1 Yesu ɔɣere ɔ̃ marasuãdze sɔ, “Ɔwi ɔwɛ̃ ame ne, ranase ɔwɛ̃ ɔwe gɔ ɔba ɔɖabo gɔ nsɛ ɔnyɔ ɔ̃ ara iso. Maba maaɣere ranase gɔgbe sɔ ɔɖabo gɔ nto ɔnyɔ ɔ̃ ara iso to ɔnina wũ sikã. 2 Ne ɔso ranase ɔkpere ɔ̃ ɔɖabo gɔgbe ɔɣere wũ sɔ, ‘Be iɖe nto lonɔ i fɔ iso ngbe? Wũ ara wa ɔɖuɖu ato anyɔ iso ne, su siko bɔ si boki i ara ame alasɔ aisibawo wũ ara ɔnyɔ iso ita i kiniɔ.’

3 “Mmɔ i ɔɖabo gɔgbe to ɔɣere so sɔ, ‘Wũ ɔkɔse ka ɔfɔ me karabara iso. Be loala loɔbara? Lona ɔle gɔ loakpɛ̃. Ara iwanyi ana to iakpɛ̃ me kunuarɛ. 4 Ɛɣɛɛ̃! Loɣe nnɛ loabara fiɛ si wũ karabara ɔbɔrɛ me i nrɔɔ̃ ame ne, wũ malaa aafɔ me manyɔ me iso i ma ayo.’

5 “Ne ɔso ɔkpere mma ɔɖuɖu nto ɔ̃ ɔkɔse kuso ɔwɛ̃ ɔwɛ̃. Ɔkarɛ ɔɖeakatɔ̃ sɔ ‘Nda ato wũ ɔkɔse?’

6 “Ne ngɔmɔ ɔtã wũ mmuai sɔ, ‘Nnɔĩ akuku siare kulafa.’

“Ne ɔɖabo gɔgbe ɔɣere wũ sɔ, ‘Su fɔ kuso gɔ ato ɔko bɔ. Sɛ i karɔ̃ si atsɛrɛ sɔ akuku siru kere loɔkuti aatã.’

7 “Ngbɔ ame ɔkpere ɔmama ana gɔ nto ma kuso sɔ, ‘Fɔ ɣɛɛ? Nda kuso ato?’

“Sose gɔmɔ ɔ̃ wũ ɔɣɛ sɔ, ‘Loto atita sikoto kulafa kuso.’

“Ne ɔɖabo gɔgbe ɔɣere wũ sɔ, ‘Su fɔ ɔko gɔ ame botsɛrɛ fɔ kuso bopia bɔ si atsɛrɛ fasinafasina apia.’

8 “Nnɛgbe ɔso ne, ɔkɔse gɔgbe ɔle ɔ̃ ɔɖabo gɔ nna ɔnukuare ngbe ala ɔ̃ inɔgba i kayu siri dzɛ iso ɔkigu wũ ɔso. Gbaã ne, mma nsi ngbã matã kayi gagbe ara ne, masu ma anɔ masia nnɛ mato mabara iso kɔra maɖo mma nto mabara Ɣaa sigarakaɖekɔ̃ karabara.” 9 Ne Yesu ɔkɛlɛgu i katɔ̃ ɔɣere ma sɔ, “Misu mi kayiiso karana mibuai maturi. Iyɔ si kaba kaaro ne, Ɣaa aafɔ mi ɔpia i ɔ̃ kasɛkɔ̃.

10 “Ɔbiara gɔ nsɛ ɔmɔɛ̃ ara wiriwiria ɔla i ɔnukuare ame ne, maatã wũ ɔri i ara siare ana iso. Ɔbiara gɔ loisɛ ɔɖe ɔnukuare i ara wiriwiria ame ne, ɔ̃ibaɖe ɔnukuare i ara siare ana iso. 11 Ne ɔso si miimɔɛ̃ kayiiso karana mila i ɔnukuare ame ne, nda maabara fiɛ mafɔ mi maɖe i siwarã ara wa i Ɣaa sɛ ɔtã iso? 12 Fiɛ si aiɖe ɔnukuare i ara wa nɖe ɔturi mama are iso ne, nda iabara fiɛ maasu fɔ mɔmɔ are matã-ɔ?

13 “Ɔɖabo kuwɛ̃ iibawo makɔse inyɔ ɔsumu. Si iiɖe ngbɔ ne, ɔto ɔ̃aɖɔɛ ɔwɛ̃ ɔtsiri ɔwɛ̃. Ɣee ɔ̃awarɛ ɔwɛ̃ ɔta ɔya ɔwɛ̃ iso. Miibawo Ɣaa gu karana ɔsɔrɛ.”

14 Gɔ ma Farisise ɔnɔ ara wa i Yesu ɔɣɛ ne, mabara wũ aɣiãra alasɔ masɛ maɖɔɛ sikã gbaã. 15 Mmɔ i Yesu ɔɣere ma sɔ, “Miɖe maturi ma nsɛ mate so lɛ masɛɛ i maturi anɔ. Ɣɛɛ Ɣaa ɣe mi situ ɔɖuɖu ame. Alasɔ ara wa lofɔ kuɣa i maturi anɔ ne, anyanyara aɖe i Ɣaa anɔ.

16 “Mose mmara ɔko gu Ɣaa kanyamaɖidze ara wa matsɛrɛ masɛ ne, abara wã karabara isɛ iabo Ndupiedze Yohanes ɔwi. Ita i ɔwi gɔmɔ ne, minɔ sɔ mato maɣɛ Itɔ̃me Bielea i Ɣaa sigarakaɖekɔ̃ iso. Fiɛ ɔbiara to ɔkpɛ̃ sɔ ɔ̃ana ɔri ɔbo i mmɔ. 17 Ɣɛɛ ne, ise pɔkɔsɔɔ sɔ kato gu karɔ̃ aawã iɖo sɔ maakpasera mmara kakpoi kosoi tsɔra maɖi.

18 “Ɔrɛrɛ̃ biara gɔ losɛ̃ ɔ̃ ɔre fiɛ ɔyiri ɔmama ne, marɔ̃go rɔdze ɔɖe. Fiɛ ɔrɛrɛ̃ gɔ loyiri ɔrɔ̃go gɔ masɛ̃ ne, ɔsiai ɔturire.

19 “Ɔrɛrɛ̃ ranase ɔwɛ̃ gɔ nsɛ ɔpia ara wa lofɔ kuɣa fiɛ ɔwe i isoɣɔ ame i ɔ̃ ngba ayi ɔɖuɖu ame ɔwe. 20 Wɛrɛba ɔwɛ̃ ana gɔ marɔ sɔ Lazaro ɔwe. Aɣɛi ɔkã ɔ̃ iso ɔɖuɖu fiɛ masɛ masu wũ maasɛ i ranase gɔmɔ kayogodɔ̃. 21 Ɔsɛ ɔnyɔ ɔri sɔ si ranase gɔmɔ to ɔɖe ara ne, kupupui gɔ nsɛ kukpakpase i mmɔ aaɣo wũ ɔɖe. Ta makpɛkpɛ sɛ maba maaɣaɣa ɔ̃ aɣɛi ame.

22 “Wɛrɛba gɔgbe ɔba ɔ̃akpi, ne Ɣaa makpabo ɔba maasore wũ makɛlɛgu Abraham kɔrɛ i kato ne. Ranase gɔmɔ ana ɔba ɔ̃akpi ne mabiara wũ ne. 23 I makpise aɖe ne, ranase ɔwe i inyɛwe ame. Ne gɔ ɔkɔlɛ anɔ kato ne, ɔnya Abraham i kato gɔ Lazaro si wũ i kɔrɛ. 24 Mmɔ ɔto ɔkpere sɔ, ‘Tete Abraham! Nyɔ me nnya si atã Lazaro si ɔsu ɔ̃ irɔi ɔpia i ndu ame ɔba ɔ̃asora ɔɣora me i ɔnyagɛmi iso si ibara me pɔkɔsɔɔ alasɔ nto lona ibo i ɔtɔ gɔgbe ame!’

25 “Ɣɛɛ Abraham ɔɣere wũ sɔ, ‘Wũ ɔbi, nyigi sɔ i fɔ ngbã ame ne, afɔ fɔ ara sɛɛ ɔɖuɖu. Fiɛ Lazaro ɔ̃ wũ ne, ara nyanyarĩa kerekere ɔfɔ. Ɣɛɛ kiniɔ ne, ka ɔto ɔna isoɣɔ fiɛ fɔ wũ ato awe inyɛ. 26 Ne kama ana ne, kuwɛ titiiti kuwɛ̃ pia i bo gu-ɔ inyɔ ndɛ̃. Si ɔturi ɔbie sɔ ɔ̃awara ɔba mmɔ ne, ɔ̃ibawo. Ngbɔ ame i kuwɛ̃ iibawo mi kɔrɛ mmɔ ana ɔbɔrɛ ɔba ngbe ne.’

27 “Mmɔ i ranase gɔmɔ to ɔɣere wũ sɔ, ‘Tete Abraham, loto-ɔ i kukpa sɔ pia Lazaro si ɔsɛ wũ ɔse iyo. 28 Loba manyiibi rɛrɛ̃ iru ma mpia ngbã. Tã ɔsɛ ɔ̃aka ma teteree sɔ madaaba ngbe ne inyɛwe ɔɣede.’

29 “Ne Abraham to ɔɣere wũ sɔ, ‘Fɔ manyiibi ba ara wa i Mose gu Ɣaa kanyamaɖidze ɔtsɛrɛ masɛ. Ikote sɔ maakã ara wamɔ atsue mabara i wã iso!’

30 “Mmɔ i ranase to ɔɣɛ sɔ, ‘Tete Abraham, maibakã itɔ̃me nɛmɔ atsue. Ɣɛɛ si ɔturi ɔbɔrɛ i makpise ame ɔsɛ ɔ̃aɣere ma ne, mato maakã wũ atsue mafiniki i ma akpi ibara ame.’

31 “Ɣɛɛ Abraham ɔɣere wũ sɔ, ‘Si maibakã Mose gu Ɣaa kanyamaɖidze itɔ̃me atsue ne, si ɔturi ɔta ɔbɔrɛ i makpise ame ngbe ɔkɛlɛ ma kɔrɛ kɔra ne, maibakã wũ atsue!’ ”