1 दाक्‍तीक पाइश्‍शो मुर दुमीने। परमप्रभु यावे आ सोक्‍तीम पपाइश्‍शो गेय शुश मालीन। परमप्रभु यावे आ लोव़ पतीक शुश मालीन। 2 परमप्रभु यावे आ सोक्‍त आ लोव़ पाइबमी मुर कली लोव़ मपाइब। तन्‍न परमप्रभु यावे कली लोव़ पाइब। सुइमी मेको आ लोव़ मरुप्‍नीम। मेकोमी परमप्रभु यावे आ सोक्‍त आ पतीकेमी ख्रुइश्‍शो लोव़ पाइब। प्रेरित २:४; प्रेरित १०:४६ 3 परमप्रभु यावे आ लोव़ पामेनु, मुर आन थुं बारपाइक्‍ब। रिम्‍शो गेय पपाइक्‍ब, नु थुं खाइश्‍शो आन कली सापाइक्‍ब। 4 परमप्रभु यावे आ सोक्‍त आ लोव़ पाइबमी आंम थुं कली ला बारपाइक्‍ब। तन्‍न परमप्रभु यावे आ लोव़ पाइबमी ग्रुम्‍तीक खिं ङा मुर आन थमा सुइक्‍तीके बारपाइक्‍ब। 5 गे नेल्‍लेम परमप्रभु यावे आ सोक्‍त आ लोव़ पशो दाक्‍नुङ। तन्‍न मेको क्‍येङा परमप्रभु यावे आ लोव़ पशो तचा दाक्‍नुङ। परमप्रभु यावे आ सोक्‍त आ लोव़ पाइब क्‍येङा, परमप्रभु यावे आ लोव़ पाइब ठेयब बाक्‍ब। तन्‍न सोक्‍त आ लोव़ आ अर्थ शेंब बाक्‍त हना, ग्रुम्‍तीक खिं ङा मुर आन कली रिम्‍शो दुम्‍ब। १कोरिन्‍थी १२:१०

6 आं लोक्‍बपुकी, गो परमप्रभु यावे आ सोक्‍त आ लोव़ पा, इन ग्रुम्‍तीकेमी जाक्‍ती हना, इन कली मरुप्‍चा ङा बाक्‍त। गो इन कली नोले दुम्‍तीक लोव़, जोक्‍तीक तुइक्‍तीक लोव़, परमप्रभु यावे आ लोव़ नु आ शेंतीक लोव़ पाता हना चहिं इन कली रिम्‍शो दुम्‍ब। १कोरिन्‍थी १२:८ 7 ताप्‍तीके मुराली, तार पाइश्‍शो ठेयब ताप्‍तीके ताप्‍मेनु, हेंथे पा ताप्‍तेक्‍म हना, मार ताप्‍शो बाक्‍बा, दोपा तुइक्‍नीमी? 8 लडाइ पची ना तुराही ताप्‍बमी मरुप्‍चा ङा पा ताप्‍तु हना, लडाइ पाइब लाइनीमी ङा? 9 मिनु गेपुकीमी सोक्‍त आ लोव़ पनीनु, इन देंशो लोव़ सुमी रुप्‍नीमी ङा? इन मोदेंशो प‍शो लोव़ नेल्‍ल फशेम योल्‍शो खोदेंशो दुम्‍ब। 10 रागीमी लोव़ शुश बाक्‍नीमी। मेको लोव़ नेल्‍ल रुप्‍चा ङा बाक्‍नीमी। 11 तन्‍न गो मेको लोव़ रुप्‍ने मचाप्‍ता हना, गो अर्को रागी ङा मुर दुम्‍नुङ। मिनु मेको लोव़ पाइब आं कली यो अर्को रागी ङा मुर दुम्‍ब। 12 गे इन दातेमी मोदेंशो बाक्‍ब। परमप्रभु यावे आ सोक्‍तीम पपाइश्‍शो गेय पचा दाक्‍ताक्‍नी हना, गे इन ग्रुम्‍तीक खिं ङा मुर आन थमा सुइक्‍तीक बोल्‍यो दुम्‍चा कली गेय पने।

13 मोपतीके सुमी परमप्रभु यावे आ सोक्‍त आ लोव़ पाइबा, मेकोमी आ अर्थ शेंचा कली पुनल। १कोरिन्‍थी १२:१० 14 गो सोक्‍त आ लोव़ पा प्रार्थना पङानु, आं थुंमी मारेइ मरुप्‍नुङ। 15 गो मुल मार पाइनुङ देंशा हना, गो सोक्‍त आ लोव़मी प्रार्थना पङानु, आ थुंमी यो प्रार्थना पाइ‍नुङ। परमप्रभु यावे आ सोक्‍तीम कुम्‍सो पङानु, आं थुंमी यो कुम्‍सो पाइनुङ। एफिसी ५:१९ 16 मिनु गेपुकी खुम्‍सीशा बाक्‍नीनु, सोक्‍त आ लोव़म आसीक गेशा, परमप्रभु यावे कली “गे रिम्‍शो पाइब बाक्‍नीनी” देंतीनी हना, दोपा मरुप्‍ब मुरुमी “आमेन” देंने चाप्‍बा ङा? 17 इन लोव़ रिम्‍शो बाक्‍त हना यो, अर्को मुर आ थुं मबारपाइश्‍शो बाक्‍त। 18 गो परमप्रभु यावे कली “गे रिम्‍शो पाइब बाक्‍नीनी” देंनुङ। मारदे हना गो सोक्‍त आ लोव़ नेल्‍ल इन क्‍येङा शुश पाइनुङ। 19 तन्‍न थमा सुइक्‍ब आन ग्रुम्‍तीकेमी बाक्‍शा, मुर आन कली शेंचा नु रुप्‍पाइक्‍चा कली गो १० हजार सोक्‍त आ पशो लोव़ क्‍येङा रुप्‍चा ङा ५ ओटा लोव़ पचा रिम्‍शो लाक्‍ती।

20 आं लोक्‍बपुकी, आलमी मिम्‍शो खोदेंशो पा ममिम्‍तीने। मरिम्‍शो गेय पचा कली मजोक्‍ब आल खोदेंशो दुम्‍शा बाक्‍कीने। तन्‍न इन मिम्तीकेमी निप्‍स पाइश्‍शो मुरुम मिम्‍शो खोदेंशो पा मिम्‍तीन। एफिसी ४:१४; यसैया २८:११-१२ 21 मिनु परमप्रभु यावेमी आ अरेशा ब्रेक्‍पाइश्‍शो लोव़मी “गो ङोन रागी ङा मुर आन मतुइश्‍शो लोव़ पतीकेमी नु रागी ङा मुर आन लोव़मी मेको नु लोव़ पाइक्‍नुङ। मो हना यो मेकोपुकीम आं लोव़ मनेंनीम” दे प्रभुमी देंत, दे ब्रेक्‍शो बाक्‍ब। यसैया २८:११,१२ 22 परमप्रभु यावे आ सोक्‍त आ लोव़ पतीके थमा सुइक्‍ब आन कली ममाइ, थमा मसुइक्‍ब आन कली चिन्‍ड दुम्‍ब। परमप्रभु यावे आ लोव़ चहिं थमा मसुइक्‍ब आन कली ममाइ, थमा सुइक्‍ब आन कली बाक्‍ब। 23 मिनु थमा सुइक्‍ब नेल्‍ल खुम्‍सीशा बाक्‍मानु, मुर नेल्‍लेमी परमप्रभु यावे आ सोक्‍तीमी पपाइश्‍शो मतुइश्‍शो लोव़ पना पन बाक्‍तेक्‍म हना, अरु मुर, थमा मसुइक्‍ब ओव़शा, इन मोदेंशो लोव़ प‍शो नेंशा “गशो बाक्‍तेक्‍म” दे मदेंनीमी ङा? 24 तन्‍न गे नेल्‍ल परमप्रभु यावे आ लोव़ पना पन बाक्‍नीनु, थमा मसुइक्‍ब, अरु मुर ओव़शा, इन मोदेंशो नेंशा, आ थुंमी मिम्‍शा, आ मरिम्‍शो पशो नेल्‍ल फ्रुक्‍ब। 25 आ थुं ङा ख्रुइश्‍शो नेल्‍ल तुइश्‍शा, बाप्‍शा “परमप्रभु यावे ठेयब बाक्‍ब” देंशा, परमप्रभु यावे थमा पा, इन दातेमी बाक्‍ब, दे तुइक्‍ब। यूहन्‍ना १६:८

26 आं लोक्‍बपुकी, मुल मार देंनुङ देंशा हना, गे खुम्‍सीशा बाक्‍नीनु, नेल्‍ल इन के गेय का का बाक्‍ब। कामी परमप्रभु यावे कली कुम्‍सो पाइब, कामी लोव़ शेंबा, कामी नोले दुम्‍तीक लोव़ पाइब, कामी परमप्रभु यावे आ सोक्‍त आ लोव़ पाइब नु अर्कोमी मेको लोव़ आ अर्थ शेंब। मेको गेय नेल्‍ल थुं बारपाइक्‍चा कली दुम्‍ल। १कोरिन्‍थी १२:८-१०; एफिसी ४:१२ 27 परमप्रभु यावे आ सोक्‍त आ लोव़ पामेनु, निक्‍शीमी कि सांमी पामेक्‍ल। मिनु का का पा पचा माल्‍नीम। मिनु मुर कामी आ अर्थ शेंचा माल्‍ब। 28 तन्‍न मेको लोव़ आ अर्थ शेंब मबाक्‍त हना, सिक्‍सी पा बाक्‍चा माल्‍नीम। सोक्‍त आ लोव़ पाइबमी आंम थुं बारपाइक्‍चा कली, परमप्रभु यावे कली लोव़ पवल। 29 परमप्रभु यावे आ लोव़ पामेनु, निक्‍शीमी कि सांमी पामेक्‍ल। मिनु नेंबपुकीमी “मेको लोव़ परमप्रभु यावे आ लोव़ नु गारबा देय मगारबा?” दे नाक्‍चा माल्‍नीमी। प्रेरित १७:११; १थिस्‍सलोनिकी ५:२१ 30 तन्‍न मेकेर बाक्‍ब कामी परमप्रभु यावे आ नोले दुम्‍ब लोव़ तुइक्‍ताक्‍व हना, ङोंइती ङा लोव़ पाइब सिक्‍सी पा बाक्‍ल। 31 गे नेल्‍लेमी का का पा परमप्रभु यावे आ लोव़ पने चाप्‍नीनी। मो पाइतीनी हना नेल्‍लेमी शेंसीने चाप्‍नीनी। गे नेल्‍ल इन थुं बारब। 32 परमप्रभु यावे आ लोव़ पाइब आन सोक्‍त मेको आन गुइम बाक्‍ब। 33 मारदे हना परमप्रभु यावे खल बल ङा परमप्रभु मबाक्‍ब। मेको थुं नाइश्‍शा बाक्‍तीक परमप्रभु बाक्‍ब।

34 मीश मुरपुकी लोव़सी मपथु, सिक्‍सी पा बाक्‍मल। मेकोपुकी ब्‍वाक्‍चा मताइनीम। मारदे हना अरेशो लोव़मी मोदेंशो ब्रेक्‍शो बाक्‍ब। मिनु मेको लोव़ मेकोपुकीम टिचा माल्‍नीम। १तिमोथी २:११-१२; उत्‍पत्ती ३:१६ 35 लोव़ मरुप्‍तेक्‍म हना, आन खिं लमा नोले आन वोंइश आन कली हिल्‍लो पामेक्‍ल। थमा सुइक्‍ब आन ग्रुम्‍तीकेमी चहिं लोव़ मपामेक्‍ल, मारदे हना मुने दुम्‍ब। 36 मार, परमप्रभु यावे आ लोव़ इन रे पा जाक्‍म ङा देय इन कली ला जाक्‍म? 37 इन दातेमी परमप्रभु यावे आ लोव़ पाइब नु आ सोक्‍तीम ब्रीशो मिम्‍ब मुरुमी आं ब्रेक्‍शो लोव़ प्रभु आ देंशो लोव़ बाक्‍ब दे तुइक्‍तमेक्‍ल १यूहन्‍ना ४:६ 38 तन्‍न सुइमी “पावल आ शेंशो प्रभु आ लोव़ मबाक्‍ब” देंत हना, मेको आ लोव़ यो थमा मसुतीन। 39 मोपतीके आं लोक्‍बपुकी, परमप्रभु यावे आ लोव़ पचा कली शुश बोल पने। मिनु परमप्रभु यावे आ सोक्‍त आ लोव़ पाइब आन कली मतेक्‍कीन। 40 खुम्‍सीशा बाक्‍नीनु, खल बल मपथु, नेल्‍ल रिम्‍शो दुम्‍चा माल्‍ब। १कोरिन्‍थी १४:३३; कलस्‍सी २:५