9
Loi gha mbaŋa ghatha
1 Ma thuwe Giya Loi i ndeghathɨ e ghamba vowo ghadidiye na i dage e ghino iŋa:
“U ŋge Ŋgolo Boboma gha tu iya yamoena. U ŋge vurɨgheghe moli na ŋgolona laghɨye i mbarɨrɨ ŋgolouya.
U taga ŋgɨlaŋgɨlaŋgi na thɨ dobu gharɨgharɨna e umbalɨnji.
Ne ya gaboŋgiya thavala mbe inanji e gaithɨ tɨne.
Mane regha i vo,
mane regha i voghawe. 2 Othembe ne thɨ tɨgha doda i nja thambe,
nɨmaŋguke ne i bigi voreŋaŋgi gheko.
Othembe ne thɨ raka voro e buruburu
ne ya bigi njoŋaŋgi.
3 Othembe ne vethɨ kubaro e ou Kamel vwatae,
ne ya tamweŋgi na ya laweŋgi.
Othembe ne thɨ kubaro e maraŋgu e njighɨko tɨne bode moli,
ne ya dage weya njighɨko thetheghanɨniye thɨ gharɨŋgi.
4 Othembe thoŋgo ghanji rathɨghɨya thɨ vaŋguŋgi na vethɨ mebwabwari e vanautuma regha,
ne yaŋa na thɨ gaboŋgi e gaithɨ gha ghalithɨ.
Maraŋgu mbene i na vara weŋgi;
na ne thɨ vaidiya mbwara, ma thovuye.”
5 Mbaŋa Giya Loi Vurɨvurɨghegheniye i vɨghathɨgha yambaneke,
ne i mbarɨmbarɨrɨ na gharɨgharɨ thɨ raŋiŋgiya thavala thiya mare.
Yambaneke laghɨye ne i thotho ŋgoreiya Walaghɨta Nael,
na ne i dobu ŋgoreiye Nael ina Ijipt.
6 Giya Loi Vurɨvurɨghegheniye i vatadɨ le ŋgolo e buruburuko
na i vakatha gha yayaoko e yambaneke.
I kula voreŋa mbwa e njighɨko tɨne
na i liŋgi yathu e yambaneke vwata.
Amalaghɨniye idae Giya.
7 Giya Loi iŋa,
“O Isirel gharɨgharɨniye, ghemi e maraŋgu hu mboromboro weimiyaŋgiya Itiyopiya gharɨgharɨniye.
Va ya vaŋgu raŋgiyaŋgi Isirel gharɨgharɨniye Ijipt e tɨne, Pilistiya gharɨgharɨniye Krit e tɨne na Siriya gharɨgharɨniye Kirɨ e tɨne.
8 Emunjoru Giya Loi Ravurɨgheghe marae mbe ina vara weŋgi vanautumako raitharɨ Isirel.
Ne ya mukuwoŋgi e yambaneke vwatae,
ko iyemaeŋge Jeikob orumburumbuye mane ya mukuwo vaoŋgi.”
Giya Loi iŋa.
9 “Ne ya variye ghalɨŋaŋgu na thɨ (loloŋgiya) Isirel gharɨgharɨniye ŋgoreiya thɨ (lolo) muthu e (lolo) na ma wokɨwokɨye mun thɨ dobu.
Ne ya (lolo) na ya vaŋgu raŋgiyaŋgiya gharɨgharɨ raraitharɨ vanautumake wolaghɨye e tɨnenji.
10 Tharɨ gha ravakathako wolaghɨye ne thɨ gabovaoŋgi e gaithɨ gha ghalithɨ — iya thavala thɨŋa, ‘Loi mane i vatomwe tharɨ i mena evasiwanda.’ ”
Giya Loi i vaŋgunjoghaŋgi Isirel gharɨgharɨniye
11 Giya Loi iŋa,
“Ne e mbaŋako iyako tɨne
ne ya vatadɨ njogha Deivid le ghamba mbaro
kaiwae kaero ŋgoreiye ŋgolo i dobu na i marakaraka.
Ne ya vatadɨ njogha gha ganako.
Ne ya vatadɨ njogha na tembe ŋgoreiyeva va i vivako.
12 Na mbala Isirel gharɨgharɨniye thɨ kivwalaŋgi Idom na budakai mbe ina e ghamba mbaroko tɨne na vanautumako wolaghɨye iya mbaŋa regha va thɨ tabo lo ghamba mbaro.”
Giya Loi ghalɨŋae ŋgoreiye iyako iyava i vakatha thiya yomara.
13 Giya Loi iŋa,
“Wo hu thuwe, mbaŋa ma iya i menamenake mbaŋaniye thelauko ne i thovuye na i madi.
Ghanɨŋga ne thɨ maya thɨ mweghe e umaumako tɨnenji.
Uloulo na kabu ne thɨ vembelembeleŋgi, waen uneune ne lemoyo na gharɨgharɨ ma valɨkaiwanji thɨ imbɨvao.
Waen uneune nɨkinji ne thɨ voru njogha e ououko thɨ kabuŋgikowe
na i voru njogha e bobokuluŋgiko.
14 Ne ya vaŋgu njoghaŋgi lo gharɨgharɨ Isirel thɨ raka njogha e lenji ghamba yakuyaku.
Ne thɨ vatadɨ njoghaŋgi ghembaghembako na thiya yakuwe,
ne thɨ kabuŋgiya waen na thɨ muna nɨkinji,
ne thɨ kabuŋgi umauma na thɨ ghanɨŋgi budakai thɨ kabuŋgi.
15 Ne ya bigiraweŋga e lemi ghamba yakuyaku iyava ya giyana e ghemi
na ma tene thɨ vaŋgu raŋgiyaŋgava.”
Giya lemi Loi ghalɨŋa iyako.