1 Abraham ikore-korei iamtuai nea. Anahatana irui iake osiki pusu sae man. 2 Nene taue isa iasau osi ne ia makahaie wain ia manaonete arihoni ne sio makahaia pusiso utuso. Ia makahaie wain isaka ne numa hutae pusiki rei. Abraham iahata, “Mai na uata isopa mtinte reiso mai na akahuu karaku pusu re monne. 3 Isopa mtinte, Anahatana inoo. Upuri Anahatana wain irime nante runa tuamane. Asopa ata mka apenea anina ia pina isa osi anaku hanaie Isak mai otoe Kanaan reini. 4 Kahurae aeua pan we niane na anina ia pina hehuke isa arihoni ruaku we ipane taue osi anaku hanaie.”

5 Iahata, “Upu. Sani ia iki pina hehuke rei ipenei ieui iarihoni ne mansia mainaya na ieu ikataku mai rei mo, kahurae urori Isak suru pan?”

6 Ne iahata, “Pene! Pene arori anaku suru pan. 7 Upuri Anahatana wain irime nante runa tuamane iaisosiku uhokaku arihoni amaku ne numa nea. Reiso uhokaku arihoni we mansiau runa we niane nea. Anahatana itotoe osiku. Iahata mka irui tuamana raini osi wea upu momou. Anahatana mka iaisosi ne masisosie on roe noiyaha ihokai pan naone na iakahaia. Iakahaia na anina ia iki pina hehuke isa osi anaku hanaie. 8 Ne sani ia iki pina hehuke rei ipenei ieu ikataya mai rei, areimo mamsopae wani uata isopai reini, mka eresupua tewa. Masike sapan iae, pene arori anaku rei suru pan!”

9 Sani rei oyo ia makahaie rei iaunutu hanai atue poe upui Abraham karai pusu no monne, samatoro isopa sani upui iaisosiki rei.

10 Isopa pusi oyo, inana upui ne unta hata hutusa. (Unta mo, makapana wani nene totu unie nene pupua sonota.) Irori unta rai runa upui ne apia waron iaka umau sani api hunahana. Iapusaare roe unta nene totu unia na rarorire. Inana pusire, samatoro ihitio ieu na pan niane wani Nahor iruei tanui pan otoe Mesopotamia. 11 Hoka pan oyo, ikanihoo ne unta rai na raranahaso mai parike nusue mai niane muie. Tea mo, ranie manne nea. Ranie manne mo, sio pinau mai niane rei osaka oeu oripa tihu poe parike rei.

12 Reiso Abraham ne ia makahaie rei iainisi, “Upuku Anahatana. Ano wani upuku Abraham iainisi iainaa runaya. Uainisi arihonia na akahaiku na usupu ia pina hehuke isa osi upuku anai hanaie. Akahai upuku Abraham na auna anai hanaie iausahai. 13 Au wani uhaineke parike nusue reini. Potuina tewa oi, mka sio pina hehuka mai niane reini ohokaso mai, oripa tihu. 14 Reiso uainisi arihonia na ia iki pina hehu seia man wain mka uainisi tihu arihoniki na uninu, reiso mka irati ne tihu na uninu. Sani irati ne tihu rei no uninu, ouo sani iahata, ‘Me unta raino mka uunare raninu oi.’ Na uanei ata ano aroma ia pina hehuke rei osi me manorine Isak. Unoo san rei, areimo mka uanei ata anom iake runa upuku Abraham.”

15-16 Iainisi pusi tewasi oimo, sira tau ia iki pina hehu iake tunne isa ihokai. Ianei isoulaha tewasi. Nanai Ribka. Ia mo, Betuel anai pina. Momoi onate tau Nahor, momoi pina onate tau Milka. Nahor mo, Abraham kakai. Ihokai nanie iripa tihu poe parike rei. Iasaoa ne tihu huie. Ihokai poe oyo, iaiinu ne tihu huie rei tau tihu. Oyo on poe nanie inuniki.

17 Ne Abraham ne ia makahaie rei iruma na mai ihainekei. Iahata, “Ina. Akahaiku ee! Na uninu tihu noi me tihu huie reino ee.”

18 Iahata, “Mai, na aninu upu.”

Oyo irati ne tihu rei sisaa arihoni manai. Poe oyo, iuna ia onate rei ininu. 19 Ininu suka oyo ia pina hehuke rei iahata, “Upu. Mka uripa tihu osi me unta rai oi. Na me makapanau raninu rotu-tu tiaya pokona. Tea mo, ano kasaya oi, tea!”

20 Reiso isuhu tihu tau unta nene tihu naniaya sisaa na raninu. Ita iruma poe, iripa tihu honu. Inina na tihu panesi na iunare raninu rotu-tu ramkona honu. 21 Ieu inuni nana iripa tihu, ne Abraham ne ia makahaie rei iari-ariniiki rotu-tu ianamana sae isa tewa oi. Iariniiki na ianei ata kani Anahatana iakahaiki na isupu Isak sahai te tewa.

22 Unta rai raninu pusi oyo, Abraham ne ia makahaie rei ihoka hunahana waron hunonia mainaya waron sio pinau tau ia ne naene oausahure. Ihoka sapauu iausahui roe ia pina hehuke rei okoi. Sapauu rei mtinte haineke gram 6. Ihoka nitianaya ua waron mtinta gram 114. 23 Oyo iahata, “Masi asima ee. Ano mo, amam tau ia seia? Mo naniake huie isa waria mo numa te tewa na anekema tanui?”

24 Iahata, “Upu. Au mo, Betuel anai. Betuel mo, Nahor runa Milka no hehuke. 25 Ria mani numa naniake huie waria, upu. Monota waron kaimenna osi makapanau iae warora oi.”

26 Iatinu san rei oyo, irike tune iainisi iainaa runa Anahatana. 27 Iahata, “Upuku Anahatana uainaa runaya. Ano mo, ano Anahatana wani upuku Abraham iainaa runaya. Ano arihoni tewa auna iake osi upuku Abraham. Ano arime kuru-kuru me anamanaya. Au reini mo, ano akata runaku rotu-tu uhokaku mai upuku Abraham ne mansiau reini.”

28 Taa san rei oyo, ia iki pina hehuke rei irumai inuniki ria inai ne numa. Hoka ria oyo iruni osi ne mansia mainaya. 29-30 Ribka hotai isa nanai Laban. Iatinu hotai iruni runa Abraham ne ia makahaie rei samatoro inoo sapauu roe hotai okoi runa nitianaya poe hanai atue. Inoo san rei oyo, iruma poe, inoo. Hoka poe oyo, inoo Abraham ne ia makahaie rei waipo iooi runa ne unta poe parike rei nusue asi. 31 Oyo iahata, “Upu. Ano mo, Anahatana irui iake osia. Reiso pene aruea mai mui reini. Mai na ieuta ria numa. Ami aseka tau naniam nea. Me unta iae, aseka tau naniaya oi.”

32 Reiso ia makahaie rei ipusui. Uaso onususo ria numa. Laban iaisosi ne sio makahaia orati unta nene apia, oyo orui mono kaimenna osi makapanau rai raai. Orui monota osi ne makapanau rai ne orui tihu osi ia makahaie rei runa ne mansiau. Orui tihu osiso nanie osohu aio atua.

33 Taa san rei oyo, orata muaina. Ne sira tau Abraham ne makahaie rei iasau san rei, “Napa mkane ee. Usima runa we anamanae reini ee, samatoro iaita.”

Laban iahata, “Reiso anamana roe, upu.”

34 Oyo iahata, “Au reini mo, Abraham ne ia makahaie. 35 Anahatana irui iake mainae osi upuku Abraham. Irui iake mainae osiki reiso ne kaya. Irui ne rompau, ne koropou, ne unta, runa ne keledaiu. Irui ne hunahana runa ne perak. Irui ne sio pina makahaia runa sio hanai makahaia. 36 Samatoro sahai Sara isusu ia iki hanaie isa. Aikee sae mo, ikore-korei iamtuai nea. Upuku Abraham irui ne numa hutae pusiki osi anai hanaie rei.

37 Iaisosiku usopa. Iahata, ‘Pene anini ia pina hehu Kanaan isa oi osi anaku hanaie. Pene iausahai mai otoe Kanaan wani irueta reini.’ 38 Iaisosiku ueuku mai amai ne numa, mai ne mansiau na unina ia pina hehuke isa osi anai hanaie.

39 Oyo uasei, ‘Sani ia iki pina hehuke rei ipenei ieu ikataku suru mai mo, sapan?’

40 Oyo iahata, ‘Anahatana wain upusui na ukata ne anamanaya mka iaisosi ne maisosie on roe noiyaha na ikataya. Ikataya na iakahaia tau me arena reini na asupu ia iki pina hehuke isa osi anaku. Mka asupui pan ruaku we mansiau pan amaku ne numa. 41 Ne sani ia iki pina rei runa ne mansiau openeso mo, mka mamsopae rei eresupua tewa.’

42 Ne sinasi uhokaku poe parike rei nusue oyo uainisi pan anoku. Uahata, ‘Upuku Anahatana. Ano sahoro upuku Abraham iainisi iainaa runaya. Reiso Upu, uainisi arihonia na akahaiku runa we arena reini na usupu ia iki pina hehuke isa. 43 Reiso akahaiku na uooku mai parike rei nusue sui osa. Na sani ia iki pina hehuke isa ihokai iripa tihu oyo uainisi tihu arihoniki na uninu.’ Uahata, ‘Masi akahaiku na uninu mkane arihoni me tihu reino ee.’

44 Oyo sani iamanaku, iahata, ‘E-e. Mai na aninu, upu. Runa me unta rai raninu oi.’ Samatoro au uanei ata ia iki pina reimo, Anahatana ruai ininiki osi upuku Abraham anai hanaie.

45 Uainisi pan anoku suka tewasi oyo, sira tau Ribka ihokai. Iasaoa ne tihu huie nanie iripa tihu poe parike. Iripa ne tihu suka oyo, uahata, ‘Ina. Akahaiku ee, na uninu arihoni me tihu reino ee.’

46 Oyo ia iki pina rei irati ne tihu arihoni manai sisaa oyo iahata, ‘Upu, mai na aninu. Runa me unta rai iae mka au unare raninu oi.’ Reiso uninu. Oyo iuna we unta rai raninu oi. 47 Raninu suka oyo uasei, ‘Amamu tau ia seia?’

Iahata, ‘Amaku tau Betuel, Nahor runa Milka no hehuke hanaie.’ Uatinu san rei oyo, uhoka sapauu oyo uausahui roe okoi, nitianae unue, unusui tau hanai. 48 Reiso rike tune uainisi uainaa runa Anahatana. Anahatana wain upuku Abraham iainisi iainaa runai. Uahata, ‘Upuku Anahatana. Ano mo, ano iake nai osa. Ano akahaiku rotu-tu uhokaku mai rei. Uhokaku mai upuku Abraham ne mansiau. Reiso uhokaku mai, usupu ia iki pina hehuke rei arihoni ne mansiau osi anai hanaie. Usupu kakai momoi.’

49 Reiso ranie hatae reini sani mo maue na anomo runa upuku Abraham, areimo oamanaku orui mo hehuke pina osi upuku anai hanaie, areimo oasau. Sani mo maue oruiki te, tewa te. Hete sae, oasau osiku mai na uanei ia-ia ata nanie una sae.”

50 Laban runa Betuel oahata, “Upu. Ami asau sae isa tewa oi tau anamanae reimo arihoni Anahatana. Reiso ami anei tewa ata nanie asau sae. 51 Ne mai. Ribka ia reini. Ananai niu na ieu ikataya. Ikataya, na ria inana upumu Abraham anai tau sahai sani Anahatana ruai iasau rei.”

52 Ia makahaie rei iatinu san rei oyo irike tune iainaa runa Anahatana. 53 Irike tune samatoro ihoka apia runa hunahana na perak. Ihoka pusire oyo iruire osi Ribka. Irui apia umau osi Ribka hotai runa inai oi. Irui apia waron hunonia mainaya.

54 Taa san rei oyo ia makahaie rei runa ne mansiau oaiso. Oaiso suka oyo, onekeso noi Ribka sio. Onekeso onone hatae.

Nene hanu omnanoe oyo ia makahaie rei iahata, “Upu. Tapiku na ununiku poe upuku Abraham nea.”

55 Oyo Ribka hotai runa inai oahata, “Ribka iruei ikatama onona hutusa te minggu unue isa ee. Samatoro ieui.”

56 Ne iahata, “Pene osopo onetema nea. Ne Anahatana iakahaiku reiso rotu-tu usupu Isak sahai. Reiso otapima na anunima poe upuku nea.”

57 Oahata, “Reiso mai na ioi Ribka na iasei tanui ee.”

58 Reiso ooiki oyo oasei tanui. “Me maue na apusu sio reini te tewa?”

Iahata, “E-e. Iake.”

59 Reiso otapi Ribka runa ne ia pina mampakananae oeuso runa Abraham ne makahaie rei runa ne mansiau. 60 Oainisi na Anahatana irui iake osiki. Oasau oahata,

61 Reiso Ribka runa ne sio makahaia rei oseka tau no apia. Oyo osaaso roe unta. Osaa roe oyo, oeuso okata Abraham ne makahaie runa ne mansiau rei.

62 Tau Abraham ne makahaie ieui pan Laban sio mo, Isak ipaki ne apia ieui poe parike wani nanae Lahai-Roi. Lahai-Roi nene manariti, “Ia inoo au sui osa.” Iruei mai Kanaan on poe hae. 63 Taue isa tau ranie manne ihokai iarinii roe ne nisi anoe. Ne ihetu unui, isira tau inoo unta umau waron hainau asi. 64 Unta raimo, Abraham ne makahaie runa ne mansiau. Ribka iae ihetu unui, inoo Isak. Oyo isipui arihoni ne unta rei. 65 Iasei arihoni Abraham ne makahaie rei. Iahata, “Ia hanai seia wain on poe ieui imetata reini?”

Iahata, “Au upuku Isak.” Reiso Ribka inete uai anoe tau hana-hana.

66 Hoka mai oyo, ia makahaie rei iruni osi Isak runa sapani na isupu Ribka osiki nanie tau sahai rei. 67 Reiso Isak inusu irori Ribka pan numa anoe. Pani inai ne numa wani sio onanai arihoni makapana unta. Oyo inanai tau sahai. Isak anoi runai. Anoi runai reiso anoi mirike nai osa, anoi repunoko inai tewa nea.