Kalata ku
Bahebeli
Busansulushi.
Libuku lya Bahebeli ni kalata ikute kuyuminisha bantu ilaleshenga mbuli Yesu ncalakwanilisha bushinshimi bwingi bwa mu Cipangano ca Kaindi. Lyalalembweti mulumbe. Pali kutondeka kwapita makumi asanu ne limo (60) Ku Cipangano ca Kaindi kuli mulibuku lya Bahebeli, kulaleshenga pantangalala Yesu mwalakwanilishila bushinshimi ne ncito shalikukute Shimilumbo Mukulene wa Bayuda. Pacebo ici ili libuku lyalikuba lyelela kuyuminisha baklistu Baciyuda. Libuku lya Bahebeli lilaleshenga Yesu mwalakwanilishila Milawo ya Mose kwambeti beshimilumbo bakabule kuyandika kayi kubenga milumbo. Yesu ewalaba mulumbo walabengwa kankanda kamowa kwamuyayaya pacebo ca bwipishi bwetu. Baklistu mu masuba etu ngabacana kuyuminishiwa mu kalata ya Bahebeli kwambeti bapitilishe kukonkela Yesu Klistu uyo walapesheti tucikonshe kushoma muli Lesa, kayi nekupitilisha kushoma endiye. 12:2.
Paliyawa umwinshi muntu walalemba libuku lya Bahebeli, nomba beshikuyanda kwishiba bintu bingi (Scholars) Bakute kuyeyeti ni mutumwa Paulo, nambi Luka, nambi Banabasi,
Kayi cindi ncelyalembwa nkaceshibikwa sobwe, nsombi bangi bashometi lyalalembwa kacitana cishika caka ca (70 A.D.) Yelusalemu walonongeka mu (70 A.D) Nomba mulembi wa iyi kalata lambanga sha Yelusalemu katana wonongeka, libuku lya Bahebeli lya lalembelwa mumunshi wa Loma 13:24 kayi kulayeyewangeti lyalamwaiwa mu mibungano ingi.
Mitwi ya makani
Mulembi laleshengeti Yesu wapita bashinshimi ne bangelo 1:1 mpaka 4:13
Kayi lapitilishinga kulesheti wapita beshimilumbo balikusebensela mu Ng'anda ya Lesa mu Yelusalemu 4:14 mpaka 7:28
Kayi mulimo wa Yesu wapita Cipangano ca Kaindi ncalabamba Lesa ne bantu kupitila mu Milawo njalapa Mose 8:1 mpaka 10:31
Panyuma pakwamba Yesu ncapita byonse munshila iliyonse, mulembi lapanga malalilile angi ela kusebenseshewa 10:32 mpaka 13:17
Pakupwililisha mulembi lapwililishinga kalata yakendi ne kuyuminisha bantu kayi nekupa mitende 13:18, 25
1
Kalata yalalembelwa Bahebeli
Maswi a Lesa kupitila mu Mwanendi
1 Mumasuba akunyuma Lesa walikwamba kubamashali betu tunkanda twingi kayi munshila shashiyana shiyana kupitila mubashinshimi. 2 Nomba mucindi cino camapwililisho Lesa latwambilinga kupitila mu Mwanendi, ngwalasebensesha pa kulenga kwilu ne cishi ca panshi, kayi engwalasala kwambeti pa cindi ca mapwililisho bintu byonse bikabe byakendi. 3 Kubekema kwa bulemuneno bwa Lesa kulabonekelenga mu Mwanendi, kayi ewakoshana ne Lesa, ewabikwabilila bintu byonse kupitila mumaswi akendi angofu. Mpwalatusambisha bwipishi walaya kwikala Kwilu kucikasa calulyo ca Bwami bwa Lesa.
Bukulene bwa Mwanendi Lesa
4 Mwanendi Lesa nimukulene kupita bangelo, pakwinga lina ndyakute lyapita maina abangelo. 5 Pakwinga kufumowa kaindi paliya mungelo Lesa ngwalambileti,
“Njobe Mwaname
lelo ame njame Baiso”
Lesa uliya kwambilapo mungelo naba umo kwambeti,
“Ninkabe Baishi
neye nakabe Mwaname.”
6 Nomba Lesa mpwalikutuma Mwanendi wakusomona pa cishi ca panshi walambeti,
“Bangelo ba Lesa bonse bela kumukambilila”
7 Nomba kwamba sha bangelo Lesa walambeti,
“Nkute kusandula bangelo
kuba lukupwe kayi
nkute kusandula basebenshi bakendi kuba nsakamwenge sha mulilo.”
8 Nomba ku Mwanendi, Lesa walambeti,
“Obe Lesa,
bwami bwakobe nteti bukapwe!
Nukendeleshe bantu bakobe
mubululami.
9 Walasuna bululami ne kupela bwipishi.
Neco ame Lesa wakobe, ndakusala ne
kukupa bulemu bunene
kupita banobe bonse ne kukunanika mafuta akondelesha.”
10 Kayi Lesa walambeti,
“Obe Mwami pakutanguna njobe walalenga
cishi capanshi kayi ne
makasa akobe walalenga kwilu.”
11 Ibi nibikapwe, nsombi obe nukabengaponga cindi conse.
Byonse nibikakuluketi byakufwala.
12 Nukabipete pete pamo,
eti munganjo.
Kayi nibikashinte kubeti byakufwala. Nsombi amwe nkamushinti sobwe, nkamubelenge byaka byenu pakwinga buyumi bwenu nkabupu. 13 Lesa nkalambilapo umo wa bangelo kwambeti, “Ikala ku cikasa cakame ca lulyo mpaka nanshi nkakome balwani bakobe bakabe cakulyatapo myendo yakobe!” 14 “Sena bangelo bonse nteyo mishimu ikute kutumwa ne Lesa kuya kusebensela bantu beti bakapuluke?”