1 Əndi gə Pol gə Mãr̰ĩ gədən gun gə Jesu Kris giyəw i gə ərəmə̂ duwa. Nə̂ jangəgə i nare nə̂nə̂ Mãr̰ĩ nə̂ ɗəbə gwale day dəwə̂ jang nə̂ dam managə ciri də geche də Epeslə̂. 2 Kal Mãr̰ĩ gə i abrandə me Aba ciri gə Jesu Kris me piynə̂ bədə̂gə dədə̂ngə̂ me ꞌyanang həlala jwam me ca.

3 Bwanaw Mãr̰ĩ gə Aba ciri ənda gə Jesu Kris abə̂w di jilay dara an̰ji ꞌyandə bii gə pii-yə̂ duwa gə lade gə dundi duwa swa gandəw daa dara də̂ bwarang gə Jesu Kris mən. 4 Mãr̰ĩ piyəndə managə səwə̂ dara ba də̂ kədənə̂ng nare duwa dara də̂ ɓamarang daa gə Jesu Kris di i pii pa gə an̰ji wor asa sən̰a sən̰. An̰ji piyə̂ndə yande dara ba də̂ kədənə̂ng nare nə̂ dusərə̂gə wusbə nə̂ mani nə̂ acn̰e hin̰e kaw ilə̂ sədə̂gələ̂ bə̂də̂ managə dərə̂wə̂. I dara dwani duwa di, 5 Mãr̰ĩ ərəm dusəwə̂ piy ɓəg dara ba də̂ kədənə̂ng ya dəndaw de dara mani nə̂ Jesu Kris algə, an̰ji ur mani di ba alnana yande i dara dusi duwa də lade di. 6 An̰ji al yande dara ba də ꞌwagənaw ənda gə jilay dara dusi duwa də lade nan̰ də ɗoy mani bam pad də an̰ji al ganandə pəgin̰ di. An̰ji ꞌyandə dusi də lade pəgin̰ di i dara də̂ ɓamarang daa mən gə gorəndəw gə an̰ji urəw nan̰ di.

7 I dara də̂ ɓamarang daa mən gandəw me an̰ji kədəndə daa acn̰a əndalə̂ di i gə bare gənə̂ Jesu duwa gə bor dodə di me an̰ji kal dusəw həlal managə acn̰a ənda gə də̂ aləw dəwə̂. Ya ta di de me Mãr̰ĩ al gəl gə dusi də lade duwa də geche nan̰ də an̰ji al gə nare di. 8 Mãr̰ĩ ꞌyandə dusi də lade di nan̰ sədə̂ndələ̂ me ꞌyandə dərin̰ naa nan̰ me ꞌyandə dwana dədə yə̂ə̂ gə mani dədə̂ndələ̂ me ca. 9 An̰ji gələndə mani duwa nə̂ budə̂r dodə piy nə̂ an̰ji ur ba algə di. Ta di me i dusi duwa də lade nan̰ də an̰ji ərəm ba aldə gə Jesu Kris di. 10 Dawa də wala gə Mãr̰ĩ ərməw di dara neyama mwom da, an̰ji ha ala mani nə̂ an̰ji ur ba algə di. An̰ji ha daya mani nə̂ an̰ji bogə daa me nə̂ dodə̂ sən̰a dədə̂ me pad managə dole mən tenene gəndəwə̂, dole gə ta di i Kris di.

11 I dara ɓamara ənda gə Kris di daa mən də me, nə̂ ꞌyo nin gə mani nə̂ Mãr̰ĩ biyəndə gə bi di, dara Mãr̰ĩ piyə̂ndə pii pa səwə̂ managə ərmə̂ duwa-lə̂; ər̰ə Mãr̰ĩ kal mani nə̂ ta di alal yande dara an̰ji ərəm an̰ju me dusəw kaw ure me ca 12 Ina yande da kal nare yarna mani nə̂ an̰ji al ganandə me gə ꞌwagənaw gə jilay dara gasnani duwa di, dara neyendə da də̂ ꞌyang i nare nə̂ də̂ ərmə̂ng Jesu Kris dəwə̂ pii.

13 ꞌYeni nə̂ anə̂ dwaya gwale səw gə i Nõ də lade dədə bələ̂ng me ca da ꞌyə̂ni kaw anə̂ ɓamar i gandəw daa mən me ca. Gandəw an̰ji me ꞌyeni nə̂ anə̂ kala dusərə̂ng dəwə̂ di Mãr̰ĩ ꞌyang dundi duwa də an̰ji biyə̂ng gə bii di ya ba piyə̂ng lamba de sədə̂ngə̂ dara ꞌwacn̰ang nəm. 14 An̰ji ꞌyandə Dundi duwa di pii pa, i tandi me ha gələ̂ndə mani nə̂ lade nan̰ nə̂ an̰ji bi gə bii ba ha ꞌyagə nare duwa di. Mani nə̂ ta di darang ꞌywagəle wala gə an̰ji dara kədəndə daa bər̰in̰ di, yande da bwanaw jilay dara gasnani duwa də nan̰ di.

15 I dara ta di me əndi kaw wala gənə̂ doy dara ba nə̂ kal dusərə̂ng Aba ciri gə Jesu dəwə̂ me dwani dan də anə̂ al gə kwanang woni kala dusərə̂gə Mãr̰ĩ dəwə̂ me ca da, 16 Nə̂ aləw Mãr̰ĩ doche daa daa dara darang, managə amsa niyə̂ da nə̂ ərəm lə̂ dədə̂ngə̂ 17 Ər̰ə nə̂ amsə Mãr̰ĩ gə i Aba ciri ənda gə Jesus Kris Mãr̰ĩ duwa di, me an̰ji i abə̂w gaba dwana nan̰ di nə̂ amsəw dara kaləw a ꞌyanang dundi duwa də də ꞌyang dərin̰ naa me an̰ji gəlnə̂ng səw pəden̰ə̂ anə̂ ꞌwacn̰anaw ladna me ca. 18 Nə̂ amsə Mãr̰ĩ ɗang dara ba tin̰nə̂ng dədə̂ng bam dara banə̂ ꞌwacn̰ana mani nə̂ an̰ji ꞌwagan ba nə̂ ha ꞌywagəle nə̂ anə̂ kal ərəmə̂ dan lə̂ dədə̂gələ̂ di. Nə̂ amsəw ɗang dara banə̂ ꞌwacn̰ana mani nə̂ lade nan̰ nə̂ woni same nə̂ an̰ji gamgə dara nare nə̂ duwa di. 19 Nə̂ amsəw ɗang dara banə̂ ꞌwacn̰ana dwana duwa də geche də ɗoy mani bam pad me dwana də ta di wandə lə̂ neyendə nə̂ də̂ kalang dusərə̂ndə dəwə̂. Dwana duwa də ta di i də geche nan̰e, 20 I dwana də ta di me ala giyə̂ Jesu Kris səwə̂ wala gə Mãr̰ĩ dəməw nəm daa munə-lə̂ me ꞌwuw ya nəm daa chə̂w əsə̂w gə abe-yə̂ me di. 21 Managə ta lə̂ da an̰ji dam paja nə̂ daa gechide day dədə̂gələ̂ me dundi nə̂ acn̰e gechide day pad dədə̂gələ̂ me, suməw ꞌogə ɗoy sumi gə ꞌwaga gə ɗang gənə̂ mani nə̂ caga ka day bam pad me, nə̂ wara pii kaw day bam me ca. 22 Mãr̰ĩ chəw mani pad managə dodə̂ gədawə̂ me, an̰ji biyəw chəw dole managə nare nə̂nə̂ Mãr̰ĩ duwa nə̂ dayar mana mən dədə̂gələ̂ me an̰ji Kris di ɗoy mani bam pad me ca. 23 Nare nə̂ ta di i ya doni gə səw de me, Kris dam lə̂ nare nə̂nə̂ Mãr̰ĩ duwa nə̂ dayar dam mana mən sədə̂gələ̂ ongə daa telele me Mãr̰ĩ səw duwa gang kaw dam lə̂ Kris səwə̂ onəw daa telele me ca.