1 Muaine pan otoe Kanaan tewa nea. 2 Tau muaina waron Yusup nea kakau ororire on poe Mesir rei pusire nea. Oyo Yakup iasau osiso, iahata, “We hehuka. Masi oeu poe Mesir honu na ohane re maneiu umau osita honu.”

3 Ne Yehuda iasau osi amai, iahata, “Ama. Ia mainae poe otoe Mesir iasau osima, iahata, ‘Ainati. Munata orori moa wani mai osiku tewa mo, pene oeu mai tanuku nea.’ 4 Reiso munata arui mania wani na ikatama, mka aeuma poe, ahane manei. 5 Ne munata arui mania wani na ikatama tewa mo, ami apenema aeu. Tau sae? Ia mainae rei iasau, munata mania wani ikatama tewa, pene aeuma poe tanui nea.”

6 Iahata, “Nanie oasau osi ia onate rei ata moa wani muie isa wain ikataku, nanie taa hae? Nanie ouna anoku ererau, nanie taa hae?”

7 Oahata, “Ama. Ia onate rei iasei tanuma ia-ia rerihoni ami na mania enau. Iasei, ‘Moa ama iamahaiki asi? Moa wani muie isa waimo asi?’ Asima runa wani iasei tanuma man. Sapan na ami anei ata ia mka iaisosima arori mania wani?”

8 Reiso Yehuda iasau osi amai, iahata, “Ama. Arui ia ikine rei ipusu na masi aeuma on sini mkane. Aeuma on sini tewa, mka pusita imata muaine. 9 Au sahoro usakai. Munata ununi roriki osia tewa mo, au sahoro uhana rosa rerihonia rotu-tu ria supan. 10 Sinana ipene mo, kani aeu nai ua nea.”

11 Iahata, “Munata san rei, mai orori sae waron iaka mai otoe reini pan mo karuni anoa. Ororire na oatoa ia mainae tau otoe Mesir rei. Orori hau rihua, kilalanta, ai unta, kamana, kahea pukuna, runa iana umau. 12 Runa orori kepen waron osupure pan mo karuni anoa rai. Orori kepen rai runa kepen umau honu na ohane manei honu. Hitio sio oaiinu sana kepen pan karuni anoa. 13 Orori moa wani reini na oeu on sini. Oeu poe ia onate rei.” 14 Oyo Yakup iainisi san rei, “Upuku Anahatana. Ano mo, me kawasa mainae erenesi pusire. Masi auna ia mainae tau otoe Mesir rei anoi runa we hehuka reini. Masi auna ia mainae rei na ihoka Simeon na onuni roriki runa Benyamin uaso. Ne munata au reini, we hehuka nanie tihoniso arihoniku, kani uasau sapan?”

15 Reiso Yusup nea kakau orori atoana rai. Atoa hau rihua, kilalanta, iana rai. Orori kepen waron osupure pan karuni anoa rai. Orori kepen umau honu na ohane manei honu. Oyo oeu poe otoe Mesir okata Benyamin. Hoka poe oyo oooso mai Yusup uai anoe. 16 Taa Yusup inoo Benyamin runa nea kakau oyo iasau osi ne makahaie wain ia mainae tau ne numa. Iahata, “Rori sio reini mai we numa. Ahutu makapana isa na nana muaine. Sio reini mka-mka oai ranie katopu runaku.”

17 Ia makahaie rei iuna sae wani Yusup iaisosiki. Oyo irori Yusup nea kakau runa wanin rei pan Yusup ne numa.

18 Iroriso pan Yusup ne numa, ne sio okaitau. Reiso oasau pan anoo, “Sio ororita mai reini, noso kepen waron ita inuni rorire pan karuni anoa waron mataanoe ihokata mai ihane manei, tea? Nanie osotata samatoro onana re keledaiu oyo ounata tau no manianeu?” 19 Reiso ohoka haineke Yusup ne numa nene mitanunue oyo oasau osi ia makahaie rei, 20 “Upu. Ahokama mai taue isa nea ahane muaine. 21-22 Ne anunima oyo ahokama pan arena tinai tihue pannuhu mono nea reiso nanie anekema. Ahuka mania karuni rai anoo kepen pusire uture waron asenu maneiu rai waropa karuni anoa. Kepeni pan karuni anoa rai pusire pannuhu. Aanei tewa ia seia sahoro inusure pan karuni anoa rai. Ne ahokama reini nanie aunire osia. Aunire runa arori kepen umau oi nanie ahane manei honu.”

23 Iahata, “Iake. Pene okaitau. Pene anomo rauponu. Anahatana wani moa ama runa omi oainisi oainaa runai kani inusu kepen rai pan mo karuni anoa. Ne uararuma kepen waron osenu manei tanure nea.” Oyo ohoka Simeon osiso.

24 Ohokai osiso oyo okatai mai numa anoe. Irui tihu osiso na osohu aio atua. Irui muaine osiso na opana no keledaiu. 25 Taa san rei oyo oseka tau no atoana osi Yusup. Oseka tanure na oruire osi Yusup. Mka ihokai tau ranie katopu. Tau sae? Sio osima osiso ata mka iai ikataso. 26 Taa Yusup ihokai mai numa, oyo nea kakau orui no atoana rai osiki. Oruire ohahue tanui. 27 Oyo Yusup iasei tanso. Iahata, “Omi sapan? Naone oruni osiku rerihoni moa ama wain ikore-korei nea rei. Sapan runa moa ama rei? Waipan iake?”

28 Oahata, “Upu. Me manorine, mania ama waipa iake.” Ita ohahue honu nanie oamuirai.

29 Taa Yusup inoo wanin, Benyamin, iahata, “Moa wani muie reini si? Ia wain oasau runai osiku reisi? Anaku. Uainisi na Anahatana irui iake osia.”

30 Oyo Yusup anoi runa wanin. Iahana anoi kasiane nanie irani. Reiso ihoka sansana iarihoni nea kakau runa wanin rei oyo inusui pan kakaranae anoe na irani. 31 Irani pusi oyo iauneu uai anoe oyo ihokai honu. Iapamese anoi na pene irani. Oyo iaisosiso onata muaina.

32 Yusup iaiki tau ruai ne meya isa. Nea kakau runa wanin oaiso tau meya tamene isa oi. Sio Mesir wasomo rei oaiso tau meya tamene isa oi. Tau sae? Sio Mesir oai okata sio Ibrani mo, monne. Omasikikiso. 33 Yusup ne meya runa nea kakau runa wanin no meya ramanane umau. Nea kakau runa wanin orue pusu no musum on ia iki manonete rotu ia muie. Taa onoo san rei, oyo oasumata umau, osira. Oasei tau umau oahata, “Ira oe. Sapan na ianei ia seia sahoro ia manaonete, ia seia sahoro ia autihue, ia seia sahoro ia muie?” 34 Orui muaine osiso arihoni Yusup ne meya. Nea kakau osupu no pahakian osa man. Ne Benyamin isupu ne pahakian nima. Oyo pusiso oai okata Yusup rotu-tu tiao pokona.