Kalata yacibili ya
Petulo
BUSANSULUSHI
Kalata yacibili ya Petulo yalalembwa ne mutumwa Petulo, nomba bantu nabambi baiyiya, lelo balatonshonyanga ici. Ningacibeti, ni muntu naumbi walamulembela. 1:1,
Shikulemba walambeti ni kamboni wancinene shabuyumi bwa Yesu ne kwambeti walikubako ku mulundu wakusanduka 2 Petulo 1:17-21 Na ni Petulo walalemba kalata iyi ekwambeti, walailembela ku Loma kumapwililisho acaka ca 60 A.D. Katana ashiniwa, Petulo lambangeti, ni kalata yacibili iyi, 2 Petulo 3:1 Palikuba kupusanako kwa cindi calalembewa kalata iyi ne ya 1 Petulo.
Walailembela ku baklistu bonse. Petulo walikulembeti abayuminishe bonse bashoma muli Lesa kwambeti bekalenga cena mubuyumi bwabo, kayi ne kubacenjesheti nkabatakonkanga beshikwiyisha bandemi shibili ne kwambeti nkabatashako mano kuli abo balambangeti Yesu lemuku kubwela. Nsombi eti Lesa liyawa kwimuka sobwe nomba uciyandeti, muntu uliyense akapuluke 2 Petulo 3:8-9 Ici ecebo ca kwikalila mubuyumi cena 2 Petulo 3:14
Mitwi ya makani
Petulo lalisansululunga ne kubambila beshikubelenga 2 Petulo 1:1-2
Ne kubanusheti bekale cena mubuyumi kwelana ne mwalayandilinga Lesa 2 Petulo 1:3-21
Labacenjeshenga sha beshikwiyisha bandemi shibili, ne ceti cikabeshikile kumapwililisho 2 Petulo 2:1-22
Petulo kayi labayuminishinga abo bashoma muli Lesa kwambeti bekale cena mubuyumi bwabo ne kulibambila shabusuba bwakwisa kayi Yesu, 2 Petulo 3:1-17.
1
1 Njame, Shimoni Petulo, musebenshi kayi mutumwa wa Yesu Klistu, ndalembelenga bantu balatambula lushomo ulo nenjafwe ndotwalatambula. Balalutambula cebo ca bululami bwa Lesa ne Mupulushi wetu Yesu Klistu.
2 Lesa amunyumfwile nkumbo nekumupa lumuno lwesula pakumwishiba Lesa ne Yesu Mwami wetu.
Lesa ukute kukuwa ne kusala bantu
3 Lesa mwangofu shakendi latupa byonse mbyetulayandanga mubuyumi bwa ciklistu kupitila mulwinshibo lwa uyo walatukuweti tuyabane bulemu ne kwina kwakendi. 4 Munshila ilico latupa cipo cinene cilayandikinga ncalatulaya, kwambeti kupitila mubipo bilicisa mukakonshe kuleya lunkumbwa lwaipa luli mucishici, kwambeti mutambuleko buyumi bwa Lesa. 5 Lino kamubani nempapa musankanye mikalilo yaina pa lushomo lwenu, nawo mano mwasankanye pa mikalilo yenu yaina, 6 kayi pa mano musankanyepo kulikanisha, pakulikanisha musankanyepo kulimbikila, kayi pa kulimbikila musankanyepo buyumi bwa kukambilila Lesa, 7 pabuyumi bwa kukambilila Lesa, musankanyepo nkumbo, pankumbo musankanyepo lusuno. 8 Na mikalilo iyi ifula mulinjamwe, nteti mukalilwe nekuba babula pindu pa mano akwishiba cena Mwami wetu Yesu Klistu. 9 Nomba abo babula mikalilo ilicisa bashipilwa, nkabela kubona patali sobwe, kayi balalubu kwambeti balasukwa bwipishi bwabo bwakaindi.
10 Ecebo cakendi mobanse bame, kamubani nekangwabu kwambeti mushininkisheti Lesa ewalamukuwa nekumusala. Mwenseco nkamwela kuwa mulushomo sobwe. 11 Neco nakamucalwile cishinga cakwingilila mu Bwami butapu bwa Lesa wetu ne mupulushi wetu Yesu Klistu.
12 Ecebo cakendi ame ndayandanga kandimwanusha cindi conse, nambi mucishi ne kushoma ne moyo wonse cancine ncine ncemwalatambula. 13 Ndabonongeti caina kwambeti kandicili muyumi ndimuyuminishenga pakumwanushako. 14 Pakwinga ndicisheti ndilipepi kufwa, mbuli Yesu Klistu ncalanjishibisha. 15 Nomba ninjelekeshe kubambeti nambi nkafumepo mukapitilishe kubyanuka cindi conse.
Bakamboni ba bulemu bwa Klistu
16 Afwe tuliya kukonkela tulabi, mpotwalamwishibisha kwisa kwangofu kwa Mwami wetu Yesu Klistu. Nsombi twalensa kubona ne menso etu bukulene bwakendi. 17 Neye walatambula bulemu bunene kuli Lesa Bata, mpwalanyumfwika maswi alafuma kuli Bata Balemekeshewa kupita bonse akwambeti, “Uyu e Mwaname ngonsuni, mulyendiye ndakondwa” 18 Maswi awa alafumina kwilu afwe twalanyumfwa pakwinga twalikuba nendi pa mulundu waswepa usa.
19 Neco tucishi lino nditu kwambeti maswi asa abashinshimi nacancinencine. Caina kwambeti lino mulangishishe pa lampi ilamunikinga mumushinshe, mpaka cindi cakumaca ntanda mpweshikatatike kumunika mumyoyo mwenu. 20 Nomba cakutanguna kamwishibani, paliya muntu wela kucikonsha kusansulula cena maswi abashinshimi alembwa mu Mabala. 21 Pakwinga maswi abushinshimi aliya kufumina kukuyanda kwa bantu sobwe, nsombi Mushimu Uswepa ewalikubambisha maswi alikufumina kuli Lesa.