1 आं लोक्‍बपुकी, गो आंइ इस्राएली किकी पिपी आन पशो आ पर्बम लोव़ का निक्‍शी शेंनन्‍नी। आंइ किकी पिपी नेल्‍ल गोस्‍स आगाम बाक्‍शा, समुन्‍द्र शोक्‍सीशा लमा बाक्‍त। प्रस्‍थान १३:२१; प्रस्‍थान १४:२२ 2 मिनु नेल्‍ल गोस्‍स आगा गाक्‍शा, समुन्‍द्र शोक्‍शा, मोसा आ नेंम ब्‍वाक्‍कुम ख्रुम्‍शा ग्रुंइचा पुंइसाक्‍मा बाक्‍त। 3 नेल्‍लेमी परमप्रभु यावेम गेशो जचा थोव़क जामे बाक्‍त। प्रस्‍थान १६:४,३५; ब्‍यवस्‍था ८:३ 4 नेल्‍लेमी परमप्रभु यावेम गेशो सोक्‍त ङा ब्‍वाक्‍कु तूङमे बाक्‍त। मिनु मेको आन नोले खोइक्‍बम सेरथे फुल्‍लु रे ब्‍वाक्‍कु तूङमे बाक्‍त। मिनु मेको सेरथे फुल्‍लु ख्रीस्‍त बाक्‍माक्‍त। प्रस्‍थान १७:६ 5 मो हना यो मेको का निक्‍शी आन कली तशा, परमप्रभु यावे गाइक्‍ता बाक्‍त। मिनु गोरशो रागीमी प्रोना बाक्‍त। गन्‍ती १४:२२-३२ 6 मोदेंशो मरिम्‍शो थुं पाइश्‍शो मुर मदुमीन, होस पा बाक्‍कीन। 7 मेको आन दाते ङा मूर्ति पूजा पाइब खोदेंशो मदुमीन। मार ब्रेक्‍शो बाक्‍ब देंशा हना “मुरपुकी जचा तूचा कली निस्‍साक्‍म। मिनु सिल पचा कली बोक्‍तेक्‍म” दे ब्रेक्‍शो बाक्‍ब। मेको आन पशो खोदेंशो मपने। प्रस्‍थान ३२:६ 8 गोपुकीम तेल्‍लेम पचा मदुम्‍ब। मेको आन दाते ङा का निक्‍शीमी ग्रांग्रा दिचा ङा गेय पामे बाक्‍त। मिनु नाक्‍त कामीन २३ हजार मुर साइक्‍चा पुंइसाक्‍मा बाक्‍त। गन्‍ती २५:१९ 9 गोपुकीम प्रभु कली नाक्‍चा मदुम्‍ब। मेको आन दाते ङा का निक्‍शीमी मो पाम्‍तेक्‍म। मिनु बुस्‍स रे पा साइक्‍चा पुंइसमा बाक्‍त। गन्‍ती २१:४-६

10 गोपुकीम गन गन पचा मदुम्‍ब। मेको आन दाते ङा का निक्‍शीम मोदेंशो पामे बाक्‍त। मिनु खतम पाइबमी मेको आन कली खतम पोक्‍गा बाक्‍त। गन्‍ती १४:२,३५-३६; हिब्रू ३:११,१७ 11 मेको आन मोदेंशो दुम्‍शो तुइश्‍शा, गोपुकीमी रुब्‍यल, दे एको लोव़ नेल्‍ल ब्रेक्‍शो बाक्‍त। एको रागी नेल्‍ल जाम्‍शा लचा चिक्‍शो बाक्‍त। १पत्रुस ४:७ 12 “गो ठीक बाक्‍नुङ” देंब होस पा बाक्‍म‍ल। मारदे हना पाप पने चाप्‍नीम। 13 मुल सम्‍म गे फाल्‍ने मचाप्‍चा ङा पा थुं नाक्‍‍चा मपुंइसीनी। परमप्रभु यावे थमा सुइक्‍चा माल्‍शो बाक्‍ब। इन फाल्‍ने चाप्‍तीक सक्ति कोव़शा, इन फाल्‍ने मचाप्‍चा ङा पा थुं थाम्‍चा मगेब। तन्‍न गेप्‍तु हना यो, इन फाल्‍ने चाप्‍तीक सक्ति बारपाइक्‍ब दे तुइक्‍तीने। भजन संग्रह ६८:२०; २पत्रुस २:९

14 आं दाक्‍शो लोक्‍बपुकी, मूर्ति पूजा पचा प्रोनीन। १यूहन्‍ना ५:२१ 15 गो लोव़ रुप्‍ब मुर आन कली लोव़ पाइनुङ। मोपतीके आं देंशो ठीक बाक्‍बा कों, ठीक मबाक्‍बा, मिम्‍ने चाप्‍नीनी। 16 गो कचौरा कली आसीक गेनीकी। मेको आसीक ङा कचौरा रे तूयानु, ख्रीस्‍त आ हुश मिम्‍शा, आ मुर दुम्‍शा, मेको नु काथा बाक्‍शो दुम्‍नय। गोपुकीमी शोब्‍ले जिक्‍शा योक्‍शा जयानु, ख्रीस्‍त आ रां मिम्‍शा, आ मुर दुम्‍शा, काथा बाक्‍शो दुम्‍नय। १कोरिन्‍थी ११:२३-२६; मत्ती २६:२७; प्रेरित २:४२ 17 गो शुश बाक्‍यानु, रां का खोदेंशो दुम्‍शा बाक्‍य। मोपतीके शोब्‍ले का बाक्‍ब। मिनु गो नेल्‍लेम मेको शोब्‍ले का रे जाइनय। १कोरिन्‍थी १२:२७; रोमी १२:५ 18 आंइ इस्राएल ङा चढ़ेबपुकीमी चढ़ेशो गेय मिम्‍तीने। चढ़ेबपुकीमी मारेइ मारेइ क्‍योरशा, मेको चढ़ेशो जाइनीम ब्‍वाइनीम। मो पामेनु, चढ़ेतीके नु काथा बाक्‍शो खोदेंशो दुम्‍नीम। लेवी ७:६ 19 मिनु आं देंशो लोव़ मार रुम्‍सीब देंशा हना, मूर्ति कली चढ़ेशो ठेयब बाक्‍बा कों? मूर्तिपुकी ठेयब नमी कों? १कोरिन्‍थी ८:६ 20 अर्को रागी ङा मुर आन चढ़ेशो परमप्रभु यावे कली ममाइ, वोल आन कली चढ़ेनीम। मोपा मेकोपुकी वोल नु काथा बाक्‍ब दुम्‍नीम। मिनु गो इन कली वोल नु काथा बाक्‍शो तचा मदाक्‍नुङ। 21 गे प्रभु आ कचौरा रे तूतीनी हना, वोल आन कली चढ़ेशो रे तूने मचाप्‍नीनी। गे प्रभु आ भोज नु वोल आन कली चढ़ेशा जने मचाप्‍नीनी। मत्ती ६:२४; २कोरिन्‍थी ६:१५-१६ 22 गोपुकीम प्रभु कली रुश पपाइक्‍चा दुम्‍बा ङा? गो प्रभु क्‍येङा ठेयब नया ङा?

23 मारेइ मारेइ ठीक बाक्‍ब। तन्‍न गेय का निक्‍शी चहिं इन कली रिम्‍शो मदुम्‍ब। मारेइ मारेइ ठीक बाक्‍तेक्‍म हना यो, का निक्‍शीम इन थमा सुइक्‍तीक मबारपाइक्‍नीम। १कोरिन्‍थी ६:१२ 24 होस पांइसीने, आंम इन कली ला मिम्‍चा प्रोंइशा, अरु आन कली यो रिम्‍शो दुम्‍ल दे मिम्‍शा गेय पने। रोमी १५:२; फिलिप्‍पी २:४ 25 श्‍ये ब्‍वचा आ पर्बम “श्‍ये ग्‍याप्‍थ लनीनु ‘चढ़ेशो श्‍ये कों’ दे हिल्‍लो मपने। मारेइ ममिम्‍थु ग्‍यापीन” दे शेंनन्‍नी। रोमी १४:२-१०,२२ 26 रागी नु रागीमी मार मार बाक्‍मा, मेको नेल्‍ल प्रभु के बाक्‍ब दे रुपीने। भजन संग्रह २४:१ 27 मिनु ख्रीस्‍त कली थमा मसुइक्‍बपुकीमी इन कली खमे जथ ब्रेम्‍मानु, गे लचा थुं पा लाइतीनी हना, मारेइ हिल्‍लो मपथु, ममिम्‍थु ग्‍येरसीशा जने ब्‍वने। 28 गे नु काथा बाक्‍शा जाइबपुकीमी “एको चढ़ेशो बाक्‍ब” दे तुइक्‍पाइक्‍तेक्‍म हना, मेको मुर आ पर्बम नु थुं ग्‍येरसीशो दुम्‍चा आ पर्बम मेको मजने मब्‍वने। १कोरिन्‍थी ८:७ 29 थमा सुइक्‍बपुकीमी चढ़ेशो मजाइनीम मब्‍वाइनीम, दे तुइक्‍नीम। मिनु इन कली जशो ब्‍वशो तशा, मेको आन थुं क्‍याल्‍नीम। आं जचा ब्‍वचा आ पर्बम आं अधिकार बाक्‍ब। मारदे अरुम शेंचा माल्‍नीमी? 30 गो प्रभु कली “गे रिम्‍शो पाइब बाक्‍नीनी” देंशा, मारेइ मारेइ जाइनुङ ब्‍वाइनुङ। तन्‍न आं जशो ब्‍वशो सुइमी मरिम्‍शो मलाक्‍मल, दे यो मिम्‍नुङ। १तिमोथी ४:४

31 मोपतीके मार जाइतीनी ब्‍वाइतीनी हना यो, तूतीनी हना यो, मार पाइतीनी हना यो परमप्रभु यावे कली ठेयब सेल्‍चा कली पने। कलस्‍सी ३:१७ 32 यहूदी नु ग्रीक आन कुल, परमप्रभु यावे कली थमा सुइक्‍ब आन कुल, मुर नेल्‍ल आन कुल, गेना हना यो रिम्‍शो गेय पने। रोमी १४:१३ 33 गो मोदेंशो पा नेल्‍ल आन कली ग्‍येरपाइक्‍चा ङा गेय पचा दाक्‍नुङ। आंम आं कली ममिम्‍सीथु, मेको आन कली रिम्‍शो दुम्‍ल, दे मिम्‍शा, गेय पाइनुङ। “शुशेमी ख्रीस्‍त कली थमा सुइश्‍शा, आ मुर दुम्‍मल” दे मिम्‍शा बाक्‍ती। १कोरिन्‍थी ९:२०-२२