2
Ir masi hallasiyan beeroo yala
1 Woo maaganda se ir ga hima ka hanse ka hawa hayey kaŋ ir maarʼey ga hala ir masi fondaa naŋ. 2 Šennoo kaŋ almalaykey bay kʼa har garandi cimi. Nda hooyan kul nda maayan jaŋay kul duu ngi zukandoo kaŋ nda i ga hima, 3 de ir, taka foo nda ir si zukandi nda ir na hallasiyan beeroo woo yala kaŋ ir Koyoo jin kʼa har, borey kaŋ maarʼa nʼa tabatandi ir se? 4 Irkoy na seedetaray tee i ga nda tammaasayaŋ, nda almunkaryaŋ, nda kayfi dumi-dumiyaŋ nda nooyaney kaŋ Hundi Henanantaa gʼi zamna ka sawa nda nga ibaayoo.* 2.4 Marku 16.17–20; Teegoyey 5.12.
Boro follokaa kaŋ ga hallasiyan noo
5 Aduɲɲa kaŋ goo kaa kaŋ ga ir goo ma šelaŋ, Irkoy manʼa yeeti almalaykey hinoo cire. 6 Amma boro foo na seedetaray tee nongu foo ra ka nee:
«Cin ti boro hala ni, Irkoy ma hongu a?
Adamize kul ti macin hala ma huga nda a?
7 Waati kayna ra almalaykey bisa a.† 2.7 «Waati kayna ra almalaykey bisa a», Grek šenni ra, almaganaa faa ti «Haya kayna nda almalaykey bisa a».
Nʼna darža nda beeray tee a se boŋkoyni fuula.
8 Nʼna haya kul daŋ cewey cire.»‡ 2.8 Zabur 8.5–7.
Sohõ kaŋ Irkoy na haya kul daŋ a cire, a mana haya kul naŋ kaŋ sii a cire. Sohõ da ir si dii kaŋ haya kul sii kala a cire. 9 Amma ir ga dii Isa, waati kayna ra almalaykey bisa a§ 2.9 Sorro 7to. hala Irkoy albarkaa ra a ma buuyan taba adamizey kul se, sohõ ir dii kaŋ darža nda beeray kokoy fuula goo boŋoo ra buuyanoo zaraboo kaŋ a nʼa zaa maaganda se.
10 A ga hima boraa kaŋ na haya kul taka, koyne mo hayaa kul mana takandi kala a se, a na izʼaru boobo ka koy daržaa ra. Irkoy na Isa zarabey kʼa tee boro timmante. Woo ka kate a ma tee ngi hallasiroo koyoo. 11 Boraa kaŋ ga borey jisi jere ga Irkoy se nda borey kaŋ jisandi jere ga Irkoy se kul mana hun kala boro folloku ga. Woo se a si haw ka nee i se nga armey. 12 A nee Irkoy se:
«Ay ga ni maaɲoo har agʼarmey se,
ay ga don ka ni saabu margaroo game.»* 2.12 Zabur 22.23.
13 A nee koyne:
«Agay, ay gʼay naanaa daŋ Irkoy ra.»† 2.13 Ezayi 8.17.
A nee mo:
«Agay ne, agay nda zankey kaŋ Irkoy nʼi noo ya ne.»‡ 2.13 Ezayi 8.18.
14 Takaa kaŋ nda zankey goo nda gaaham nda kuri, Isa tee sanda ngi, hala a ma nga buuyanoo ka boraa kaŋ kone buuyan gaaboo goo tee yaada, maanaa Ibilisi. 15 De mo a ma borey feeri kaŋ buuyan hunburay maaganda se ngi hunaroo kul i goo baɲɲataray ra, 16 zama šikka sii a mana kaa ka almalaykey gaa, Ibirahima hayroo no a kaa kʼa gaa. 17 Woo maaganda se haya kul here a ga hima ka hima nda nga armey hala a ma tee ngi sargari juwalkey jineboraa kaŋ ga hinna a ga laadir Irkoy goyoo ra ka jamaa zunubey tuusu. 18 Zama Isa hunday zarabi, a siyandi, woo se a ga hin ka borey kaŋ goo ma siyandi faaba.