Ⅰ Tɩchɛ bɔ̃ɔn a yele nyãna ɩka a bɩbir baaraa daar, dɔɔyɛ na ben be. Ⅱ Nɩbɛ na nʊ̃n a ba mãɛ, libinʊ̃nbɔ, mãɛ 'mɔɔfʊ, ba kʊ̃ 'yɔ̃ɔnɔ̃ nɩbɛ ɛ, na ba kʊ̃ wõnõ a ba dɔɔrbɔ toor ɛ, ka bon maa sɛɛ ba ɛ, na ba kʊ̃ ɩ chɛchɛ ɛ. Ⅲ Ba maa tara nɩrɛ tɩɛr ɛ, ba maa vɛ̃ kʊ nɩrɛ ɛ, na ba sɔ̃ɔnɔ̃ taa yoe, baa nyɔɔrɔ ba mãɛ ɛ, na ba 'yɛrɛ 'yɛrbikpãɛn, na ba chire yelvɩla. Ⅳ Ban ɩn gagarsɩ, na ba ɩ jukpãɛn dẽme, na ba bʊɔrɔ yuor, ban nʊ̃n bʊ̃vɩɛlsɩ gar ban nʊ̃ Nãaŋmɩn, Ⅴ ba maal ba mãɛ Nãaŋmɩn puorbo kaar, tɩ chiir a wʊ kpɛ̃ɔ. Ta gbɛɛrɛ ba ɛ.

Ⅵ A ba pɔ lɛ a bamɩne ma fara kpɩɛrɛ a yie pɔ na ba yʊɔrɔ bɛlɛ a pɔbɔ bala na ba bɔ̃ɔ a ba tɩɛr gaa jie ɛ, ka a ba yeldɛbɛ dɔl taa, ka a yeldɛbɛ jaa vɔlaa ma nyɔɔ ba. Ⅶ Ba ma jãna na bɩbir jaa tɩ ba maa tʊ̃ɔ bɔ̃ɔ a yelmãɛ ɛ. Ⅷ Nɩtãa lɛ a Janɩsɩ nɩ Jãbɩrɛsɩ na ba sɔɔ a Mosesɩ ɛ, lɛ mɩ lɛ a nɩbɛ banyãna mɩ tɔr a yelmãɛ, baa tara tɩɛr vɩla ɛ, a sɔɔfʊ yele jũu, ba ɩn faa. Ⅸ A ba yele kʊ̃ chen tɛɛr ɛ, a lɛ an kaara a nɩbɛ ayi banyãna. Nɩrɛ jaa na nyɛn a lɛ ban jɔl jã.

Ⅹ Fʊ̃ʊ mãɛ gba jaa nyɛn a n wiilfʊ bɔ̃ɔ, lɛ a n beraa na kaara, bon 'lɔ ɩn bʊɔrɔ a n nyɛvʊr pɔ, a n sɔɔfʊ, a n kãnyir, a n nʊ̃fʊ lɛ ɩn ara kpɛ̃ɔ, Ⅺ a dɔɔyɛ ɩn di, nɩ a lɛ ban ge ma. Fʊ̃ʊ mãɛ bɔ̃ɔn naa a lɛ na pɔɔ ma a Antiok, nɩ a Ikoniyum, nɩ a Lɩstɩra tẽn pɔ, tɩchɛ ka a sɩ Soro faa ma yin a jaa pɔ. Ⅻ Sɩrɛ jaa, a bala jaa na bʊɔrɔ ɩka ba turo a Nãaŋmɩn sɔr, na ba pɛlɛ a Yesu Kɩrɩsɩto pʊɔ, na nyɛn gefʊ, ⅩⅢ tɩchɛ a putudẽme nɩ a bala na maal ba mãɛ nɩmɩn kaar, na kpɛ̃n sɔ̃ɔnaa pɔ, na ba wɛ, ba bɛlɛ naa ba taaba, ka ba kpɛ taa bɛlfʊ pɔ. ⅩⅣ Fʊ̃ʊ 'lɔ, mʊ̃ɔ nɩbir nɩ a lɛ fʊn jãn na fʊ sɔɔ de, bojũu fʊ bɔ̃ɔn a nɩrɛ 'lɔ sɛ̃ fʊn jãn, ⅩⅤ nɩ lɛ a fʊ bibile sɔ̃ɔ jaa fʊn bɔ̃ɔ a Nãaŋmɩn gãn, na tʊ̃ɔ sʊ̃ʊ fʊ ka fʊ tara yɛ̃, nyɛ faafʊ, fʊn sɔɔ de a Yesu Kɩrɩsɩto jũu. ⅩⅥ A Nãaŋmɩn gãma a jaa yi naa a wʊ sɛ̃, na a sɛɛ wiilfʊ, na a wile 'mabfʊ nɩ chɔɔrfʊ, naa na wiil nɩrɛ ka wʊ ɩ nɩtor. ⅩⅦ Lɛ lɛ a Nãaŋmɩn nɩrɛ na bɔ̃ɔ na wʊ kpɛ̃mɛ kʊ tʊ̃vɩla jaa bʊrɔ.