2
Yunusa na Abadantaa ŋaaray
1 Za i na Yunusa warra teekoo ra, Abadantaa na hamiisa beeri foo tunandi kaŋ na Yunusa gon. De Yunusa na cijin hinza nda zaari hinza tee hamiisa beeroo gundoo ra. 2 Hamiisa beeroo woo gundoo ra Yunusa na nga Koyoo, Abadantaa ŋaaray.
3 A nee:
«Ay binoo kankamyanoo ra, ay na Abadantaa cee,
a nʼay zaabi,
alaaharaa gundoo ra, ay na faabayan wiri ni ga,
nʼna haŋajer ya ne.
4 Nʼnʼay warra hala teekoo haroo cire.
Bondawey nʼay wanga,
mennawey kul nʼay kar ka bisa.
5 Ay nee ay hundoo ra:
‹Nga ne, nʼnʼay moorandi ni!
Amma ba woo tee, ay naataa goo kaŋ ay ga kaa ka dii
ni hugoo kaŋ ra i ga ni ŋaaray.›
6 Haroo nʼay dii hala ay kormollaa ga,
guusu futaa nʼay kuubi kʼay bere.
Subey kaŋ goo teekoo cire didiji ay boŋoo ga.
7 Ay zunbu teekoo cire ka too hala
nongoo kaŋ ra tondi hondey asaasoo goo,
no din ra alaaharaa ganbey baa ka daabu ay ga hala abada.
Amma Abadantaa, ni kaŋ ti ay Koyoo,
nʼnʼay hundoo yeeti ay ra kʼay kaa guusu futu ra.
8 Waatoo kaŋ ay huru buuyan nda hunayan gamoo ra, ay na ni cee, Abadantaa, de ŋaarayroo kaŋ ay nʼa tee, too hala ni do hugoo kaŋ ra i ga ni ŋaaray.
9 Tooru ganakey na Abadantaa yankar ka mooru nga arrahamaa.
10 Ay ga don ka albarka tee ma ne, ka sargari kaa ma ne. Ay ga meefurey kul kaa kaŋ ay nʼi sanbu ni maaɲoo ga, zama cimi no hallasikaw kul sii kala ni, Abadantaa.»
11 Woo banda ga, Abadantaa na hamiisaa yaamar a ma koy guraa ga ka Yunusa yeeri.