IOANE ḠENA TORETORE GINIGUINENA
1 Ioane vaḡa-foforina guruḡari
Ioane na mai fefa giniguinena maiḡa tu dia ekalesia ta ḡena o ekalesia doḡorona ta ḡena etoreato. Asiḡi. Mai tu irau bese ekalesia doḡorori tari, ema Keriso ḡevaḡa-moḡoniato-ḡoi gabu mabarari ai ḡetanuni tarimari ḡeri. Ioane ḡena Vari Namona, e Ioane ḡena fefa toitoi, ema Apokalupo tu ḡia na etorerito. Ioane na mai fefa tu laḡani 85 ma 100 fakari nuḡanai ta etoreato, mo tu Iesu maki emaseto murinai vau.
Mai fefa nuḡanai siri baregori tu karoa 4:16; 5:13.
Ioane na mai fefa etoreato korana tu eurato, 1) ekalesia bene vaḡa-ribari, Barau ḡenana eiaḡomani ribana moḡonina eḡabiani tarimana tu Barau sevisevinai vanaḡivanaḡi etanuni; 2) tarikaka bene vaḡa-naḡiri, ḡia tata ḡeri veḡata Barau ḡesi, e tarikaka tari ḡesi, e tanobara tarimari ema dagarari ḡesi, ema vei-rakava tarimari ḡesi beḡene ḡita-ginikauri. Asi beḡene vekako mata-bubu; 3) Keriso ḡevetari-viniani tarimari ḡeri ḡofaḡofa veiḡari bene kiraḡi-foforiri.
Ioane na mai fefa tu maiḡesina eboioḡaiato:
1. Barau tu lamefa mamana kavana emamani - karoa 1-2
2. Barau tu veuravini - karoa 3-4
3. Barau tu maḡuri - karoa 5
1
Maḡuri guruḡana
1 Tovotovona na veḡata etanuto dagarana, ḡaseḡaḡiato, matama na ḡaḡitaiato, ḡenai ḡaboḡekauto, ema ḡiamama na ḡaḡabi-karaiato: Mai tu Maḡuri Guruḡana ḡavari-fiuani. 2 Mo maḡuri efoforito, benamo ḡai na ḡaḡitaiato. Moḡa lorinai ḡemi ḡavari-fiuani ema maḡuri vanaḡivanaḡi ḡakira-varamini. Mo maḡuri tu Tamara ḡesi etanuto-ḡoi ema ḡai ḡemai ema foforito. 3 Ḡai na ḡaḡitaiato ema ḡaseḡaḡiato maḡurina ḡomi ḡemi ḡakiraḡi-foforiani, be ḡomi maki ḡai ḡesi bitana sebona uranai, korana ḡai tu Tamara ema ḡia Natuna Iesu Keriso ḡesi doḡoro sebona. 4 Mai guruḡa ḡatore-vinimini, korana ḡita nuḡara iaku na beḡene vonuvonu-raḡe ḡana.
Barau tu mama
5 Iesu ḡenana ḡaseḡaḡiato varina ḡemi ḡavari-fiuani tu maiḡa: Barau tu mama, mukuna kotuna ta maki ḡia ḡenai asi etanuni. 6 Bema ḡita mukuna maḡurinai roḡo tarakani nuḡanai bita kirani, ḡita tu Barau ḡesi tadoḡoro-sebonani, ḡita tu taḡofaḡofani ema guruḡa moḡonina asi takorana-iaḡiani. 7 Senaḡi bema mama nuḡanai bita rakani Barau kavana, ḡita tata tu doḡoro sebona tarimara, ema ḡia Natuna Iesu rarana na ḡita ḡera rakava mabarari beḡuriḡi-vaḡirini.
8 Bema ḡita bita kirani, ḡita tu asi ḡera vei-rakava, ḡita tu tauḡera taveḡofani, ema ḡita ḡerai guruḡa moḡonina tu asiḡina. 9 A bema ḡita ḡera vei-rakava bita kiraḡi-foforirini nai, ḡia tu ma ḡena vetuḡamaḡikau, ḡera veiḡa rakavari mabarari betuḡamaḡi-fitoḡarini, ema ḡera veiḡa ḡeḡevaḡeḡevari beḡuriḡi-vaḡirini. 10 Bema ḡita bita kirani, nega sebona maki asi tavei-rakavato, Barau tu ḡofaḡofa baraunai bita vaḡa-iaḡoani, ema ḡia ḡena guruḡa tu ḡita nuḡarai asi etanuni.