटीम लेयचा माल्ब।
28 मिनु परमप्रभु यावे कली साइक्चा कली जिम्मा गेशो मारेइ मारेइ मुर बाक्त हना यो, बस्तु भाव बाक्त हना यो, आंम रू बाक्त हना यो, मेको लेयने नु लेन्ने मचाप्नीम। मेको साइक्चा कली जिम्मा गेशो मारेइ मारेइ थमा पा परमप्रभु यावे केन बाक्नीम। गन्ती १८:१४; गन्ती २१:२; यहोसु ६:१८,२६; इजीकीएल ४४:२९
29 मिनु सु मुर साइक्चा कली जिम्मा गेचा पुंइसीशो बाक्बा, मेको कली क्येट थाप्शा मलेत्थु, साइक्चा माल्ब। यहोसु ६:१७-१८; १सामुएल १५:३-९
30 मिनु रू नेल्ल ङा, अन्न कि रवा आ फल फुल १० भाग परमप्रभु यावे केन बाक्ब। मेको परमप्रभु यावे केन बाक्ब। गन्ती १८:२१; ब्यवस्था १४:२२-२९; नेहेम्याह १३:१२ 31 मुरुमी आंमा आ गेशो १० भाग लेत्चा दाक्ताक्व हना, ५ भाग तेम्शा, लेन्ने चाप्ब। 32 नेल्ल गोठ ङा बी ब्यफ, क्यारश भेडा, मारेइ मारेइ गोठलाम हिक्तु हना यो, १० ओटा ङा का परमप्रभु यावे केन बाक्ब। २इतिहास ३१:६ 33 मेकोमी रिम्शो नु मरिम्शो तिल्शा फाइक्चा मदुम्ब। मुरुमी मेको बस्तु फाइक्चा थुं पाप्तु हना, निम्फा परमप्रभु यावे कली गेचा माल्ब। मिनु क्येट थाप्शा, लेत्चा मदुम्ब, दे अरेवो” दे परमप्रभु यावेमी मोसा कली देंत।
34 मिनु सीनै डांडामी परमप्रभु यावेमी इस्राएली आन कली मोसा रे पा शेंशो लोव़ एको बाक्नीम। लेवी ७:३८; लेवी २५:१; २६:४६