21
यहूदा ङा पिप मनस्से
२इतिहास ३३:-
1 मनस्से पिप दुम्मेनु, १२ बर्स दुम्शो बाक्माक्त। मिनु मेकोम यरूसलेमम ५५ बर्स सासन पवा बाक्त। मेको आ ममा आ नें हेफ्सीबाह बाक्माक्त। 2 मेकोम परमप्रभु यावे आ ङोंइती मार मरिम्शो बाक्मे, मेको पवा बाक्त। परमप्रभु यावेमी इस्राएली आन ङोंइती रे खेरशो रागी रागी ङा मुर आन ग्रांग्रा दिशो गेय पवा बाक्त। 3 मेकोमी आ आफ हिज्कीयाहमी खतम पोक्शो डांडा ङा थानपुकी लेंशा सेला बाक्त। मेकोम इस्राएल ङा पिप आहाब खोदेंशो पा बाल कली चढ़ेतीक नु मूर्ति पाइश्शो थाम सेला बाक्त। इस्राएल ङा पिप आहाब खोदेंशो पा मेकोमी नां तास्ला नु सोरुल आन कली खुम्की पा बाप्शा पूजा पवा बाक्त। १राजा १६:३३ 4 मेकोमी परमप्रभु यावे आ खिंमी मेको देवी देवता आन कली चढ़ेतीकपुकी सेला बाक्त। परमप्रभु यावेमी मेको खिं आ पर्बम “यरूसलेमम गो आं नें वोइक्नुङ” देंशो बाक्माक्त। 5 मिनु मेकोमी परमप्रभु यावे आ खिं आ लाङगा निम्फामी नां तास्ला नु सोरुल आन कली चढ़ेतीक सेला बाक्त। २राजा २३:१२ 6 मेकोमी आ तौ कली चोशा चढ़ेवा बाक्त। मिनु मन्तर तन्तर, टुना मुना पा, बेक्शो मुर रे लोव़ पचा गेशा, लिंक्यु कोव़ङा बाक्त। मेकोम परमप्रभु यावे आ ङोंइती शुश मरिम्शो पवा बाक्त। मिनु मेको कली थाम्पा गाइक्पदा बाक्त। २राजा १६:३; लेवी १८:२१ 7 मेकोम आ मुशा सेल्शो अशेराह देवी आ मूर्ति परमप्रभु यावे आ खिंम वोदा बाक्त। परमप्रभु यावेमी मेको खिं आ पर्बम दाऊद नु आ तौ सोलोमन आस कली “गो एको इस्राएल आ थर नेल्ल आन रे आं योव़शो यरूसलेम सहर ङा एको खिंम आं नें गेना हना यो वोइक्नुङ। १राजा ८:२९; १राजा ९:३ 8 मिनु इस्राएलीम आं शेंशो होस पना पन बाक्तेक्म हना, मोसा रे पा, मेको आन कली आं अरेशो पना पन बाक्तेक्म हना, मेको आन किकी पिपी आन कली आ गेशो रागी प्रोंइशा गाक्चा ममाल्नीम। 9 तन्न मुरपुकीम मेको नेंसीन मनेन्मे बाक्त। मनस्सेम मेको आन कली हेंथे लां खोइक्पाइश्शो बाक्माक्त। मिनु मेकोपुकीम परमप्रभु यावेम इस्राएली आन ङोंइती रे खतम पोक्शो रागी रागी ङा मुर आन क्येङा यो शुश मरिम्शो पामे बाक्त” देंमाक्त।
10 मिनु परमप्रभु यावेम आ गेय पा आ लोव़ पाइब आन रे पा 11 “यहूदा ङा पिप मनस्सेम एको ग्रांग्रा दिशो गेय पशो बाक्ब। मेकोम ङोंइती बाक्शो एमोरी आन क्येङा यो शुश ग्रांग्रा दिशो गेय पशो बाक्ब। मिनु मेकोमी यहूदा ङा मुर आन कली मूर्ति पूजामी पाप पपाइश्शो बाक्ब” देंमाक्त। 12 मोपतीके परमप्रभु यावे, इस्राएली आन परमप्रभुमी “गो यरूसलेम नु यहूदाम शुश खतम दुम्तीक चाक्नुङ। मेको नेंब आन नोफामी ग्रीब। यसैया १९:३ 13 गो सामरीया कली पुक्तीकेमी यरूसलेम कली पुक्नुङ। गो आहाब आ खिं कली थाप्शो डोरीम यरूसलेम कली थाप्नुङ। मुरपुकीम दोपा थाल शेक्शा गुक्शा वोइक्नीमी, मोपा गो यरूसलेम कली शेक्शा गुक्शा वोइक्नुङ। 14 गो आं लीशो मुर आन कली प्रोंइशा सोइक्नुङमी। मिनु मेको आन कली आन जोरी सत्रु आन गुइमी गेनुङमी। मेको आन जोरी सत्रुम ग्याइश्शा लाइक्चा पुंइसीनीम। 15 मारदे हना मेकोपुकीम आं ङोंइती मार मरिम्शो बाक्मे, मेको पाम्तेक्म। मेको आन किकी पिपी आन कली इजीप्त रे ग्रुंइशा चाक्गु रे मुल सम्म आं कली गाइक्पाइक्स ङा गाइक्पाइक्स बाक्शो बाक्नीम” देंमाक्त।
16 मेको क्येङा लाक्शा यो मनस्सेम दोस मताइब शुश मुर आन हुश शाइक्पाइश्शा, यरूसलेम आ सुर का रे अर्को सुर सम्म प्रिंदा बाक्त। मिनु मेकोम यहूदा कली पाप पपदा बाक्त। मिनु मेकोपुकीम परमप्रभु यावे आ ङोंइती मार मरिम्शो बाक्मे, मेको पामे बाक्त। २राजा २४:४; भजन संग्रह १०६:३८
17 मनस्से आ पशो अरु गेय, मेको आ पशो नेल्ल, मेको आ पशो पाप, मार, मेको यहूदा ङा पिप आन इतिहासम ब्रेक्शो मबाक्बा ङा? 18 मिनु मनस्से बेक्माक्त। मिनु मेको उज्जा आ खिं ङा रूम थिम्चा पुंइसे बाक्त। मिनु मेको आ पा ङा आ तौ आमोन पिप दुम्माक्त।
यहूदा ङा पिप आमोन
19 आमोन पिप दुम्मेनु २२ बर्स दुम्शो बाक्माक्त। मेकोम यरूसलेमम बर्स निक्शी सासन पवा बाक्त। मेको आ ममा आ नें मेशुल्लेमेथ बाक्माक्त। मेको योत्बाह ङा हारुच आ तमी बाक्माक्त। 20 मेकोम आ आफ मनस्से खोदेंशो पा, परमप्रभु यावे आ ङोंइती मार मरिम्शो बाक्मे, मेको पवा बाक्त। 21 मेको आ आफ आ लांम गाक्माक्त। मिनु आ आफोम पूजा पशो मूर्ति आन ङोंइती खुम्की पा बाम्माक्त। मिनु मेको आन कली पूजा पवा बाक्त। 22 मेकोम परमप्रभु यावे, आ किकी पिपी आन परमप्रभु कली प्रोना बाक्त। मेको परमप्रभु यावे आ लांम मगाक्माक्त। 23 आमोन आ गेय पाइबपुकीम मेको कली साइक्चा माल्मे बाक्त। मिनु मेको कली पिप आ खिंमीन सदमे बाक्त। 24 मिनु मेको रागी ङा मुरपुकीम मेको पिप आमोन कली साइक्ब मुर नेल्ल आन कली सदमे बाक्त। मिनु मेको आ तौ योसीयाह कली आ पा ङा पिप सेल्मे बाक्त। 25 आमोन आ पशो अरु गेय, मेको आ पशो नेल्ल, मार, मेको यहूदा ङा पिप आन इतिहासम ब्रेक्शो मबाक्बा ङा? 26 मिनु मेको बेक्शा उज्जा आ तुरसुम थिम्चा पुंइसे बाक्त। मिनु मेको आ पा ङा आ तौ योसीयाह पिप दुम्माक्त।