9
ख्रीस्त खेयप का चढ़ेशो
1 ङोंइती ङा कबलमी ठेयब सेल्चा कली अरेशो लोव़ नु रागीम परमप्रभु यावे आ बाक्तीक बाक्शो बाक्माक्त। प्रस्थान २५:३१; प्रस्थान २५:२३; प्रस्थान २५:३० 2 मिनु ताम्बु का सेल्शो बाक्माक्त। आगामी कोठा निक्शी पाइश्शो बाक्माक्त। ङोंइती ङा कोठाम बत्ती दातीक दियारी का, टेबल का नु परमप्रभु यावे आ ङोंइती वोइश्शो कोंइतीक शोब्ले बाक्माक्त। मेको आ नोले चोव़खो कोठा, दे नें वोइश्शो बाक्माक्त। 3 फारतीक वा आ आगा नेल्ल क्येङा चोव़खो कोठा बाक्शो बाक्माक्त। 4 थम चोव़खो कोठामी सुन के सेल्शो धूप चोतीक नु परमप्रभु यावे आ कबल पशो सुनमी गिल्शो सन्दोस बाक्माक्त। मेको कबल पशो सन्दोसमी मार वोइश्शो बाक्माक्त देंशा हना, मन्ना कुर पशो सुन के बोस, हारून आ कोच्वा दाप्शो कोक्के नु परमप्रभु यावेमी फुल्लुमी मुशा ब्रेक्शा वोइश्शो अरेशो लोव़ मेको आगाम बाक्माक्त। प्रस्थान १६:३३; प्रस्थान २५:१०-२२; गन्ती १७:२३-२५ 5 सन्दोस आ तारी करूब निक्शी वोइश्शो बाक्तेक्म। मेको निक्शीमी “परमप्रभु यावे एकेर बाक्ब” दे आ शिशी पतीक कली वांकु गेशा वोइक्तेक्म। मेको नेल्ल आन पर्बम मुल का का पा शेंने मचाप्नुङ। 6 मोदेंशो ताम्बुमी चढ़ेबपुकीमी नाक्त किंत किंत ओव़शा, परमप्रभु यावे कली आन पचा माल्शो गेय पाम्तेक्म। गन्ती १८:३-४ 7 थम चोव़खो कोठामी चहिं बर्समी खेयप का नेल्ल क्येङा ठेयब चढ़ेबमी हुश लाइश्शा चढ़ेथ ओव़बाक्माक्त। आ पशो नु अरु आन पशो पाप क्याम्चा कली मेको हुश चढ़ेबाक्माक्त। प्रस्थान ३०:३०; लेवी १६:२१४,१५ 8 ङोंइती ङा कोठा बाक्मेनु, मुरपुकी थम चोव़खो कोठामी ओव़चा मताइनीम, दे परमप्रभु यावे आ सोक्तीम रुप्पाइक्ब। हिब्रू १०:२० 9 मेको मुल कली कोंइतीक का बाक्ब। मेकोमी मार कोंइब देंशा हना, भेटी नु चोशा चढ़ेशोमी मुर आन कली पाको सेल्ने मचाप्ब। हिब्रू ७:१९; हिब्रू १०:१-२ 10 मेको पतीके जचा थोव़क, तूचा थोव़क, चिक्चा नु चढ़ेचा आ पर्बम बाक्नीम। मेको नेल्ल मुर आन मिम्शो शोर गाक्शो गेय बाक्नीम। नक लोव़ मजाक्म सम्म मेको माइत लोव़ टिशा पामेक्ल, दे वोइश्शो बाक्माक्त। लेवी ११:-; गन्ती १९:-
ख्रीस्तमी स्वर्ग ङा ताम्बुमी गेय पशो
11 रागी ङा ममाइ, मुर आन गुइमी सेल्शो क्येङा ठेयब नु रिम्शो स्वर्ग ङा ताम्बुमी ख्रीस्त ठेयब चढ़ेब दुम्शा, गेय पाइब। 12 बाछा, बोका आन हुश चढ़ेशो ममाइ। कालेमीन स्वर्ग ङा थम चोव़खो कोठाम ओव़दीश्शा, आ हुश चढ़ेप्तु। मो पशोमी पाप रे प्रोंइतीक गेय गेना हना यो कली पने थुम्तु, मारेइ पचा मली। 13 बोका, ब्यफ आन हुश चढ़ेशा, आन श्ये चोशो ङा पुलु फ्रशा, मुर आन रां चोव़खो सेल्ने चाप्ब हना, गन्ती १९:२,९,१७ 14 ख्रीस्त आ हुशेमी मेको क्येङा इं पशो जाम्शा लतीक गेय रे चोव़खो सेल्ने चाप्ब। गेपुकी ब्रोंइशा बाक्ब परमप्रभु यावे आ गेय पचा कली ख्रीस्त गेना हना यो बाक्शो सोक्तीम पतीके मारेइ मरिम्शो मपथु, परमप्रभु यावे आ ङोंइती आंम कली चढ़ेवा बाक्त। १पत्रुस १:१८-१९; १यूहन्ना १:७; प्रकाश १:५; हिब्रू १:३ 15 मोपतीके मेको नक कबल ङा गारपाइक्ब बाक्ब। मोपा ब्रेश्शोपुकी आन गेना हना यो लीब शोंप तामेक्ल। मारदे हना ख्रीस्त बेक्त। मिनु मेको आन ङोंइती ङा कबलम पशो पाप यो क्याम्साक्व। हिब्रू १२:२४; १तिमोथी २:५
हुश जारशोमी कबल खाप्शो
16 मिनु “गो बेक्ङा नोले गेनुङ” दे कागज ब्रेक्बमी आ पशो कबल बेक्म नोले ला खाप्ब। 17 ब्रेक्पाइक्ब मबेक्म सम्म आ ब्रेक्पाइश्शो खाप्ने मचाप्ब। बेक्म नोले ला खाप्ब। 18 ङोंइती पशो कबल यो हुश जारशोमी गाप्शो बाक्माक्त। 19 मोसामी मुर आन कली परमप्रभु यावे आ शेंशो अरेशो लोव़ नेंपाइक्ने थुम्शा, बाछा नु बोका आन हुश नु ब्वाक्कु क्याल्शा, हिसोप के सेल्शो ब्राक्सु कली लल ऊनमी फ्रेंशा, परमप्रभु यावे आ अरेशो लोव़ ङा किताब नु मुर नेल्ल आन कली ब्रुइक्तीमी बाक्त। गन्ती १९:६ 20 मिनु मेकोमी “परमप्रभु यावेमी इन कली पशो कबल एको हुशेमी खाप्तु” दे तुइक्पाइक्मी बाक्त। प्रस्थान २४:८ 21 मिनु मोपा थुम्शा, मुर आन कली खोदेंशो पा ताम्बु नु ताम्बुमी वोइश्शो बोसपुकीमी यो ब्रुइक्ता बाक्त। लेवी ८:१५ 22 थमा पा परमप्रभु यावे आ अरेशो लोव़ ब्रेक्शो खोदेंशो पा मारेइ मारेइ चोव़खो सेल्चा कली हुश ब्रुइक्चा माल्दा बाक्त। हुश मजारथु, पाप मक्याम्सीब, दे रुप्नय। लेवी १७:११
ख्रीस्तमी आ हुश चढ़ेशो
23 रागी ङा मोदेंशो थोव़क कली चोव़खो सेल्चा कली मोदेंशो माल्ताक्व हना, स्वर्गम बाक्शो कली चोव़खो सेल्चा कली मेको क्येङा रिम्शो चढ़ेचा माल्ताक्व। 24 मारदे हना ख्रीस्त मुरपुकीम सेल्शो ताम्बुमी मओव़। मेको स्वर्गम बाक्ब ताम्बु आ खोदेंशो ला बाक्त। तन्न मेको स्वर्गम ओव़त। मुल मेकोम परमप्रभु यावे आ ङोंइती आंइ पर्बम पुंइब। हिब्रू ७:२५; १यूहन्ना २:१ 25 ख्रीस्तमी आंम कली शुश खेयप चढ़ेचा ममाल्द। नेल्ल क्येङा ठेयब चढ़ेब चहिं बर्स बर्सम आंम हुश ममाइ, मार मार आन हुश कुरशा मेको नेल्ल क्येङा चोव़खो कोठा ओव़चा माल्दा बाक्त। 26 ख्रीस्त मोदेंशो बाक्शो हना, रागी सेल्चा रे मुल सम्म शुश खेयप श्येत जचा माल्द वा। तन्न मेकोमी रागी नुप्ची ना खेयप का पाप क्याम्चा कली आंम कली चढ़ेवा बाक्त। १कोरिन्थी १०:११; गलाती ४:४; हिब्रू १:३ 27 दोपा मुर खेयप का बेक्चा माल्नीमी नु मेको बेक्शा, निसाफ पचा पुंइसीनीम। उत्पत्ती ३:१९ 28 मोपा ख्रीस्त शुश मुर आन पाप क्याम्चा कली खेयप का आ हुश चढ़ेप्तु। मिनु लेंशा जाक्ब। पाप क्याम्थ चहिं मजाक्ब। तन्न मेको कली थमा सुइश्शा रिम्शा बाक्ब आन कली श्येत रे प्रोंइचा कली जाक्ब। हिब्रू १०:११,१२,१४