1 मिनु एलीहुमी लेंशा 2 “गो नु फाल्‍शा बाक्‍तीनी हना, इन कली मारेइ कोंइनुङ। गो मुल यो परमप्रभु आ पर्बम इन कली लोव़ पचा माल्‍नुङ। 3 आं जोक्‍शो थुं ङा लोव़ ङोन रे चाक्‍नुङ। आं कली सेल्‍ब ठीक पाइब बाक्‍ब। 4 थमा पा, आं लोव़ हेंथे मबाक्‍ब। आं लोव़ थम पा जोक्‍ब तुइक्‍ब मुर इन ङोंइती बाक्‍ब।

5 थमा पा परमप्रभु सक्ति पाइश्‍शो बाक्‍ब। मेकोम सुइ आन कली आइक्‍च मसेल्‍ब। मेको आ जोक्‍तीक तुइक्‍तीक ठेयब बाक्‍ब। 6 मेकोमी आ अरेशो मटीब आन कली ब्रोंइचा मगेब। आइक्‍च मुर आन कली ठीक निसाफ पाइब। भजन संग्रह ७२:४,१२; भजन संग्रह १४६:७-९ 7 मेकोम ठीक पाइब आन कली कोव़ब। मिनु मेको आन कली गेना हना यो पिप नु वोइक्‍ब। मिनु मेकोपुकी ठेयब सेल्‍चा पुंइसीनीम। भजन संग्रह ११३:७-८ 8 तन्‍न मेको आन कली साङलोम पाइक्‍ताक्‍म हना, श्‍येत जाम्‍तेक्‍म हना, 9 मेको आन शुश हेंथे पशो नु ठेयब लेश्‍शो आ पर्बम परमप्रभुमी सजाइ गेशो बाक्‍ब। 10 मेकोमी मेको आन कली श्‍येत गेशा रुप्‍ब मुर सेल्‍ब। मिनु मेको आन मरिम्‍शो पतीक रे लेप्‍पाइक्‍चा कली अरेब। अय्‍युब ३३:१६ 11 मिनु मेकोपुकीम मेको आ लोव़ नेंतेक्‍म हना, मेको आ अरेशो टिशा आ गेय पाम्‍तेक्‍म हना, मेकोपुकीम आन लीशो नाक्‍ती रिम्‍शो पा बाक्‍चा ताइनीम। मिनु आन लीशो बर्स रिम्‍शो पा लाक्‍नीम। 12 तन्‍न मेकोपुकीम मेको आ लोव़ मनेंतेक्‍म हना, मारेइ मतुइक्‍थु, तरवारम साइक्‍चा पुंइसीनीम।

13 परमप्रभु कली मान मपाइब मुर गाइक्‍स ङा गाइक्‍स बाक्‍नीम। परमप्रभु रे पा सजाइ तामेनु, यो मेकोपुकीम ‘वारच पाइक्‍की’ दे मपुंइनीम। 14 मेकोपुकी ठिटा बाक्‍ची ना मुने दोक्‍शा बेक्‍नीम। 15 परमप्रभुमी श्‍येत जशो आन कली आन श्‍येत रे प्रोंइब। मोपा मेको आन श्‍येत तशा, रुप्‍ब दुम्‍नीम। 16 मोपा इन कली यो श्‍येत रे ग्रुंइब। इन कली रिम्‍शो बाक्‍तीकेमी वोइक्‍ब। गे लेंशा ब्रोव़शो जचा थोव़क जचा ताइनीनी।

17 गे मुल चहिं परमप्रभु यावे आ अरेशो मटीब आन ततीक सजाइ तन तन बाक्‍नीनी। मोपान मेको आन दोस नु सजाइम इन कली यो ग्‍याइक्‍ब। 18 होस पा बाक्‍कीन। इन गाइक्‍तीकेम इन कली शुक्‍शी मपपदल। मिनु शुश घूस जतीकेमी इन कली हेंथे पाइब मसेलल। 19 गे इन कली ‘वारच पाइय्‍यीनी’ दे ग्रीचा शोर गाक्‍शो बाक्‍ब। इन शुश शोंप नु इन सक्तिम इन कली श्‍येत रे प्रोंइने चाप्‍बा ङा? 20 गेना नां रिक्‍बा, मिनु इप्‍चा, दे ममिम्‍तीन। मारदे हना मुर आन इप्‍तीकेम साइक्‍चा पुंइसीनीम। 21 मरिम्‍शो पतीक गे मलन। होस पा बाक्‍कीन। मारदे हना गे मेको आ पर्बम श्‍येत जाइब दुम्‍तीनी। 22 परमप्रभु आ सक्तिम पतीके ठेयब सेल्‍चा पुंइसीब। मेको खोदेंशो शेंब अर्को सु बाक्‍बा ङा? भजन संग्रह २५:९ 23 सुम मेको कली आ लां कोंइशो बाक्‍बा? मिनु मेको कली ‘गे दूली पाइ‍तीनी’ दे सुम देंने चाप्‍बा ङा?

24 गे मेको कली मेको आ गेय आ पर्बम ठेयब सेल्‍चा, मप्रेंदीन। मुरपुकीम मेको आ पर्बम कुम्‍सो पशो बाक्‍तेक्‍म। 25 मुर नेल्‍लेमी आ पशो तशा कोव़तेक्‍म। तन्‍न ङोन रे ला ताम्‍तेक्‍म। 26 परमप्रभु थमा पा ठेयब बाक्‍ब। मिनु गो मेको मतुइक्‍नीकी। मेको आ बर्स हिक्‍ने मचाम्‍सीब। 27 मेकोम ब्‍वाक्‍कु आ तेप्‍का गुप्‍ब। मिनु आ सेल्‍शो गोस्‍सुम वोइक्‍ब। 28 मिनु सरीङ रे रेउ यीब। मेकोमी मुर आन कली शुश जिप्‍पाइक्‍ब। 29 सुम गोस्‍स आ ब्रशो रुप्‍‍ने चाप्‍बा ङा? आ बाक्‍तीक रे बुंबु पशो सुम रुप्‍ने चाप्‍बा ङा? 30 मेकोमी सरीङ आ एर ओंथ आ चिला सोइक्‍ब। मिनु मेको समुन्‍द्र आगा सम्‍म लाइब। 31 मोपा मेकोम जात जात ङा मुर आन कली सासन पाइब। मिनु मेको आन कली शुश जचा थोव़क गेब। 32 मेको आ गुइम चिला बाक्‍ब। मिनु मेकोमी ख्रपाइक्‍चा कली आप्‍ब। 33 मेको चिला आ पपाइश्‍शो रेयकेम मेको आ सक्ति आ पर्बम लोव़ पाइब। मेको हेंथे गाक्‍ब आन पर्बम रुश पा शुश गाइक्‍ब।