1 Tir koyraa kokoyoo Hiram na dontokawyaŋ sanba Dawda do nda sedere bunduyaŋ, nda albannayaŋ, nda bundu goykawyaŋ, i ma koy hugu cin Dawda se. 2 Woo ga, Dawda bay kaŋ Abadantaa goo ma nga kokoytaraa tabatandi Izirayel boŋ, a bay mo kaŋ nga kokoytaraa goo ma jer nga jamaa maaganda kaŋ ti Izirayel.

3 Dawda yee koyne ka woy tanayaŋ hiiji Žerizalem koyraa ra, a yee koyne ka duu izʼaruyaŋ nda ize woyyaŋ. 4 Izʼarey kaŋ a duu ey Žerizalem maaɲey ne: Šamuwa, nda Šobab, nda Nataŋ, nda Sulaymaana, 5 nda Yibar, nda Elišuwa, nda Elipelet, 6 nda Noga, nda Nefeg, nda Yafiya, 7 nda Elišama, nda Beleyada, nda Elifelet.

8 Waatoo kaŋ Filisti borey maa kaŋ Dawda yonandi ka tee Izirayel kul se kokoy, i kul tun ka koy Dawda ceeci kʼa tangam. Waatoo kaŋ Dawda maarʼa, a fatta ka koy i kubay. 9 Filisti borey kaa ka hasaraw beeri tee Refa borey gooroo ra. 10 Dawda na Irkoy ibaayoo ceeci ka nee: «Ay ga hima ka žigi ka Filisti borey wongu wala? Nʼgʼi daŋ ay kaboo ra wala?» Abadantaa nʼa zaabi ka nee: «Koy, zama ay gʼi daŋ ni kaboo ra.»

11 I koy too hala Bal-Perasim, Dawda nʼi kar no din. Woo banda ga, Dawda nee: «Irkoy na fun kaa agay iberey jamaa ra, ay nʼi kar, ni mma nee fun kaŋ hari nʼa kaa.» Woo se i na nongoo din maaɲoo daŋ Bal-Perasim (maanaa «Koyoo kaŋ ga fun kaa»). 12 Filisti borey zuru ka ngi koyey naŋ no din, Dawda nee kaŋ i mʼi ton kʼi tee boosu.

13 Woo banda ga, Filisti borey yee koyne ka kaa ka hasaraw beeri tee Refa borey gooroo ra. 14 Dawda yee koyne ka Irkoy ibaayoo ceeci, Irkoy nee a se: «Masi koy i tangam. Ni mma kuubi ka koy nda ngi banda here, ma kaa nda nongoo kaŋ ra tuuriɲaŋey goo tenje ka kaŋ i ga. 15 Waati kaŋ nʼga maa cee jinde tuuriɲaŋey boŋ, waatoo din ma fatta ka koy i tangam, zama Irkoy no ma fatta ni jine ka Filisti borey kar.» 16 Dawda na hayaa tee kaŋ nda Irkoy nʼa yaamar. I na Filisti borey kar za Gabawoŋ koyraa ra ka koy hala Gezer koyraa ra. 17 Dawda maaɲoo huru gandawey kul ra. Abadantaa na Dawda hunburay beeri daŋ gandawey kul ra.