1 Txa²wã¹sũ̱³na² wãn³txa² ĩ³tih³nxe³txai¹nhẽ³la². Wxi²kan¹sxã³ ĩ³ye³kxi¹nxa²ha¹wa². Txa²wã¹sũ̱³na² Si³yxau³jah¹lai²na² Je³su²jah³lai²na² nxe³ya³sxã³ ĩ²yxau³kxi²nẽ³lain¹na³la². Hĩ¹na² ye³jen¹na² Je³su² Kris²tu³jah¹la² wa̱³li²tu¹wa². Wa̱³li²tãu³a² a²nũ²a² ka³te̱n³su² ta̱³nxa² ya³lu²te²su² ta̱³nxa² nxe³te²a² yxo²ha³kxa¹ kãi³ain¹kxai³ jã¹nxe² kãi³ain¹kxa² yo³ha² a³ya³tain¹tu¹wa². Wi¹kãi³ain¹kxai²nãn²tu̱³ txa²wã¹ha³lo²a² a²yxo²ha³kxa¹ Hxi²kan¹ta² Si³yxau³tãu³lo³thĩ¹na¹ wi¹la² kãi³in¹kxa² yo³ha² ũ³yho³hi¹nxa²tu¹wa². 2 Nxe³ha²kxai³ Txa²wã¹sũ̱³na² wãn³txa² wi¹jau³xa² ya³lo³txi²sxã³ a²nũ²a² ĩ³yau¹ũ³tai¹nhẽ³la². Ain³kxi²te³lhxã³ wxã³ain¹kxai²nãn²tu̱³ ĩ³yau¹ũ³tai¹nhẽ³la². Yxãn¹ta¹ nxai¹nxa³kxan²ti³ ã³sxã³ ĩ³yau¹ũ³hain¹txa³hẽ¹la². Ko̱³nxe³ti³ kãi³ain¹kxai²nãn²tu̱³ ĩ³kwa̱i²kxi¹txai¹nhẽ³la². Yxo²ĩ²nxa²sxã³ hxi²tha³nhain¹kxai²nãn²tu̱³ ya³nãn³ta³ki²la²sxã³ ĩ³nxũ²kwa̱i³lxũ¹sxã³ ĩ³yau¹ũ³txai¹nhẽ³la². 3 Nxe³sxã³ kxãn³nãu³a¹ wãn³txa² ya²la³lyau³xa² te²nai¹nxa³lho³la². Yxãn¹ta¹ wi¹le³ain¹te²a² so¹lxi³ ĩ³wi¹lxon³kxi²jau³xa² so¹lxi³ te³nain¹tu¹wa². Nxe³ain¹te²su² te²an²tu̱³ ã³yã³nũ²kain¹tu¹wa². 4 A²nxe³te²na² wãn³txa² ain³kxi²ha²kxai³ wãn³txa² ya²la³lyau³xa² sa²yxo²ã³ain¹tu¹wa². Nxe³sxã³ kwa²wãn³txa² toh³lxi³jau³xa² so¹lxi³ ain³kxain¹tu¹wa². 5 Nxai¹nha²kxai³ wxãi²na² sa²kxai³lu² wain³txi³ o²la³kxi¹sẽ¹la². Khãuh³lxa³txi³nhãn¹kxan²ti³ ya³lo³txi¹sẽ¹la². Txa²wã¹sũ̱³na² wãn³txa² ĩ³yau¹ũ³ai¹nĩn¹ju³ta² so¹lxi³ kãi³txa²hẽ³la². Je³su²jah³la² wãn³txa² a²nũ²a² yxo²ha³kxa¹ ĩ³yau¹ũ³hain¹si¹jau³su² Txa²wã¹sũ̱³na² kwa³na³nxa²tai¹ti²tu³wa². Txa²wã¹sũ̱³na² kwa³na³nxa²jau³xa² yxo²ha³kxa¹ sa²yxo²we¹txa²hẽ³la².

6 Nĩ¹nha²kxai³ txai²na² sa²kxai³lu² ya³lu²te³lhxã³ nxa¹wa². Hai³txi³ kxã³non³nxa³lho³la². Je³su²jah³la² wãn³txa² sa²yxo²we¹te²sa¹wa². Nxa¹ha²kxai³ ka³te̱n³su² yxau²xai³la¹ju³ta² sa²so¹kxi²sai¹nha²kxai³ ya³lu²na¹kxan²ti³ hai³txi³ ka³te̱n³sa¹ju³ta² a³lxi²sa²nxa³nha²wa². 7 Jã¹nxa¹jut3su² Txa²wã¹sũ̱³na² wãn³txa² kwa³na³sain¹jau³xa² a²yxo²ha³kxa¹ nũ̱³kxũn³txi³ sa²yxo²we¹ta¹hẽ³la². Nxe³na¹ha²kxai³ Je³su²jah³lai²na² wãn³txa² wã³ko³nxa³te²tu̱³ a²nũ²a² ĩ³tih³nxai¹na¹hẽ³la². 8 Kxãn³nãu³a² wain³txi³ o²la³kxi²na¹kxa² yo³ha² yũ³sa³tu¹wa². Txa²wã¹hxi²kan¹ta² Si³yxau³jah¹la² wain³ju³ta² so¹lxi³ kãi³jah¹la² nxe³te² hi²sen³su² ũ³yho³hi²sa³tu¹wa². Te²yã¹nxe³sxã³ Je³su² Kris²tu³jah¹lai²na² a³ka³nxi²ju³ta² wah³nxain¹te²a² yxo²ha³kxa¹ ũ³yho³hain¹nũn³tu¹wa², Kxãn³nãu³a¹sa².

9 Nxe³na¹jut3su² wa³su³txi³ wxã³sẽ¹la². Kã̱u³txa³hẽ¹la². 10 Nxa²ha¹te¹ Te³ma²sah³lai¹tã² a²yan³txi³nũ³a² a³lxi²khai¹nxe³ha²kxai³ ã³sa³na²hẽ³la². Nxe³nũ²la² Te³sa³lo²ni³ka²thĩ³na² ã³waix3tã²hẽ³la². Kre³sẽn²jah³lai¹tã² sa²kxai³lu² Ka³la²si²a²ko³xa² ã³waix3txi² Ti²to³jah¹lai¹tã² sa²kxai³lu² Tal³ma²si²a²ko³xa² ã³waix3txi² nxe³sain¹na²hẽ³la². 11 Lu²kah³la² so¹lxi³ yxau³ya³sa²na³la². Nxe³ha²kxai³ wxãn¹tãu³a¹ Mar²ko³jah³la² tẽ³sxã³ wxã³sẽ¹la². A²nxe³jah¹la² txa²wa³ka³li³yu³ta² ã³nĩ²ũ³sa²ju³ta² yũ²na³la². 12 Nxa²ha¹te¹ ti²ki³ko³ah³la² sa²kxai³lu² E²fe³so³thĩ³na² ĩ³sa²si¹hã³ai¹na¹hẽ³la². 13 Jã¹nxa¹jut3su² Tro³a²te²thĩ³na² Kar²po³jah¹lai²na² sxi²ha² yxau³na¹hĩ¹nai³tã² txa²wã²la³ka³lo³a² ã³a¹ka³lo³nai¹tã² sa²so¹nha²kxai³ txa²ha³te̱h³nxã³nxa² sa²so¹nha²kxai³ ũ³wha²li¹la¹txã³nxa² sa²so¹nha²kxai³ nxe³sxã³ tẽ³sxã³ wxã³sẽ¹la².

14 A³le³syãn²trah³la² kwa³thi³la² o²la³kxi²jah¹la² ko̱³nxe³ti³ o²la³kxi²sain¹na²hẽ³la². Nxe³sain¹ju³ta² Txa²wã¹sũ̱³na² hxi²ka² ũ³yho³hi²tu¹wa². 15 Jã¹nxe³jut3su² wi¹lĩ²khai¹nxe³txai¹nhẽ³la². Txa²wã¹wãn³txa² ĩ³yau¹ũ³ain¹ki̱³jau³xai²na² yxo²kwĩn¹kxi²ha²kxai³ ĩ³hxi²ka¹te³lxa³ju³ta² o²la³kxi²khaix1sĩn¹na²hẽ³la².

16 Nxa²ha¹te¹ Ro³ma²no²ko³xa² a²hxi²kan¹jah¹la² ne³nxẽ³na² a²wi¹lhĩ¹na² txa²wa³ka³li³yu³ta² ĩ³yau¹ũ³hai¹na¹hĩ¹nai³tã² a²nũ²la³ hai³txi³ ĩ³yxo²nũn¹sai¹nxa³hẽ³la². A²yxo²ha³kxa¹ ã³sxã³ ã³wait3san³sain¹na²hẽ³la². Nxe³sa²te²sain¹kxan²ti³ Txa²wã¹sũ̱³na² ne³wã²na³ain¹ju³ta² ten³sa³nha²wa². 17 Sain¹ta¹ Txa²wã¹sũ̱³na² hi²sen³su² ã³non²ta³ki²sxã³ ã³nũ̱³kxũn³tot3sai¹nhẽ¹la². Sai¹nha²kxai³ Txa²wã¹sũ̱³na² wãn³txa² yxo²ha³kxa¹ ĩ³yau¹ũ³hai¹na¹hẽ³la². Ju³te²a² nũ̱³ka̱³txi³sxa³te²a² yxo²ha³kxa¹ ain³kxi²sain¹na²hẽ³la². Nxe³sain¹jut3su² ĩ³ya²lut1sain¹ju³ta² ã³non²ta³kxi²sain¹na²hẽ³la². 18 Jã¹nxa¹jut3su² hĩ¹na² Txa²wã¹sũ̱³na² ã³non²ta³ki¹xi²sain¹tu¹wa², ko̱³nxe³ti³ o²la³kxi²sain¹tũ̱³ka̱³txa²sa². Sain¹kxai²nãn²tu̱³ Txa²wã¹sũ̱³na² yxau³ju³ta² sa²so¹sxã³ ũ³whxe³sain¹tu¹wa². Jã¹nxe³jut3su² Txa²wã¹sũ̱³na² e³kxi²ya³sah¹lxi³wxa². Nxe²e³kxi²ki̱³te³nah¹lxi¹:

— Wxãi²na² so¹lxi³ kãin²khai¹nxi¹lxi¹. òla² kãin²jah¹lo²su² yũ²nxa³wi¹. Nxe³ki̱³jau³su² e³kxi²ki̱³sxai²na²hẽ³la². Jãx1ki̱³tu¹wa². Te²yã¹nxe³sxã³:

— Jau¹xai²na² wain³khai¹nx2na³li¹. Ya²la³lai²la¹wi¹. Nxe³to³ki̱³tu¹wa².

19 Jã¹nxe³jut3su² Pri³si²la³ka³lxa² A³kwi²lah³la² nxe³sxã³ txa²ha³ta̱³nxa² ĩ³ye³kxi¹txai¹nhẽ³la². Te²yã¹nxe³sxã³ O³ne³si³fo²rah³la² wẽ³ha³lxi³yu³ta² ĩ³ye³kxi¹txai¹nũ³nhẽ¹la². 20 E³ras²to³jah³lai¹tã² sa²kxai³lu² Ko³rĩn²to²thĩ³na² ã³ai¹na¹hẽ³la². A³li³xa³hẽ³la². Nxa²ha¹te¹ Tro³fi²mah³lai¹tã² sa²kxai³lu² ĩ³to³nha²kxai³ Mi³le²to²thĩ³na² ã³ai¹na¹hẽ³la². 21 Jã¹nxe³jut3su² wxãi²na² sa²kxai³lu² kwẽ³ko³nxa³ta̱³lxa¹ ĩ³ya³lo³ti¹sxã³ ã³wxã³sẽ¹la². Nxe³ju³ta²sa¹ Eu³bu²lah³lai¹tã² Pru³tẽn²jah³lai¹tã² Li²no³jah³lai¹tã² Klau²ti³o³jah³lai¹tã² txa²wã¹wã³tã̱³nãu³xa² yxo²ha³kxa¹ a²ha³ta̱³nxa² ĩ³ye³kxi²si¹hai¹na¹jau³su² e³kxi²sain¹na²hẽ³la².

22 Je³su² Kris²tu³jah¹la² Txa²wã¹hxi²kan¹ta² Si³yxau³jah¹la² wi¹lĩ²nxa²tu¹wa². Jã¹nxĩn¹jut3su³ Txa²wã¹sũ̱³nu²kxai³lu² thãi³ti³la² a³lxi¹nxa²ju³ta² ten³sa³nha²wa². Txai²li² Pau²lah³lo²na¹xai²na² ta³lun²ye¹nxa²ha¹wa².