1 Sa ome tonali opolivia para ilvitl de Pascua iva ilvitl de pan tlen amo kipia xokotixtli. In tlayakankeh tiopixkeh ivan tlamachtijkeh de itlanavatil Moisés okitemovayah kenik velis kikitzkiskeh in Jesús ika tlakajkayavalistli iva ijkó kixpoloskeh. 2 Okijtovayah:

—Amo tikitzkiskeh itech ilvitl, para amo mopajsoloskeh in gentejtih.

3 Jesús okatka Betania kan ikalijtik in Simón tlen achto opalania inakayo. Jesús oyetoka kan mesa, iva ijkuakó ovala se sivatl kivalika se boteyajtzi de alabastro tentok de ajviakayotl tlen kixkavia nardo tlen sa tlawel patío. Okitlapanki in boteyajtzi iva okiteekili in ajviakayotl ipan itzonteko in Jesús. 4 Sekimeh tlen ompa okatkah okualankeh iva okimolvijkeh entre yejvah:

—¿Tleka san okavilti in ajviakayotl? 5 Oveliskia omonemakaskia patío kemi tlen kitlani se tlakatl tlen tlapalevia de se xivitl, iva in tomi se okinmakaskia tlen prowestih.

Iva okajvakeh chikavak in sivatl. 6 Pero Jesús okinmilvi:

—Xikavakah, amitla xikilvikah. Ye okichi se kuali tlamantli para Ne. 7 In prowestih nochipa inkinpiaskeh iva velis inkinpaleviskeh san keman inkinekiskeh, pero Ne mach ok wejkavas nika nietos imovah. 8 Nin sivatl okichi tlen ovelik: yonechteekili ajviakayotl itech nokuerpo, kijtosneki yokiyektlali para ijkuak nechtookaskeh. 9 Yi neli nimechilvia, ke sentetl itech nin tlaltikpaktli kan motematiltis in yankuik kuali tlajtoli, noijki mijtos tlen okichi nin sivatl iva ijkó kilnamikiskeh.

10 Judas Iscariote, se de tlen majtlaktli ivan ome momachtijkeh, oyá okinmitato in tlayakankeh tiopixkeh para kinmaktilis in Jesús. 11 Ijkuak yejvah okikakkeh, opakeh iva okilvijkeh kimakaskeh tomi. Iva Judas ope kitemova keman velis kinmaktilis.

12 In primer tonali de ilvitl de pan tlen amo kipia xokotixtli, ijkuak noijki okimiktiayah in ichkakonetl de Pascua, in momachtijkeh okitlajtlanijkeh in Jesús:

—¿Kan tikneki ma tikchivatih para tejwatzi in tlakuali de Pascua?

13 Okintitlanki ome momachtijkeh, iva okinmilvi:

—Xiviah kan siudad, ompa inkinamikiskeh se tlakatl tlen kivika se komitl de atl. Xiktokakah, 14 iva kan ye kalakiti, ompa xiktlajtlaniikah in chane: “In Tlamachti kijtova: ¿Katli yen kuarto kan nikmomajsevis in tlakuali de Pascua Ne ivan tlen nikinmachtia?” 15 Ye imechititis se wei kuarto tlen kajki tlakpak kan yi tlayektlalitok. Ompa xikchivakah in tlakuali de Pascua para tejvah.

16 In momachtijkeh okiskeh iva oyajkeh kan siudad. Okajsitoh nochi kemi Jesús okinmilvi iva okichijkeh in tlakuali de Pascua.

17 Ijkuak otlayovak, Jesús oajsito kan yejón kuarto invan majtlaktli ivan ome momachtijkeh. 18 Ijkuak otlakuajtokah kan mesa, Jesús okinmilvi:

—Yi neli nimechilvia, ke se de imejvah tlen nika nova tlakuajtok, nechtemaktis.

19 Yejvah ope moyolkokovah, iva ope kitlajtlaniah se por se:

—¿Kox ne?

20 Jesús okinmilvi:

—Se de imejvah inmajtlaktih iva inmomeh, tlen kapachova ipan ijtik in plato kan Ne noijki nikapachova. 21 Porke iKone in Tlakatl yas itech mikilistli, ijkó kemi kijtova in Tiotlajkuiloli nik ijkó kipanos. Pero ¡ay de neká tlakatl tlen kitemaktis! Okachi kuali amo onesiskia.

22 Ijkuak otlakuajtokah, Jesús okontilanki in pan iva okitlasojkamatki inavak Dios, okipojpostekki in pan, okinmajmakak iva okinmilvi:

—Xikuakah, nin yen nokuerpo.

23 Satepa okontilanki se kopa de vino, okitlasojkamatki inavak Dios, okinpanoltili, iva nochtin okonikeh. 24 Iva okinmilvi:

—Nin yen noesso, tlen Dios ika kichiva se yankuik moyekkavalistli inmovah, iva nokivis para miekeh. 25 Yi neli nimechilvia, ke ayakmo nikonis vino, asta neká tonali ijkuak nikonis yankuik vino kan Dios tlanavatia.

26 Satepa de okintlakuikakeh sekimeh himnos, oyajkeh kan tepetl tlen itoka Olivos. 27 Ijkuakó Jesús okinmilvi:

—Nochtin imejvah innechkavaskeh noselti, porke itech Tiotlajkuiloli ijkuilitok: “Nikmiktis in tlajpixki iva in ichkameh xixiniskeh.” 28 Pero satepa de ijkuak nimoyolitis, nitlayakanas nias para Galilea iva ompa innechajsitivih.

29 Ijkuakó Pedro okilvi:

—Maski nochtin ma mitzkavakah, ne amo nimitzkavas.

30 Jesús okilvi:

—Yi neli nimitzilvia, axka nin yovak antes de tzajtzis in kaxtil ome welta, te ijkuakó yotikijto eyi welta nik amo tinechixmati.

31 Pedro okachi omochijchika:

—Maski mova ma nechmiktikah, ne amo keman nikijtos ke amo nimitzixmati.

Iva nochtin no ijkó okijtojkeh.

32 Satepa oyajkeh se lugar tlen itoka Getsemaní, iva Jesús okinmilvi in momachtijkeh:

—Nika ximotlalikah mientras Ne niav nimodiostzajtziliti.

33 Okinvikak in Pedro, Jacobo ivan Juan, iva ope motekipachova iva moyolkokova sa tlawel. 34 Okinmilvi:

—Nikmachilia niixpolivisneki de neyolkokoli. Nika ximokavakah iva xiijsatokah.

35 Oyá achitzi ik tlayakapa, ompa omotlankuaketzki iva omixtlapacho ipan tlali iva omodiostzajtzili, tla oveliskia, amo ma kipano in tlajyovilistli tekoko itech yejón ora. 36 Okijto:

—Abba, noTajtzi, tejwatzi nochi veli tikchiva. Techkixtili nin tlajyovilistli tekoko, pero amo ma mochiva kemin Ne nikneki, sino kemi tejwatzi tikmonekiltis.

37 Satepa omokuapki kan okatkah in momachtijkeh iva okinmajsito kochtokeh, iva okilvi in Pedro:

—Simón, ¿tikochi? ¿Amo otikxiko tiijsatok nion se ora? 38 Xiijsatokah iva ximodiostzajtzilijtokah, para amo xivetzikah ijkuak imechyoltilanas in tlajtlakoli. Imotonal kineki kichivas tlen kuali, pero imokuerpo amo tlaxikova.

39 Jesús oyá oksemi omodiostzajtzilito iva oksemi okijto tlen achto yokijtojka. 40 Ijkuak omokuapato, oksemi okinmajsito kochtokeh, porke inmixtololovah omotzakuayah porke melajka okochisnekiah. Iva amo okimatiah tlán kinankiliskeh. 41 Ijkuak omokuapato ipan yi eyi welta, okinmilvi:

—¿Ok inmoseviah iva inkochih? ¡Xiijsakah! Yoajsik ora, iKone in Tlakatl kitemaktiskeh inmak tlen tlajtlakolejkeh. 42 ¡Ximevakah, ma tiviah! Xikittakah, yompa vitz tlen nechtemaktis.

43 Jesús ok otlapojtoka iva ijkuakó ovala in Judas, se de tlen majtlaktli ivan ome momachtijkeh. Judas okinvalikaya miekeh gentejtih okivalikayah inmespada iva kuavitl. Nonmeh gentejtih okintitlankeh in tlayakankeh tiopixkeh, in tlamachtijkeh de itlanavatil Moisés ivan tlayakankeh tetajmeh. 44 Iva Judas tlen okitemakti, yokinmilvijka in gentejtih kenik kinmititis katli yen Jesús. Okinmilvi:

—Tlen ne nikixpipitzos yen yejón Jesús, xikitzkikah iva xikvikakah kuali ma ijilpitiv.

45 Iva ijkuak ovala in Judas, omotoki inavak Jesús iva okilvi:

—¡Tlamachti!

Iva okixpipitzo. 46 Ijkuakó okitzkijkeh iva okivikakeh. 47 Pero se de tlen ompa okatkah, okikixti iespada iva okinakastzonteki itlakeval in wei tiopixki. 48 Iva Jesús okinmilvi:

—¿Onvalajkeh onnechkitzkikoh ika espada iva ika kuavitl kemi oyeskia niichteki? 49 Nochipa onikatka inmovah kan templo onitlamachtijtoka iva amo kema onnechkitzkijkeh. Pero nin ijkó panolo para ma mochiva tlen kijtova in Tiotlajkuiloli.

50 Nochtin momachtijkeh ocholojkeh iva okikajtejkeh iselti in Jesús.

51 Se telpochtli okitokaya, otlakentiaya san ika se sábana. Okitzkijkeh, 52 pero ye omoxolkopinki okitlamotlatevak in sábana, iva ocholo sa xipetztik.

53 Okivikakeh in Jesús kan wei tiopixki. Ompa omololojkeh in tlayakankeh tiopixkeh, in tlayakankeh tetajmeh ivan tlamachtijkeh de itlanavatil Moisés. 54 Pedro okitokaya in Jesús san wejka, okalakki kan kiavak de kan ikalijtik in wei tiopixki iva ompa omotlali omoskojtoka kan tlikuili invan templojmayoltih.

55 In tlayakankeh tiopixkeh iva nochtin tlen povih itech injunta in judiojtih, okitemovayah itla tlen ika velis kitlajtlakoltiskeh in Jesús para ijkó velis kixpoloskeh, pero amitla okajxiliayah. 56 Miekeh okiteilviayah ika miek istlakayotl, pero amo san se tlajtoli tlen okijtovayah. 57 Sekimeh omoketzkeh iva oistlakatikeh, okijtojkeh:

58 —Tejvah otikakkeh okijto: “Nikxitinis nin templo tlen tlachivali ika inmah in tlakah, iva san ika eyi tonali niketzaltis oksé, tlen amo tlachivali ika inmah in tlakah.”

59 Pero maski ijkó okiteilviayah, amo san se tlajtoli tlen okijtovayah. 60 Ijkuakó omoketzki tlatlajko in wei tiopixki iva okitlajtlani in Jesús:

—¿Amo titlanankilis? ¿Tlán kijtosneki nin tlen ik mitzteilviah?

61 Jesús san omoka iva amo otlanankili. In wei tiopixki oksemi okitlajtlani:

—¿Yen te tiCristo, iKone in Dios tlen tikweijkachivah?

62 Jesús okilvi:

—Kema, Ne. Iva imejvah inkittaskeh iKone in Tlakatl yetos ik iyekmapa in Dios tlen kipia nochi velitilistli, iva inkittaskeh vitz de ilvikak itech mixtli.

63 In wei tiopixki omotlakentzomoni porke okualanki, iva okijto:

—Mach ok monekih testigojtih. 64 Imejvah yonkikakeh kenik kixpanavia in Dios ika itlajtol. ¿Tlán inkijtovah?

Nochtin okijtojkeh nik tlajtlakole iva moneki ma miki. 65 Sekimeh ope kichijchah, okixilpijkeh iva okimagayah ika maitl, iva okilviayah:

—¡Xikyejyekoli akin omitzmagak!

Iva in templojmayoltih noijki okixtlajtlatziniayah.

66 Pedro okatka tlatzintla kan kiavak, iva ik ompa ovala se sivatl itlakeval in wei tiopixki. 67 Ijkuak okittak in Pedro moskojtok, okitlajtlatak iva okilvi:

—Te noijki otinemia ivan Jesús de Nazaret.

68 Pedro amo okimokuiti iva okijto:

—Mach nikixmati iva nion amo nikmati tlán tikijtova.

Iva okiski kaltempa de kan kiavak. Iva ijkuakó otzajtzik in kaxtil. 69 In sivatl tlen itlakeval in wei tiopixki, oksemi okittak in Pedro, iva ope kinmilvia tlen ompa okatkah:

—Nin tlakatl se de yejvah.

70 Pedro oksemi amo okimokuiti. Ok achitzi satepa, tlen ompa okatkah oksemi okilvijkeh in Pedro:

—Yi neli, te se de yejvah, porke te noijki de Galilea iva titlapova kemi yejvah.

71 Ijkuakó Pedro ope kijtova ipan ma vetzi tlajyovilistli tla amo neli tlen kijtova iva okisentlali itlajtol, okijto:

—Ne mach nikixmati yejón tlakatl de tlen imejvah inkijtovah.

72 San niman ijkuakó in kaxtil ovaltzajtzik ya ipan ome welta. Iva ijkuakó Pedro okilnamiki tlen okilvijka in Jesús: “Antes de tzajtzis in kaxtil ome welta, te ijkuakó yotikijto eyi welta nik amo techixmati.” Iva ope choka.