Kalata ya cibili ya Paulo kuli
Timoti
BUSANSULUSHI
Libuku lya Timoti wa cibili ni kalata yacibili ya mutumwa Paulo njalatuma kuli shikwiya Timoti. Libuku ili lya Timoti lyalalembwa cakumapwililisho a buyumi bwa Paulo. Pacindici walikuba wasungwa mu jele ku Loma. 1:16. Palikuba kunyumfwana kwaina pakati pali Paulo ne Timoti, kayi cindi conse walikumukuweti mwaname Bafilipi 2:22, 2 Timoti 1:12; 1:18,
Kayi ni kalata ya makalata ana kufuma kuli Paulo alatumwa kubantu mumusena wakutuma ku mubungano. Makalata ambi atatu ni 1 Timoti, Tito ne Filimoni. Pacindi Paulo ncalikulemba Timoti wa cibili, baklistu bangi balikuba mu mapensho mu bwendeleshi bwa Ciloma, mpani ecebo cakendi Paulo ncalikubela mujele, ne kupa malailile Timoti kwambeti alimbikile mumakatasho. Mbuli mu Timoti wakutanguna, Paulo lamucenjeshenga Timoti sha beshikwiyisha bandemi shibili 1 Tim 1:16-18. Kayi lamwambilinga Timoti kwambeti kuntangu kulakesana cindi camakatasho. 2 Tim 3:1
Mitwi ya makani
Cakutanguna Paulo lamupanga mitende Timoti 1:1-2
Kayi lamuyuminishinga Timoti kuba walimbikila 2:1-13
Cakonkapo lamupanga malailile angi 2:14-26
Lamucenjeshenga sha bintu byeshibikenshike kuntangu, kayi ne nshila yakwinshilamo 3:1 mpaka 4:8
Paulo lapwishinga ne kwambapo kwakendi pali Timoti.
1
1 Njame, Paulo mutumwa wa Klistu Yesu kwelana ne kuyanda kwa Lesa, walatumwa kuya kukambauka sha buyumi mbwalatushomesha mukwikatana ne Klistu Yesu. 2 Ndalembelenga obe Timoti mwaname ngonsuni.
ndasengengeti luse, nkumbo kayi ne lumuno lwa Lesa Bata ne Klistu Yesu Mwami wetu, bibe pali njobe.
Lalumbaishinga Lesa ne kumuyuminisha Timoti
3 Ndalumbunga Lesa ngondasebenselenga ne miyeyo yaswepa yabula mbuli bamashali bakame bakulukulu ncebalikwinsa. Ndalumbunga pakwinga nkandakulubunga mu mipailo yakame munshi ne mashiku sobwe. 4 Ndanuka ncewalikulila misoshi, nkute kuyanda kwisa kukubona kwambeti nkakondwe ca makasa abili. 5 Ndanuka lushomo lwa ncinencine ndobakute banyoko ba Yunisi ne bankambuyobe batukashi ba Loisi, ndashometi nenjobe elushomo ndokute.
6 Neco ndakwanushungeti usheko mano kucipo ca Lesa ncokute ico ncewalatambula pasa mpondalabika makasa akame pali njobe ucisosele mulilo. 7 Pakwinga Lesa liya kutupa Mushimu wa buyowa sobwe, Mushimu wa Lesa ukute kutupa ngofu, nelusuno kwambeti tucikonshenga kulitibuka.
8 Neco kotanyumfwanga nsoni kuba kamboni wa Mwami Yesu, nambi kunyumfwa nsoni cebo ca kwambeti ame ndasungwa muno mu jele, obe libambile kucana mapensho, nomba Lesa nakakupe ngofu shakukambauka Mulumbe Waina. 9 Walatupulusha ne kutukuwa kwambeti tube bantu bakendi, nkatwalikuba twelela kucitambula, nsombi bwalikuba bubambo ne nkumbo sha Lesa. nkumbo nshalatulesha kupitila mukwikatana ne Klistu Yesu kacitana cilengwa cindi. 10 Lino Lesa walatuyubulwila ibi bintu mpwalaboneka Mupulushi wetu Klistu Yesu, nendi ewalapwisha ngofu sha lufu kupitila mu Mulumbe Waina, latwishibishi cena motwela kucanina buyumi butafu.
11 Lesa walansala kwambeti mbe mukambaushi, mutumwa kayi shikwiyisha Mulumbe Waina. 12 Encondapengelenga, ndiya nsoni pakwinga ndimwishi ngondashoma. Neco ndashometi wela kutabilisha cena bintu mbyabika mumakasa akame mpaka busuba bwashakabwele. 13 Lino ikatisha camakasa abili maswi acancine ncine ngondalakwiyisha kwambeti, lushomo ne lusuno lwetu mukwikatana ne Klistu Yesu bibe cilesho kwakobe ca kukonkela. 14 Kupitila muMushimu Uswepa ngotukute, ukunyamfwe kubamba cena buboni bwa palubasu mbowalapewa.
15 Ucishi kwambeti bonse mu cimpansha ca Asiya balanshiya ndenka, pali abo balanshiya pali Figelo ne Hemojene. 16 Nkumbo sha Lesa shibe mung'anda ya Onesifolo, pakwinga ewalikwisa kunjuminisha tunkanda twingi, kayi nkali kunyumfwa nsoni pakumbona kandi ndasungwa nshimbi mu jele. 17 Mpwalesa ku Loma walanangaula mpaka walancana. 18 Nkumbo sha Lesa shikabe pali Onesifolo pa busuba bwa lombolosho. Obe ucishi kufula kwa ncito shaina nshalikunyamfwa mpondalikuba ku Efenso.
Mushilikali wa Klistu