1 Guꞌ baꞌ nam guꞌ janoꞌ pɨx ji muiꞌdhidhaꞌ guiꞌ nam tɨ jɨɨꞌñdhidhaꞌ buiñor guch Xoiꞌkam, baꞌ jaiꞌ dhɨt dhiꞌ jɨꞌ nam ba tɨ jɨɨgiꞌñdhaꞌ nam griago ñiꞌook kɨꞌn tu aꞌgadaꞌ, puiꞌ ba ja tɨtda am guiꞌ nam ebreo ñiꞌook kɨꞌn jup tu aꞌgadaꞌ nam sap cham pɨk bhaiꞌ tu ja maakdaꞌ gu dɨꞌdɨlhdhɨm uꞌuub guiꞌ nam puiꞌ griago kɨꞌn jup tu aꞌgadaꞌ. Baꞌ puiꞌ ja tɨtda am jia nam sap siamri jix bhaiꞌ xi chu ja maakat gu tuꞌ nam ja onbagiꞌñdhaꞌ gammɨjɨ nabap tanoolh. 2 Baꞌ jaiꞌ dhɨt dhiꞌ jɨꞌ nam ebreo ñiꞌook kɨꞌn tu aꞌgadaꞌ nam jir diꞌ gu mambhɨɨx daman gook noonbiꞌñ guch Xoiꞌkam, baꞌ tu ja joochxi mɨt bɨɨx nam jɨꞌk tɨ jɨɨgiꞌñdhaꞌ buiñor guch Xoiꞌkam nam sap baꞌ maap jum jumpadai xi chu aꞌgai maaꞌn ñiꞌook jup duñiaꞌ na jax jaꞌk jir am kaꞌ gu dhiꞌ puiꞌ. Baꞌ na mɨt paiꞌ dhuuk bɨɨx maap bam jumaap, bhaiꞌ ji chu ja aꞌgi mɨt, jup ja tɨtda am:

―Aa dho guꞌ aach jaꞌp kaiꞌñkam tu jam joochxi dhoch jaaduñ nach xi jam aaꞌñdham nach aach cham kach guꞌnguxiꞌñ nach jam palhbuiꞌñdhaꞌ nach jix bhaiꞌ jam buadaꞌ nach tu jam maakdaꞌ gu tuꞌ, nach puiꞌ cham pɨk bhaiꞌ tu jam maakdaꞌ jaiꞌ dhɨt, nach guꞌ aach naiꞌ ka tu aꞌga gux bhaiꞌm kaiꞌchdham ñioꞌkiꞌñ gu Dios, nat guꞌ puiꞌ jaꞌk jich aꞌm ba tɨ tɨɨ. Baꞌ cham jir am noꞌ chich moo cham jup ka ji chu aꞌga. 3 Baꞌ aach pu jam tɨtda na pim jaiꞌ xi ja gaagai guiꞌ nam jaroiꞌx bhaiꞌ jam buadaꞌch jaaduñ, nam tu jam maakdaꞌ gu tuꞌ na jam aꞌm jum aagaidhaꞌ, yaꞌ aapiꞌm dɨɨlh jaiꞌ dhɨt na pim jɨꞌk tɨ jɨɨgiꞌñ buiñor guch Xoiꞌkam, nam aixkaꞌ jɨꞌk xi jum gook jaꞌtkam, gio nam jir jix bhabhaiꞌkam kaꞌ, gio baꞌ nam jir jix chu mamatdagɨm kaꞌ, gio baꞌ na gɇꞌ ja aꞌm tajaañix kaꞌ gux Dhuuduꞌ kam jix Uañ Iiꞌmdaꞌ, nach baꞌ puiꞌ jaꞌk ya ja darsaꞌ aapiꞌm jam bui nam jich aꞌmkam jix bhaiꞌ jam buadaꞌ, 4 nach aach guꞌ moo naiꞌ ka tu aꞌga gux bhaiꞌm kaiꞌchdham ñioꞌkiꞌñ gu Dios, gio baꞌ dai nach ka xi chu daandaꞌ buiñor jaꞌk jam aꞌmkam bɨɨx na pim jɨꞌk tɨ jɨɨgiꞌñ buiñor guch Xoiꞌkam.

5 Baꞌ bɨɨx pɨx puiꞌ ji chɨi mɨt na sap jir am gu puiꞌ nam jax kaiꞌch gu noonbiꞌñ guch Xoiꞌkam. Baꞌ moo bhaiꞌ ji aa mɨt gu Teeban, na guꞌ sap dhiꞌx ioꞌm jix biiñak kaꞌ buiñor guch Xoiꞌkam, gio sap na gɇꞌ bhaan tajaañix kaꞌ gux Dhuuduꞌ kam jix Uañ Iiꞌmdaꞌ. Miꞌ dhɨr baꞌ gu Piliip bhaiꞌp ji aa mɨt, gio baꞌ gu Prookoro ɨp, gio baꞌ gu Nikanoor ɨp, gio baꞌ gu Timoon ɨp, gio baꞌ moo gu Parmeenas ɨp, gio baꞌ Nikolaas ɨp gu Antiokiiya kam, guiꞌ na jaiꞌ puiꞌ jaꞌk jup tu jimdaꞌ nam jax jaꞌk tu jimdaꞌ gu Israel kam jaꞌtkam. 6 Miꞌ dhɨr baꞌ dai na mɨt ba ja baidhak mu jaꞌk ja bui gu noonbiꞌñ guch Xoiꞌkam, baꞌ guiꞌ dai na mɨt bhaiꞌ xi ja daꞌngɨk ja moom am ma tu daanɨ jix dhaam jaꞌk buiñor gu Dios.

7 Baꞌ gux bhaiꞌm kaiꞌchdham ñioꞌkiꞌñ gu Dios jix ioꞌm pɨx mɨk jaꞌp jim kɇɇjidhaꞌ. Baꞌ muiꞌ jaꞌtkam pɨx jaꞌx jup ji chɨ jɨɨꞌñdhidhaꞌ am buiñor guch Xoiꞌkam gu bhaiꞌ kam Jerusaleen, baꞌx ioꞌm muiꞌ ba aixkaꞌ am. Daman guiꞌ nam bhaiꞌ gɇꞌ chiop tu daandaꞌ ja aꞌmkam gu Israel kam jaꞌtkam jaiꞌ puiꞌp xi chɨ jɨɨꞌñ jamɨt buiñor guch Xoiꞌkam.

8 Guꞌ baꞌ na guꞌ gu Dios bhaan tɨ nɨiꞌñdhaꞌ gu Teeban, baꞌ joidham jix bhaiꞌ xi chu buadaꞌ gux kɨɨꞌp jum duukam ja bui gu jaꞌtkam nam tuꞌ cham jɨꞌxkat paiꞌ puiꞌ tɨ nɨidhat, nam baꞌ bhaan jix mat kaꞌ nar sɨlhkam gu puiꞌ na jax jaꞌk tu ja aꞌgiꞌñdhaꞌ. 9 Guꞌ ji na mɨt guꞌ jaiꞌ dhɨt gu Israel kam jaꞌtkam nam mu jaꞌp tu chiopiꞌ kaꞌ dɨlhkob jaꞌk, guiꞌ na mɨt ja doꞌñcho nam tu ja juantudimɨk puiꞌ pɨx cham ja namkidhat, giilhim bhaiꞌ ji bhaak jamɨt dhiꞌ jɨꞌ ja bɨɨm guiꞌ nam mu jaꞌk oiꞌñkaꞌ Sireene, gio baꞌ guiꞌ nam mu jaꞌk jup oiꞌñkaꞌ Alijandriiya, gio baꞌ jaiꞌ guiꞌ nam mu jaꞌk jup oiꞌñkaꞌ na paiꞌ Siliisia bhaan bipioꞌ gu dɨbɨɨr, gio baꞌ moo guiꞌ nam mu jaꞌk jup oiꞌñkaꞌ na paiꞌ Aasia bhaan jup bipioꞌ gu dɨbɨɨr. Baꞌ dhiꞌ bɨɨx bhaiꞌ ji ñiokbo mɨt buiñor gu Teeban. 10 Ku guꞌ dɨɨlh guiꞌ am cham bhaaiꞌ ji nam jax jaꞌk xi chɨtdadaꞌ gɨt na baꞌ cham ka tu aꞌgadaꞌ gɨt, na guꞌ guiꞌ giilhim joidham jix bhaiꞌ xi bua na xi chu aꞌga nam xi kɇɇ, na guꞌ gux Dhuuduꞌ kam jix Uañ Iiꞌmdaꞌ na mattuꞌn na jax jaꞌk tɨꞌyaꞌ na tu aꞌgaꞌ. 11 Baꞌ puiꞌ ma ja umuaꞌ mɨt ja namkidhak jɨꞌkchi gu jaꞌtkam nam sap ja iatgiꞌñpuꞌ gu jaꞌtkam mu jaꞌp nam puiꞌ ja tɨtdaidhaꞌ, na sap puiꞌ kaiꞌch gu Teeban na pur cham tuꞌ gu gɇꞌ chiop bhaiꞌ nam paiꞌ tu daandaꞌ gio gu puiꞌ nat jax jaꞌk tu daasak gu Moisees na tu aagix kaꞌ. 12 Baꞌ nam paiꞌ dhuuk mu jaꞌp ba ja iatgidhim gu jaꞌtkam, giilhim bhaiꞌ ji bhaak jamɨt dho guꞌ, puiꞌ na jax gu ja gɇꞌgɇrkam tuk gu Israel kam jaꞌtkam, gio baꞌ guiꞌ nam sap jix mat kaꞌ gu ñioꞌkiꞌñ gu Dios. Bhaiꞌ dho guꞌ pu daa mɨt gu Teeban, miꞌ dhɨr baꞌ dai na mɨt ba baidhak mu jaꞌk na paiꞌ tum aꞌgadaꞌ gu gɇꞌgɇrkam ja bui. 13 Jaiꞌ mɨt jup xi ja umuaꞌñdhak guiꞌ nam iattulhdhaꞌ gu Teeban, sia kum guꞌ tɨi cham kɇɇ noꞌ moo puiꞌ kaiꞌch piam ku guꞌ cham. Baꞌ na mɨt paiꞌ dhuuk bɨɨx maap xim jumpadak bhaiꞌ ji chu aꞌga, muiꞌ ji ñio mɨt dhiꞌ jɨꞌ na mɨt jaroiꞌ ja umuaꞌ, jup kaiꞌch am:

―Dho guꞌ aach puiꞌ kɇɇkɇꞌ ji dhi maaꞌnkam na gammɨjɨ puiꞌ kaiꞌchdhaꞌ na sap pur cham tuꞌ yaꞌ dhi gɇꞌ chiop gio baꞌ gu puiꞌ na jax jaꞌk tu aagix nach tu jimdaꞌ, 14 na puiꞌ kaiꞌchdhaꞌ na sap gu Jesuus Nasareet kam ka iaraꞌ dhi gɇꞌ chiop, gio sap baꞌ na maakam tu daasaꞌ, cham tuꞌ sap puiꞌ jaꞌk ka tu jimdaꞌ ich nat jax jaꞌk tu daasak aach jich bui gu Moisees.

15 Baꞌ nam bhaiꞌ xi ñɨiꞌñ gu gɇꞌgɇrkam gio baꞌ bɨɨx guiꞌ nam jɨꞌk miꞌ daraa, jaꞌp tuꞌm tɨ nɨiꞌñ gu Teeban nam jax chuꞌm tɨ nɨiꞌñ gu noonbiꞌñ gu Dios.