1 Oyo tau muie sio makahaia tau ia onate aia Mesir ua ouna sana tau ia ona aia rei. Sio makahaia reimo, ia isa ia mamsuhu tihu anggur osi ia ona aia, ia isa isaka ikotu porotiu. 2 Ouna sana reiso ia ona aia anoi eresaa tanso. 3 Oyo inususo pan pui anoe. Pui rei wapo ia kapitane tau sio mamsaka ia ona aia ne numa. Yusup wain tanui oi. 4 Ia kapitane rei irui kawasa osi Yusup na isakaso.

Uaso potuina pan pui anoe rei 5 oyo tau onone hatae isa uaso oneke oamnii. No niineu rai nene manariti osa tewa. 6 Oyo nene hanroe Yusup ihokai mai tanso. Inoo uaso anoo mtinta. 7 Reiso iasei tanso, “We netau. Ranie hatae reini mo, unoo uamo anomo mtinta tau sae rei?”

8 Oahata, “Monosi uama aneke aamnii. Ia isa ianei isima runa nene manariti tewa.”

Iahata, “Anahatana man sahoro isima runa niineu nene manariti. Masi oruni mo niineu rai roe.”

9 Ia mamsuhu tihu anggur iasau, “Monosi uneke uamnii ai anggur eresapa mai uaku anoe. 10 Anggur eresapa nene sakata tonu. Nene sakata rai samatoro nene totua. Potuina tewa oyo nene kupako rarata. Oyo huaya rai munaya. 11 Tau rei ukata ia ona aia ne koinanae. Sani rei oyo unona anggur huaya rai oyo uhusire poe koinanae anoe. Uhusi pusire samatoro uruiki osiki.”

12 Yusup iahata, “Wani san rei. Sakata tonu raimo, onona tonu. 13 Reiso nesie onona tonu rai, mka ia ona aia ihokaya arihoni pui anoe. Iapasanaya tewa nea. Mka ihitia tau ne mamsuhu anggur honu. Mka arui koinanae osi ia ona aia sani naone rei honu. 14 Ne asupu me iake nea mo, anom erepeka runaku. Masi aruni we masana reini osi ia onate aia na ihokaku rerihoni pui anoe reini. 15 Tewa mo, sio okimanakaku arihoni otoe wani sio Ibrani orueso. Ne mai Mesir reini mo, una masana isa tewa ne onusuku mai pui anoe.”

16 Ia mamkotu poroti rei iatinu tau ia mamsuhu anggur ne niine rei iake reiso iruni ne niine osi Yusup oi. Iahata, “Uneke uamnii ukoku pakuna tonu taua tau porotiu. 17 Tau pakune wani on roe haha mo porotiu nitaya-nitaya osi ia ona aia. Ne manua rahoka mai raaire.”

18 Yusup iahata, “Me niine rei wani san rei. Pakuna tonu rai mo onona tonu. 19 Nesie onona tonu oimo ia ona aia mka iaisosiso na oroto roha unumu samatoro oakatana me patane roe hini. Oakatanai oyo manua rahoka rarutu me henate.”

20 Nene onona tonu oyo ia ona aia ne musum ereneni. Reiso iuna karisaa mainae osi sio mamsakaya. Iaisosi san rei. Iahata, “Ohoka ia mamsuhu anggur runa ia mamkotu poroti arihoni pui anoe na ororiso mai sio mamsaka aia uao anoa.” 21 Hoka mai oyo ia mamsuhu anggur rei, ihitiki tau isuhu anggur honu. 22 Ne ia mamkotu poroti reimo, ohunui. Pusire raeu sani Yusup iasau rei. 23 Ne ia mamsuhu anggur rei anoi erepeka runa Yusup tewa. Anoi kanihue nai osa. Isima runa Yusup ne masana tewa.