1 Taue isa, Abram inekei iamnii inoo Anahatana. Iahata, “Abram. Pene akaitau. Au unetea sani aniaue. Urui iake wani mainae osia tau ano mo, apusuku.”

2-3 Iahata, “Upuku Anahatana wani arime tuniai reini. Arui we hehuka umau tewa reiso, mka ia seia isaka we numa hutae runa we rusun? Reiso ia wain mka isakare mo, we maniane, Elieser, ia Damsyik rei. Reiso nanie arui iake wani mainae rei osiku tau sae?”

4 Iahata, “Tewa. Mka anamu hanaie ruai. Ia sahoro isaka me numa hutae rei. Me maniane isaka tewa.”

5 Anahatana irori Abram ihokai arihoni numa. Iahata, “Masi anoo roe nante na areken tau oneu rairo. Areken kuare te tewa? Mka me hehuka panesi san rei oi.”

6 Abram iparisaa mainae tau Anahatana reiso Anahatana iahata anoi manisate.

7 Anahatana iahata, “Au sahoro Upumu wani uaisosia ahokaya arihoni me kota Ur pan otoe Babilonia. Ahokaya na urui tapuna raini mai otoe Kanaan reini osia tau mea upu momou.”

8 Ne Abram iasei, “Upuku Anahatana ano wani arime tuniai reini. Sapani na uanei ata tuamana raini osi wea upu momou?”

9 Iahata, “Anana koropou inae isa, une-une inae isa runa rompa hanaie isa. Tonure nene musum tonu-tonu. Runa manu naka teura isa na manu puane isa.”

10 Reiso Abram inina makapanau rai osi Anahatana. Isupure oyo ihutu haka koropou, une-une runa rompa rai tau ua. Iaunuture na hae remanane hae. Ne manua rai ihutu hakare tewa. 11 Manua waron rarutu-rutu peni kopua nanie rarutu makapanau rai, ne Abram ineire.

12 Haineke ranie nanie eresohui, oyo Abram ineke munui nai osa. Ineke munui oyo ikaitau hunu ruai. 13 Anahatana iahata, “Anomu erepeka. Mka mea upu momou orueso noi nia tamene sani sio rakana. Sio mka ouna manianeu poe niane rei. Mka sinsaraso rotu-tu musum utuni ate. 14 Ne sio wason ounaso tau manianeu mo, mka uapasanaso. Tau mea upu momou ohitio oeuso arihoni niane rei, mka orori no apia panesi. 15 Ano ruam mo, mka rotu-tu akore-korea amtuaya ia-ia. Amataya tau sanani, oyo oaunutua tau naniam iake. 16 Mea upu momou sio napisi ate oyo onuniso mai tuamane reini. Mka unei sio Amori tewasi. Ne rotu-tu no kahatena mainaya samatoro uapasanaso. Uapasanaso, areimo uneiso arihoni tuamane reini, samatoro tuamane reini osi mea upu momou.”

17 Tau pumono oyo, sira tau usa wani erewenu mai naniae runa kamane wani ereai raeu pusu makapanau rai tihue. 18 Tau ranie hatae reimo Anahatana itotoe osi Abram. Iahata, “Au utotoe na mka urui tuamane reini osi mea upu momou. Urui tuamane on poe nenene poe Mesir rotu-tu pan Wae Efrat. 19 Mka urui sio Keni no tuamane. Urui sio Kenas, sio Kadmon, 20 sio Het, sio Peris, sio Refaim, 21 sio Amori, sio Kanaan, sio Girgasi runa sio Yebus no tuamana oi.”