7
Yohanes Ɔnya Maturi Kukpi Kulafa Sina-ina Ma I Ɣaa Ɔɖi I Israel.
1 Nnɛgbe kama ne, lonya Ɣaa makpabo ina ma nɣɛ i kayiiso akpakpai ana iso. Matɛ̃ ɔri sɔ ɔwiri kuwɛ̃ si ɔdaasikpɛ̃ ɔbɔrɛ i akpakpai ana wagbe iso i karɔ̃ iso o-o, ɔpo iso o-o, ɣee nane kudziri kukuwɛ̃ ame.
2 Loledza Ɣaa kpabo mama inya gɔ ɔbɔrɛ i kuɣɛ̃kabɔrɛkɔ̃ isɛ fiɛ ɔto Ɣaa gɔ mba ngbã ikparĩ isiara. Ɣaa kpabo gɔgbe ɔla kulu teteree ɔɣere Ɣaa makpabo ina ma maɖi ɔri sɔ maate karɔ̃ gu ɔpo inyɛwe, 3 maɣɛ sɔ, “Midaabara karɔ̃ ɣee ɔpo, ɣee adziri kuira boa gbɔgbɔɔgbɔ bosu ikparĩ isiara bosia bo Ɣaa maɖabo ikparĩ i atɔngbo tɔtɔ.” 4 Ne marɔ maturi ma matã Ɣaa ikparĩ ala Ɣaa ikparĩ isiara i Israel nlɛ miweo-minyɔ ame lonɔ ne. Ma nɖe maturi kukpi kulafa sina-ina.
5 Maturi kukpi kuweo-kunyɔ ɔbɔrɛ i Yuda kalɛ ame.
Ma kukpi kuweo-kunyɔ ɔbɔrɛ i Ruben kalɛ ame.
Kukpi kuweo-kunyɔ ɔbɔrɛ i Gad kalɛ ame.
6 Kukpi kuweo-kunyɔ ɔbɔrɛ i Aser kalɛ ame.
Kukpi kuweo-kunyɔ i Naftali kalɛ ame,
fiɛ kukpi kuweo-kunyɔ ɔbɔrɛ i Manase kalɛ ame.
7 Kukpi kuweo-kunyɔ ɔbɔrɛ i Simeon kalɛ ame.
Kukpi kuweo-kunyɔ ɔbɔrɛ i Levi kalɛ ame.
Kukpi kuweo-kunyɔ ɔbɔrɛ i Isak kalɛ ame.
8 Kukpi kuweo-kunyɔ ɔbɔrɛ i Zebulon kalɛ ame.
Kukpi kuweo-kunyɔ ɔbɔrɛ i Yosef kalɛ ame.
Fiɛ kukpi kuweo-kunyɔ ɔbɔrɛ i Benyamin kalɛ ame.
Iturikuri Siare Nɛ Losakanya I Kato.
9 Nnɛgbe kama ne, lonya iturikuri siare nɛ i kuwɛ̃ iibawo ɔka fiɛ mabɔrɛ i maturi agbãagbã ɔɖuɖu ndɛ̃. Mabɔrɛ i kalɛ biara gu kaɖe biara gu siɖe biara dzɛ masɛ maɣɛ ame. Maya i sigaraiyara gu Sɛrɛrerɔ̃ Ibi katɔ̃. Ma ɔɖuɖu pia awu fudza tagbaraa fiɛ mato sikɛ. 10 Mato mala kulu teteree maɣɛ sɔ,
“Bo Ɣaa gɔ nsi
i sigaraiyara iso
gu Sɛrɛrerɔ̃ Ibi nsɛ matã maturi ngbã.”
11 Ɣaa makpabo ɔɖuɖu ɣɛ maki malɔ sigaraiyara gu makpakpa gu ara ka ana wa mba ngbã, mapɛ agɛgɛ̃ mafu katɔ̃ i karɔ̃ i sigaraiyara katɔ̃ masɔrɛ Ɣaa 12 maɣɛ sɔ,
“Si iba ngbɔ!
ile gu ikpawaĩ,
gu iwola gu siba,
gu kuwarɛ gu ɔle gu kato ikɔlɛ nɖe bo Ɣaa ɔkpɛ,
ita i kiniɔ gbɔgbɔɔgbɔ kayi daaro daaro!
Si iba ngbɔ.”
13 Makpakpa mamɔ ndɛ̃ ɔwɛ̃ ɔkarɛ me sɔ, “Mabe maɖe mpia awu fudza tagbaraa fiɛ lɛ mabɔrɛ?”
14 Ne lotã wũ mmuai sɔ, “Bosate, loiɣe, fɔ nɣe.”
Mmɔ ɔto ɔɣere me sɔ, “Mmagbe nɖe mma loki i inyɛwe siare ame mabɔrɛ ne. Mafore ma awu i Sɛrɛrerɔ̃ Ibi ima ame afudza futututu. 15 Ne ɔso ne,
maɣɛ i Ɣaa sigaraiyara katɔ̃
mato masɔrɛ wũ kasɛ̃ i kakɔme i ɔ̃ isɔrɛyo.
Fiɛ ngɔ nsi i sigaraiyara iso aawe i ma ndɛ̃ ɔdzuɛ̃ ma.
16 Ɔtukã ɣee kukã
iisibakpɛ̃ ma kunya.
Fiɛ kuɣɛ̃ ana iisibabɛbɛ ma kunya.
17 Alasɔ Sɛrɛrerɔ̃ Ibi nɛ mpia i sigaraiyara ndɛ̃ nɖe makɔdze.
Ɔto ɔ̃akɔ ma ɔkɛlɛgu ngbegɔ i ndu mɛ nsɛ mitã ngbã ɔgɔdɛ̃,
fiɛ Ɣaa aanukutu ma nnɔmɛ ɔɖuɖu i katɔ̃.”