6
1 Adiši ir kaŋ ti Irkoy goykasinawey, ir gʼa wiri war ga, war kaŋ duu Irkoy anneemaa, war masi naŋ a ma tee yaada, 2 zama Irkoy nee:
«Ay na ni ŋaarayroo taa waatoo kaŋ kan ya ne ra.
Hallasiroo zaaroo hane, ay na ni faaba.»* 6.2 Ezayi 49.8.
Nga ne, sohõ da ti waatoo kaŋ kan a se. Nga ne, hõ ti hallasiroo zaaroo.
3 Taka kul ra, ir si haya tee kaŋ ga boro kaŋandi, hala boro masʼir goyoo maaɲoo hasara. 4 Ir mmʼir boŋ cebe sanda Irkoy tam hennayaŋ haya kul ra. Ir gʼa cebe nda muɲeyan beeri, nda zarabiyaŋ, nda tilasuyaŋ, nda šiitayyaŋ, 5 nda barzuyaŋ, nda kasa huruyaŋ, nda tureyaŋ, nda taabiyaŋ, nda hannayaŋ, nda meehawyaŋ, 6 nda henanyan, nda bayray, nda suuri, nda borohennataray, nda Hundi Henanantaa, nda baji kaŋ ra almunafikitaray sii, 7 nda cimoo šennoo, nda Irkoy hinoo, nda šerretaray wongu jinawey kaŋ nda ir ga kara, ir ga gagay. 8 Borey gʼir dii nda jeeray nda kaynandiyan, maa hennay nda maa futay ra. Kʼir dii sanda boro derandikawyaŋ, ka gar ir kone cimoo goo. 9 I gʼir tee boroyaŋ kaŋ si bayrandi, ka gar ir ga hanse ka bayrandi, sanda boroyaŋ kaŋ buu, ka gar ir ga huna, sanda boroyaŋ kaŋ zukandi, amma ir mana wiiyandi. 10 I gʼir dii sanda boroyaŋ kaŋ biney maray, ka gar waati kul ir ga ɲaali, sanda talkayaŋ, amma ir ga boro boobo tee almankoyni, sanda boroyaŋ kaŋ sii nda baffoo, ka gar ir goo nda haya kul.
11 Korent borey, ir nʼir miɲey feeri ka šelaŋ war se kaaray, ir hanse kʼir biney feeri war se. 12 Ir mana war šiita, amma war hunday ka war bajoo kaccandi. 13 Sohõ ay ga šelaŋ war se sanda ay izey, war mo, war ma taka follokaa tee ir se, war ma hanse ka war biney feeri.
Irkoy hunantaa hugoo
14 War masi marga nda borey kaŋ manʼti ganakaw ka tee affoo. Zama macin margari bara šerretaray nda ifutu game? Macin margari bara gaayoo nda kubaa game? 15 Macin ti waafakaa kaŋ goo Almasihu nda Ibilisi† 6.15 Grek šenni ra, ne ra Ibilisi da se i ga nee Beliyar. game? Macin bara Irkoy ganakaa nda boraa kaŋ manʼti ganakaw game? 16 Cin ti hayaa kaŋ goo Irkoy hugoo nda tooruyaŋ game? Ka gar ir manʼti kala Irkoy hunantaa hugoo, sanda hayaa kaŋ Irkoy nʼa har ka nee nga Citaaboo ra:
«Ay ga goro i game, ay ga dira i bande.
Ay ga tee ngi Irkoy, i ga tee ay jamaa.»‡ 6.16 Sargarey 26.12; Ezekiyel 37.27.
17 Woo maaganda se
«wa fatta i game ka fay nda ey.» Ir Koyoo nʼa har.
«War masi tuku haya žiiba ga,
de agay, ay ga yadda war ga.Ȥ 6.17 Ezayi 52.11.
18 «‹Ay ga tee war se baaba,
war ga tee ya ne izʼaruyaŋ nda ize woyyaŋ.›
Ir Koyoo Hini-kul-koyoo kʼa har.»* 6.18 Samiyel 2to 7.14; Oze 2.1.