2
मीश आल खुप्शो
1 मिनु पिप अहासूरस आ गाइक्चा बेक्म नोले मेकोमी वास्ती आ पशो आ पर्बम नु मेको आ पर्बम ब्रेक्शो ब्रेक्स कली मिम्ताक्व। 2 मिनु पिप आ गेय पाइबपुकीमी पिप कली “इन कली दारशो नु कन्ने मीश आल माल्पतीन। 3 इन राज्य ङा, रागी नेल्ल ङा दारशो नु कन्ने मीश आल चाक्चा, दे मेकेर ङा ठेयब मुर आन कली लोव़ सोइक्तीन। मिनु मेको मीश आल आन कली सुसा दरवार ङा मीश मुर आन बाक्तीकेमी चाक्चा माल्नीम। मिनु मेको मीश मुर आन कली कोव़ब, इन गेय पाइब हेगे आ जिम्मामी वोइक्चा माल्नीम। मिनु मेको मीश आल आन कली ख्रेक्तीक नु ब्रोव़शो रिना पाइक्तीक मार मार यो गेचा माल्नीम। 4 मिनु गे तेको मीश आल कली दाक्नीनी, मेको कली वास्ती आ पा ङा पिपीम सेलीन” देंतेक्म। मिनु पिपमी मेको लोव़ दाक्ताक्व। मिनु मोदेंशो पाप्तु।
सुसा दरवारमी
5 मिनु सुसा दरवारमी मोरदेकै माइश्शो यहूदी मुर का बाक्माक्त। मेको बेन्यामीन थर ङा याइर आ तौ, शिमेइ आ चच, कीश आ युइ बाक्माक्त। १सामुएल ९:१ 6 बेबीलोन ङा पिप नेबुकदनेसरमी यरूसलेम रे यहूदा रागी ङा पिप येकोन्याह नु ग्याइश्शा लाइक्चा पुंइसीशो आन दातेमी मोरदेकै आ किकी पिपी कीश यो बाक्माक्त। २राजा २४:१५ 7 मिनु मोरदेकैमी आ बकान्छा आ तमी हदस्सा कली आ तमी खोदेंशो सेल्शा, थुल्शा वोइश्शो बाक्माक्त। मेको के आ आम आफ निम्फा बेक्शो बाक्ताक्स। मेकोमी हदस्सा कली एस्तर नें यो वोइश्शो बाक्माक्त। एस्तर रिम्शो नु दारशो मीश आल बाक्माक्त। मेको आ आम आफ बेक्सा नोले मोरदेकैमी मेको कली आंम तमी खोदेंशो पा दाक्शा, थुल्शो बाक्माक्त। एस्तर ८:१
एस्तर दरवारम लाइक्चा पुंइसीशो
8 मिनु पिप आ ग्रुंइशो ब्रेक्स नेंन्मे नोले, शुश मीश आल आन कली सुसा दरवारमी चाक्तेक्म। मिनु एस्तर कली यो अरु मीश आल नु काथा मीश मुर कोव़ब हेगे कली जिम्मा गेम्तेक्म। 9 मिनु एस्तर कली तशा, मेको हेगे थाम्पान ग्येरसाक्व। मिनु मेकोमी एस्तर कली दारपाइक्चा कली ग्योम्तीक, किप्तीक, ख्रेक्तीक नु रिम्शो जचा थोव़क नेल्ल गेप्तु। मिनु पिप आ दरवार ङा ७ जना नेल्ल क्येङा रिम्शो गेय पाइब मीश आल यो एस्तर कली गेप्तु। मिनु मीश मुर आन कली वोइक्तीक खिंमी एस्तर नु आ कली वारच पाइब आन कली नेल्ल आन क्येङा रिम्शो नु गारशो बाक्तीक गेप्तु। 10 मिनु ङोंइती मोरदेकैमी एस्तर कली “इ जात नु इ किकी पिपी सु बाक्नीमी, मेको मशोव़ङो” देंशो बाक्तीके, एस्तरमी सुइ आन कली मेको लोव़ मशोव़शो बाक्त। 11 एस्तर कली दोदेंशो बाक्मे? मार पवा, दे तुइक्चा कली मोरदेकै नाक्त किंत किंत मेको मीश आल बाक्तीक खिं आ लाङगा रे एर ओंथ गाक्तीक पाइबाक्त।
12 पिप अहासूरस आ बाक्तीकेम लचा क्येङा ङोंइती मीश आलपुकीमी ६ महिना सम्म मूरे तेल ख्रेक्सीशा, अर्को ६ महिना ब्रोव़शो रिना पाइश्शो तेल नु दारपाइक्तीक मार मार ख्रेक्सीशा, १२ महिना आंम कली दारपाइक्तीक गेय पचा माल्बाक्तेक्म। मोपा १२ महिना जाक्दीम नोले पिप अहासूरस आ बाक्तीकेमी मीश आल का का पा लचा माल्बाक्तेक्म। 13 मिनु मीश आलपुकी पिप आ दरवारम लमानु, मेको आन बाक्तीके रे मार मार लाइक्चा दाक्त्मे मेको लाइक्चा ताइबाक्तेक्म। 14 मोपा मेकोपुकी नाक्दो का का पा पिप आ बाक्तीकेम लशा, सुनी मेको अरु मीश आल बाक्तीक खिं ङा कोव़ब शा-आश्गज माइश्शो पिप आ गेय पाइब आ जिम्मामी बाक्चा कली लेत्चा माल्बाक्तेक्म। मिनु पिपमी मेको कली दाक्शा आ नें थिशा मब्रेत्ता सम्म लेंशा पिप आ बाक्तीकेम लचा मताइबाक्तेक्म।
एस्तर पिपीम दुम्शो
15 मिनु मोरदेकै आ बकान्छा अबीहेल आ तमी एस्तर पिप आ बाक्तीकेम लतीक पालो जाक्त। एस्तर पिप आ बाक्तीकेम लमेनु, मीश आल आन कली कोव़ब ठेयब मुर हेगेम मार मार गेवा, मेको ला लाइश्शा लमाक्त। अरु मारेइ मपुंइदा बाक्त। सु सुमी एस्तर कली तामे, मेको नेल्लेमी एस्तर कली दाक्त्मे बाक्त। 16 मिनु एस्तर कली पिप अहासूरस आ बाक्तीकेम लदमेनु, अहासूरस पिप दुम्शो ७ बर्स १० महिना जाक्दीश्शो बाक्माक्त। मेको महिना कली तेबेथ महिना देंबाक्तेक्म।
17 मिनु पिपमी मीश आल नेल्ल आन क्येङा एस्तर कली दाक्ताक्व। मिनु अरु आन क्येङा मेको कली योव़तु। मिनु एस्तर कली पिपीम आ सिरपेच गुप्शा, वास्ती आ पा ङा आ पिपीम सेल्तु। 18 मिनु नोले पिपमी एस्तर कली मान पचा कली हुकुम पाइब नेल्ल नु गेय पाइब आन कली ठेयब भोज का गेप्तु। मिनु रागी नेल्ल ङा मुर आन कली गेय मपथु बाक्चा गेशा, पिपम गेचा माल्शो मुर आन कली शुश इनाम गेम्तीमी।
मोरदेकैमी पिप कली प्रोंइशो
19 मेको कन्ने मीश आल आन कली लेंशा पिप आ दरवारमी चाक्गमेनु, मोरदेकै यो दरवार ङा ठेयब लाप्चोम बाक्शो बाक्त। 20 मोरदेकै आ देंशो खोदेंशो पा एस्तरमी आ किकी पिपी मार जात ङा बाक्मा, सु बाक्मा सुइ आन कली मशोव़शो बाक्त। मेकोमी आल बाक्म ना मोरदेकै कली टिशो खोदेंशो पा, ठेयब दुम्शा यो टिप्तु। 21 मेना मोरदेकै पिप आ दरवार ङा ठेयब लाप्चोमी बाक्शो बाक्त। मिनु सु जाक्म, दे कोव़ब, पिप आ ठेयब गेय पाइब बिग्थान नु तेरेश माइश्शो मुर चुरशा गारशा, पिप अहासूरस कली साइक्चा लोव़ पाम्से बाक्त। एस्तर ६:१-२ 22 मिनु मेको आस लोव़ मोरदेकैमी नेंशा तुइश्शा, एस्तर कली शेंदा बाक्त। मिनु एस्तरमी मोरदेकै आ नेंमी पिप कली लोव़ नेल्ल शोव़तु। 23 मिनु मेको लोव़ हिल्लो हिक्सी पामेनु, थमा बाक्त, दे पिपमी तुइक्ताक्व। मिनु मेको ठेयब गेय पाइब आस कली थामम क्युक्शा साइक्तेक्म। मिनु नोले पिप आ ङोंइती मेको लोव़ नेल्ल इतिहास ब्रेक्तीक किताबमी ब्रेक्ताक्म।