1 Abram ne musum hutu sia rahana sia. Ita Anahatana iatuhete ruai osiki. Iahata, “Au mo, au Anahatana wani we kawasa mainae erenesi sio pusiso. Apusu we maue sui osa. 2 Au mka utotoe osia na urui mea upu momou panesi. Mka urime ia-ia tau sae wani utotoe reini.”

3 Oyo Abram irike tune iakapuni ain. Irike tune oyo, Anahatana iahata, 4 “Au reini mo, utotoe runaya. Ano mka auna numa upue osi sio niana-niana. 5 Reiso nanie ukati nanam. Nanamu Abram tewa nea. Ne nanam honue mo, Abraham.* 17:5 Abram nene manariti mo, Amari onate. Ne Abraham nene manariti mo, Sio Panesi noa Ama. 6 Au mka urui mea upu momou panesi. Arihoni sio panesi reimo, mka sio umau ouna aiau. Mea upu momou rei, sio panesi mka oapuoo niana-niana.

7 Wani utotoe rei, mka uruiki osia runa mea upu momou rotu-tu ria supan. Ano runa mea upu momou oainisi oainaa runaku. Au sahoro Anahatana wani sio oainisi oainaa runaku. 8 Muie reini omi orue tau tuamane reini sani omi rakana asi. Ne mka uruiki osia runa mea upu momou. Tuama Kanaan reini, urui pusiki utue osi mea upu momou rotu-tu ria supan. Au mo, au Anahatana wani sio oainisi oainaa runaku.

9-10 Ano iae, kahurae apusu maunaune reini. Kahurae orehi pusimo. Ano runa mea upu momou kahurae opusu maunaune reini. Sio hanaia pusiso kahurae orehiso. 11-12 Oni ranie hatae reini sio iki hanaia wason no onona itu pusiso kahurae orehiso. Sio manianeu wason oamrae mai me numa, kahurae orehiso oi. Runa sio wason ohaneso rei oi. Sio hanaia pusiso wason orueso mai me numa kahurae orehiso. Sio wason me hehuka, sio wason me hehuka tewa oi. Orehimo rei, ereuna anomo rapeka runa wani au utotoe reini sui osa. 13 Omi hanaia pusimo kahurae orehimo. Orehimo na rauna anomo rapeka runa wani utotoe reini. Utotoe rotu-tu ria supan. 14 Sio hanaia wason orehimo tewa mo, nooi sani au we mansiau tewa nea. Tea mo, orime au we maunaune reini tewa.

15 Isa honu. Sahamu Sarai mo, ukati nanai tau Sara. Nanai Sarai tewa nea. 16 Au mo, mka urui iake osiki na isusu anai hanaie isa wain mka uruiki osia. Urui iake osi Sara na iuna ia pina numa upue osi sio niana-niana. Arihoni nea upu momou reimo, mka sio umau ouna aiau oi.”

17 Oyo Abraham irike tune iakapuni ain ne, iauman. Iasau pan anoi, “Ia hanaie kore-korene isa sani au reini mka ususu ia iki hanaie isa asi si? We musum utuni nea reini! Ia pina isa ikore-korei sani Sara reini isusu asi si? Ne musum hutu sia nea reini!”

18 Oyo Abraham iasau osi Anahatana. Iahata, “Ismael isaka we numa hutae man nea, tea!”

19 Ne Anahatana iahata, “Tewa. Sahamu Sara ruai mka isusu anamu hanaie isa. Saka ahete nanai tau Isak. Au mka ukata sae wani utotoe reini rotu-tu ria supan. 20 Ano ainisi rerihoni Ismael rei mo, mka uatinu tanua. Reiso mka urui iake osiki. Urui nea upu momou panesi. Ia mka iuna numa upue tau ipana hutusa rahana ua. Nea upu momou mo, mka au unaso orime otoe wani mainae oi. 21 Ne wani utotoe reini mo, mka una usuiki osi Isak. Isak anamu wain mka Sara isusui rei. Isusui musum reinau sani musum hunana raini.”

22 Iasau pusi san rei oyo Anahatana ieu iarihoniki.

23 Nene ranie hatae rei oyo, Abraham ipusu Anahatana ne maunaune rei reiso irehi anai hanaie Ismael runa sio hanaia noi ne numa anoe pusiso. Irehiso ne manianeu oi. Ne manianeu wason oamrae noi ne numa runa sio wason ihaneso. 24 Abraham irehiso reimo, tau ne musum hutu sia rahana sia. 25 Tau rei anai hanaie Ismael ne musum hutusa rahana tonu. 26 Orehi uaso tau ranie hatae osa rei oi 27 runa Abraham ne manianeu pusiso.