1 ती पेला लोमातिवा येशूकी चाला वानी, “देवाच्‍येनकी ग्‍येल्‍खापला तेरी सिनाङ छ्‍ये ति सु यिनाङ?” सिनी टिसुङ। 2 तमा खोकी ते वोतुप आङा टिक्‍पे यीला खोरो चाला कताङ्‍नी तिवी पर्ला ज्‍याक्‍नी 3 तिवाला दुक सुङ्‍सुङ, “ङ ख्‍यिराङला टेङ्‍बो सिरिन, ख्‍यिराङ सेम ग्‍युर्नी आङा टिक्‍पेतिवा दोके माच्‍युङ्‍सुङ सिसिन देवाच्‍येनकी ग्‍येल्‍खापला नाम्‍साङ शुक मुथुपी। 4 तुक क्‍यानी चुका मी तीकी दी आङा टिक्‍पे दोके खुरुङला मो बेप्‍किवे, ती ति देवाच्‍येनकी ग्‍येल्‍खापला तेरी सिनाङ छ्‍ये यिन। 5 चुका मी तीकी ङे मिङला दुका आङा टिक्‍पे च्‍यिकला गासो शिवे, तीकी ङला राङ गासो शुवु यिन।”

6 “यिने चुका मी तीकी ङला तेपा कितुप दी छ्‍युङातिवी पर्ला मिरा च्‍यिकला दिक्‍पा कि ज्‍यिकिवे, तीकी ज्‍यिङ्‍बी लोला लाकुर ग्‍येर्पु रानी ग्‍येम्‍छो तिङ्‍मुला क्‍युरुप ति तीकी थोक्‍ला बोरु मङ ल्‍यामु यिन। 7 मीतिवाला दिक्‍पा कि ज्‍यितुप ताम्‍ङे वोतुप तप्‍की दी जम्‍बुलिङला मोताप सुकिवी। तुका दिक्‍पा कि ज्‍यितुप ताम्‍ङे याङ नरी च्‍युङ्‍गिवी, यिन्‍सिनाङ मीतिवाला दिक्‍पा कि ज्‍यितुप तीला ति कोन्‍छ्‍योककी पर्च्या ख्‍येल्‍गिवी। 8 दोजो ख्‍योरो काङ्‍बी याङ्‍ना लाक्‍पी ख्‍युरुङला दिक्‍पा कि ज्‍यिकिवी सिसिन तीला च्‍येनी क्‍युर। काङ्‍बा लाक्‍पा ङ्‍यिकर वोनी नरी बरुप ङ्‍येलाकी मे नाङ्‍ला ख्‍येलुप सिनाङ बोरु काङ्‍बा लाक्‍पा मेनी नाम्‍साङ मिशिवु मिजी थोपुप ति ख्‍योरो थोक्‍ला ल्‍यामु यिन। 9 तुक राङ क्‍यानी ख्‍योरो मिककी ख्‍युरुङला दिक्‍पा कि ज्‍यिकिवी सिसिन ती मिक ति थेन्‍नी क्‍युर। मिक ङ्‍यी वोनी मे बरुप ङ्‍येलाला ख्‍येलुप सिनाङ बोरु मिक च्‍यिक राङ वोनी नाम्‍साङ मिशिवु मिजी थोपुप ति ख्‍योरो थोक्‍ला ल्‍यामु यिन।”

10 “ख्‍यिरा दी छ्‍युङातिवी पर्ला च्‍यिकला साङ ङ्‍यप्‍च्‍ये माकिता। ङ ख्‍यिराङला सिरिन, तिवाला ल्‍हाटे कितुप देवाच्‍येनकी लेन क्‍योलुप थुतिवा देवाच्‍येनला ज्‍युनी वोतुप ङे पपी चिप्‍ला देनी खोकी शालला नरी ल्‍हेवी। 11 (ङ मी पुज्‍युङ ति तोरुपतिवाला र्‍होकुपला वावु यिन।)* १८:११ ती पदकी ताम्‍ङे ति ललइ ग्रीक बाइबलला मे। 12 ख्‍यिरा नासामला चुकै वे? दोजो मी ललाइकी ति लुक सयी च्‍यिक वे, ती नाङ्‍ला च्‍यिक ति पेनी गाल्‍सुङ सिसिन ती मी तीकी लुक खल गु ताङ गु तीला रीला राङ क्‍युर ज्‍याक्‍नी काङ ती पेनी गलुप लुक च्‍यिक ति छोल मोडोवी रो? 13 वुतुङ के ङ ख्‍यिराङला सिरिन, तीकी ती तोरुप लुक च्‍यिक ति ङ्‍येसुङ सिसिन मातोरुप लुक खल गु ताङ गु ति सिनाङ ती च्‍यिककी थोक्‍ला मङ गा किवी। 14 तुक राङ क्‍यानी दी छ्‍युङातिवी पर्ला मिरा च्‍यिक साङ ङ्‍येलाला मोडोशी सिरुप ति देवाच्‍येनला ज्‍यु वोतुप ख्‍यिरा पपा कोन्‍छ्‍योककी नोवा वे।”

15 “दोजो तेपा कितुप अच्‍युनुपतिवी पर्ला ललाइकी ख्‍योरो तेन्‍दोकला लाका मेलोवा क्‍यासिन तीला गल्‍नी ख्‍यिराङ ङ्‍यी तिराङ देनी तीकी क्‍यावु मेलोवाकी कोर्ला तीला सी। तीकी ख्‍योरो ताम्‍ङे ङ्‍येन्‍सिन ती ति येलुङ तेपा कितुप ख्‍योरो अच्‍युनुप च्‍युङ्‍गिवी। 16 यिने तीकी ख्‍योरो ताम्‍ङे माङ्‍येन्‍सिन मी यम्‍बा मिरा च्‍यिक चो ङ्‍यी चो टिनी तीकी ते ग्‍युक। तुक क्‍यानी कोन्‍छ्‍योककी सुङला टिवु दोके तीकी सिक्‍यावु तेरी ताम्‍ङे ति मिरा ङ्‍यी सुमकी पङ्‍बु नेमा तेन्‍तेन च्‍युङ्‍गिवी। 17 यिने तीकी तिवी ताम्‍ङे साङ माङ्‍येन्‍सिन ती ताम्‍ङे ति चर्चला सी। चर्चकी ताम्‍ङे साङ तीकी माङ्‍येन्‍सिन तीला कोन्‍छ्‍योकला ङा माशेवु मिरिक यम्‍बाकी मी याङ्‍ना से दुतुप मी दोके नासाम तोङ।

18 वुतुङ के ङ ख्‍यिराङला सिरिन, ख्‍यिरा जम्‍बुलिङला काङ कि ज्‍यिकिवे, देवाच्‍येनला साङ कि ज्‍यिकिवी। ख्‍यिरा जम्‍बुलिङला काङ कि मिज्‍यिवे, देवाच्‍येनला साङ कि मिज्‍यिवी। 19 येलुङ ङ ख्‍यिराङला सिरिन, जम्‍बुलिङला ख्‍यिराङ मिरा ङ्‍यी सेम थिन्‍नी काङ लाङ्‍सिनाङ देवाच्‍येनला ज्‍यु वोतुप ङे पपी ख्‍यिरा थोक्‍ला च्‍युङ ज्‍यिकिवी। 20 कनी ख्‍यिराङ मिरा ङ्‍यी सुम ङे मिङला जोम्‍गिवे, ते ङ ख्‍यिरा पर्ला वुङ्‍यिनो।”

21 तमा पत्रुस ति येशूकी चाला वानी, “चोवो, तेपा कितुप अच्‍युनुपकी ङे थोक्‍ला लाका मेलोवा क्‍यासिन तीला थेङ्‍मा चो सेक माफ तेर गोकिवी? थेङ्‍मा दिन सेक तेर गोकिवी?” सिनी सिक्‍यासुङ। 22 तमा येशूकी तीला सुङ्‍सुङ, “ङ ख्‍युरुङला सिरिन, थेङ्‍मा दिन सेक तिराङ मिन, यिने थेङ्‍मा दिनकी दोम्‍बा खल दिन सेक साङ तेर गोकिवी।

23 तुक क्‍यानी देवाच्‍येनकी ग्‍येल्‍खाप ति खोरो लावातिवाला ची लङ्‍गुप ग्‍येल्‍वु मिरा च्‍यिक दोके यिन। 24 ती ग्‍येल्‍वुकी ची कितुप पेला ती नेसुर सेरकी डप्‍बु तोङ्‍डा च्‍यिथम्‍बा छ्‍यावा लावु लावा मिरा च्‍यिकला खोरो चाला टिनी वुङ च्‍यिसुङ।† १८:२४ सेरकी डप्‍बु च्‍यिक ति लावा मिरा च्‍यिककी लो च्‍येङा लाका क्‍यावु ल यिन। 25 यिने ती लावा तीकी छ्‍यावा ते माथुप्‍सिमा ग्‍येल्‍वु तीकी लावा तीला ‘ख्‍युरुङ ख्‍योरो पेजापेर्मी ताङ ख्‍योरो मुला वोतुप तेरी चोनी छ्‍यावा ची की।’ सिनी क बिन्‍सुङ। 26 तमा ती लावा तीकी पुमुङ सला चुनी, ‘ओ ग्‍येल्‍वु, चेयी पर सेक गु, ङ ख्‍योरे छ्‍यावा तेरी तेतिन।’ सिनी गोङ्‍बा शुसुङ। 27 तमा ग्‍येल्‍वु तीकी तीला ङ्‍यिङ्‍ज्‍ये लानी लङ गोवु छ्‍यावा ति क्‍युर्नी बिन्‍सुङ।

28 यिने ती लावा ति ग्‍येल्‍वी चा नेमा थेन गल्‍नी खोरो नेसुर ङुलकी डप्‍बु‡ १८:२८ ङुलकी डप्‍बु च्‍यिक ति लावा मिरा च्‍यिककी ङ्‍यिमी ल यिन। सयी छ्‍यावा लङ्‍गुप लावा दाल्‍जा यीला ठेसुङ, तमा तीकी ती दाल्‍जाकी ज्‍यिङ्‍बाला जिम्‍नी ‘ङे नेसुर लावु छ्‍यावा खुर शोक।’ सिनी सिक्‍यासुङ। 29 तमा ती लावा दाल्‍जा ति खवुतुङ्‍मा देनी ‘ठाकुरे चेयी पर सेक गु, ङ ख्‍योरे छ्‍यावा तेतिन।’ सिनी गोङ्‍बा शुसुङ। 30 यिने तीकी ताम्‍ङे माङ्‍येन्‍नी छ्‍यावा मातेवा सेक्‍ला खोरो लावा दाल्‍जा तीला चोन्‍खाङला उप्‍नी ज्‍याक्‍सुङ। 31 ती थोङ्‍सिमा तीकी लावा दाल्‍जा यम्‍बातिवी सेम नासुङ, तमा तिवा गल्‍नी ते च्‍युङ्‍गुप ताम्‍ङे ति ग्‍येल्‍वुला लाप्‍सुङ।

32 तमा ग्‍येल्‍वु तीकी छ्‍यावा क्‍युर्नी बिन्‍दुप लावा तीला कताङ्‍नी ‘ख्‍यो लावा दुक्‍टा! ख्‍योरो ङला गोङ्‍बा शोप पेला ङे ख्‍योरो छ्‍यावा ति क्‍युर्नी बिनिन। 33 ङे ख्‍युरुङला च्‍यम्‍बा क्‍यावु दोके ख्‍योरो दाल्‍जाला च्‍यम्‍बा कि मोगोवी रो?’ सिनी सिक्‍यासुङ। 34 तमा ती ग्‍येल्‍वु ति कशेन ङ्‍यिर्मु लानी तीकी तेरी छ्‍यावा मातेवा सेक्‍ला तीला चोन्‍खाङला उप्‍नी ज्‍योक च्‍यिसुङ। 35 तुक क्‍यानी ख्‍यिरा रङगी अच्‍युनुपतिवाला सेमगी दिङ नेज्‍युनी माफ माबिन्‍सिन देवाच्‍येनला ज्‍यु वोतुप ङे पपी साङ ती ग्‍येल्‍वी दोके ख्‍यिराङला माफ मनङ्‍गिवी।”