1 मिनु परमप्रभु यावेम मोआब आ पर्बम यसैया कली “मारदे हना काबु नाक्‍दोमी आर-मोआब सहर खतम दुम्‍त। मिनु मोआब ग्रांग्‍ये माग्‍ये दुम्‍त। काबु नाक्‍दोमी कीर-मोआब सहर खतम दुम्‍त। मिनु मोआब ग्रांग्‍ये माग्‍ये दुम्‍त। 2 दीबोन ङा मुर देवी देवता आन थान लाम्‍तेक्‍म। डांडा ङा थानमी ङाक्‍थ लाम्‍तेक्‍म। मोआबीपुकीमी नेबो नु मेदेबा सहर आस पर्बम रोंका पाइनीम। मेको नेल्‍लेम आन चां नु आन गाल शोक्रे प्रेक्‍शो बाक्‍नीम। 3 मेकोपुकी सहर ङा लांमी अरन्‍डी फेक्‍शा, खिं तारी नु बजारम ग्रुम्‍शा रोंका पा ङाक्‍ना ङाक्‍न बाक्‍नीम। 4 हेश्‍बोन नु एलेआले सहर ङा मुर वाइ ब्रेश्‍शा ङाक्‍नीम। मेको आन ङाक्‍शो याहास सम्‍म नेंसीब। मोपतीके मोआब ङा लडाइ पाइबपुकी ख्रिंख्रि पा आन थुं लुक्‍च लाइब। यसैया १६:९-११ 5 आं थुं मोआब आ पर्बम वाइ ब्रेश्‍शा ङाक्‍ब। मेकेर ङा मुरपुकी सोआर नु एग्‍लाथ-शेलीशीया प्रोक्‍‍नीम। मेकोपुकी ङाक्‍ना ङाक्‍न लुहीथ ङा डांडा ङोइक्‍नीम। मेकोपुकीमी होरोनाइम ङा लांमी खतम दुम्‍चा आ पर्बम रोंका पाइनीम। 6 निम्रीम ङा ब्‍वाक्‍कु सोव़नीम। घांस नेल्‍ल सोव़नीम, नक ख्रुम्‍शो मवानीम। गिगी नेल्‍ल सोव़नीम। 7 मोपतीके मेकोपुकीमी आन लीशो मारेइ मारेइ लाइश्‍शा रवा पाइश्‍शो खो‍ल्‍सा आइक्‍ची हांबु लाइक्‍नीम। 8 मारदे हना मोआब रागी नेल्‍लेमी मेको आन ङाक्‍शो नेंसीब। मेको आन रोंका पशो एग्‍लाइम नु बेयर-एलीम सम्‍म जाक्‍दीश्‍शो बाक्‍ब। 9 मारदे हना दीबोन खोला ङा ब्‍वाक्‍कु हुशेम ब्रीशो बाक्‍त। मोपा यो मेको आन कली चिनु श्‍येत गेनुङ। मोआब रे प्रोक्‍शा ब्रोंइशो नु लीशो मुर आन नोले गुप्‍स का सोइक्‍नुङ” देंत।