1 ङ किंक्रियाला वोतुप चर्चला कोन्‍छ्‍योककी थोक्‍ला शब्‍ज्‍यी बुलुप दाक्‍पी नुम फिबी ताङ मुला ख्‍यिराङला ङोशी डेशी कितिन। 2 खोकी मी बङीला दाल्‍जा किटे क्‍या वे। तमा ङला साङ दाल्‍जा किटे क्‍यासुङ। ती तप्‍की खो वुङ्‍गुप पेला ख्‍यिरा खोला कोन्‍छ्‍योककी पुम दोके नासाम ताङ्‍नी गासो शुसा। खोला काङ रे च्‍यिक रे गोसिन दाल्‍जा किटे किसा।

3 ख्रीष्‍ट येशूकी कोर्ला ङे मुला राङ शब्‍ज्‍यी कितुप ङे दाल्‍जा प्रिस्‍का ताङ अकिलासला साङ टसी देलेक वोतो। 4 च्‍यिलासिसिन तिवी ङे थोक्‍ला खोप्‍राङ मिजी साङ बिन वे। ङ तिराङ मिन, यिने यहूदी मिन्‍दुप मिरिक यम्‍बाकी चर्चकी मीतिवा तेरीकी साङ तिवाला थुचिछे सिरिन। 5 तिवी खाङ्‍बाला जोम्‍बुप चर्चकी तेपा कितुपतिवा तेरीला ङे टसी देलेक वोतो सिनी सिसा। ङे ङ्‍यिङ्‍ज्‍येवु दाल्‍जा इपेनितसला साङ टसी देलेक वोतो सिनी सिसा। ती ति एशिया लुङ्‍बाला तेरी सिनाङ गोमाला येशू ख्रीष्‍टला तेपा कितुप मी यिन। 6 मरियमला साङ टसी देलेक वोतो सिनी सिसा। तीकी साङ ख्‍यिरा थोक्‍ला टेमु क्‍यासुङो। 7 ङे मुला चोन्‍खाङला शोरुप ङे नाङ्‍बा एन्‍ड्रोनिकस ताङ युनियसला साङ टसी देलेक वोतो सिनी सिसा। च्‍यिलासिसिन तिवा लोमा छ्‍येतिवी पर्ला मिङ थोपुप ताङ ङ सिनाङ गोमाला येशूला तेपा कितुप मीतिवा यिनो। 8 चोवो येशूकी थोक्‍ला शब्‍ज्‍यी कितुप ङे ङ्‍यिङ्‍ज्‍येवु दाल्‍जा एम्‍प्‍लीआतसला साङ टसी देलेक वोतो सिनी सिसा। 9 तमा ख्रीष्‍ट येशूकी कोर्ला ङे मुला राङ शब्‍ज्‍यी कितुप उर्बानस ताङ ङे ङ्‍यिङ्‍ज्‍येवु दाल्‍जा स्‍ताखुसला साङ टसी देलेक वोतो सिनी सिसा। 10 तमा येशू ख्रीष्‍टला तेपा रम्‍बु वोतुप पङ्‍बु तेरुप मी अपेल्‍लेस ताङ अरिस्‍तोबुलसकी खाङ्‍बी मिछाङतिवाला साङ टसी देलेक वोतो सिनी सिसा। 11 तमा ङे छेङ्‍गा हेरोदियनला साङ टसी देलेक वोतो सिनी सिसा। तमा येशूला तेपा कितुप नर्किससकी खाङ्‍बी मीतिवाला साङ टसी देलेक वोतो सिनी सिसा। 12 चोवो येशूकी थोक्‍ला छासे टेमु कितुप नुम तुर्फेना ताङ त्रोफोसाला साङ टसी देलेक वोतो सिनी सिसा। तमा नुम परसीसला साङ टसी देलेक वोतो सिनी सिसा। तीकी साङ चोवो येशूकी थोक्‍ला छासे टेमु क्‍यासुङो। 13 चोवो येशूकी खोरे थोक्‍ला शब्‍ज्‍यी कितुपला पेतुप रूफस ताङ तीकी आमाला साङ टसी देलेक वोतो सिनी सिसा। च्‍यिलासिसिन खोकी आमा साङ ङे आमा दोके राङ यिनो। 14 तमा असिंक्रितस ताङ फलेगन ताङ हर्मेस ताङ पत्रोबास ताङ हर्मास ताङ तिवी मुला वोतुप यम्‍बा तेपा कितुप अच्‍युनुपतिवाला साङ टसी देलेक वोतो सिनी सिसा। 15 फिलोलोगस ताङ युलिया ताङ नेरियस ताङ तीकी नुम ताङ ओलिम्‍पास ताङ तिवी मुला वोतुप तेरी तेपा कितुप मीतिवाला साङ टसी देलेक वोतो सिनी सिसा। 16 ख्‍यिराङ च्‍यिककी च्‍यिकला येशू ख्रीष्‍टकी ङ्‍यिङ्‍ज्‍ये ताङ मुला टसी देलेक सिनी सिसा। ख्रीष्‍ट येशूला तेपा कितुप चर्चकी मीतिवा तेरीकी ख्‍यिराङला टसी देलेक सिनी ताङ वोते।

17 अच्‍युनुपतिवा, ङ ख्‍यिराङला ठाकुरे सिनी गोङ्‍बा शोयी। ख्‍यिराङला लापुप कोन्‍छ्‍योककी सुङगी तेन्‍दोकला लानी ख्‍यिरा पर्ला क्‍येन तेरुप ताङ क्‍येङ्‍सु जोप मीतिवाला ल्हो। तमा तिवा नेसुर क्‍येङ्‍सु दे। 18 च्‍यिलासिसिन तुका मीतिवी दाक्‍पी चोवो येशू ख्रीष्‍टकी थोक्‍ला शब्‍ज्‍यी कितुप मिन, यिने खोरो सुप सोपला तिराङ कोन्‍छ्‍योकला शब्‍ज्‍यी किवी। तिवा ताम्‍ङे ल्‍यामु ल्‍यामु क्‍यानी क्‍योक्‍पु लोक्‍पु मिकिवु मीतिवाला साङ जिनोक जेवी। 19 ख्‍यिराङ खला ङ्‍येमु वोतुप ति तेरी मीतिवाला छ्‍या वे। तुक क्‍यानी ख्‍यिरा थोक्‍ला ङ छासे सेम गा लानी वे। यिने ख्‍यिराङ चुका ति टेङ्‍बु नोके, तीला राङ च्‍यङ्‍बु वुङ गोकिवी। चुका ति दुक्‍टा नोके, ती नेसुर कुतुक दे गोकिवी। 20 तमा लोदिमु नङ्‍गुप कोन्‍छ्‍योककी ङमु राङ शैतानला ख्‍यिरा काङ्‍बी वोक्‍ला लेप ज्‍यिकिवी। दाक्‍पी चोवो येशू ख्रीष्‍टकी कटिन ति ख्‍यिरा मुला नरी लुशिता।

21 ङे मुला राङ कोन्‍छ्‍योकला शब्‍ज्‍यी बुलुप तिमोथी ताङ ङे छेङ्‍गा लुकियस ताङ यासोन ताङ सोसिपात्रोसकी साङ ख्‍यिराङला टसी देलेक सिनी ताङ वोतो। 22 दी यिकी टिकुप ङ तर्तियसकी छ्‍योक नेसुर साङ ख्रीष्‍टकी मिङला ख्‍यिराङला टसी देलेक वोतो। 23 गायसकी साङ ख्‍यिराङला टसी देलेक सिनी ताङ वोतो। खो ति ङ ताङ दे राङ वोतुप चर्चकी मीतिवा तेरीला ल्‍हटे कितुप मी यिन। ती ग्‍येसाकी टङ्‍गा चेक लङ्‍गुप मी इरास्‍तस ताङ नुप क्‍वार्टसकी साङ ख्‍यिराङला टसी देलेक ताङ्‍नी वोतो। 24 (दाक्‍पी चोवो येशू ख्रीष्‍टकी कटिन ति ख्‍यिरा मुला नरी वुङ्‍शी। आमिन।)* १६:२४ ललाइ थेपला ति दी २४ पदकी ति मे।

25 त याङ दाक्‍पु तेरीकी कोन्‍छ्‍योकला मोवा कितुप। खोकी राङ ख्‍यिराङला ङे ख्‍याप्‍टाक क्‍यावु येशू ख्रीष्‍टकी लेन ल्‍यामु नेसुर नरी तेपा रम्‍बु क्‍या दे ज्‍यिकिवी। ती लेन ल्‍यामु ति कल्‍वा कल्‍वा नेज्‍युनी छ्‍याकला ज्‍याङ वोतुप यिन। 26 यिने त याङ ती छ्‍याकला वोतुप लेन ल्‍यामु ति कोन्‍छ्‍योककी लुङ्‍तेम्‍बातिवी टिवु खोकी सुङला ल्‍यामो क्‍यानी ठछ्‍येली हाक्‍को थुपुप गल वे। तमा नरीकी नरी लुवु कोन्‍छ्‍योककी क नेसुर यहूदी मिन्‍दुप मिरिक यम्‍बाकी मीतिवा तेरीकी तेपा क्‍यानी खोकी सुङला ङ्‍येन्‍सुङ। 27 तुक क्‍यानी च्‍यिक राङ ज्‍यु वोतुप ताङ रिक्‍पाकी क्‍येङ्‍गुप दाक्‍पी कोन्‍छ्‍योकला येशू ख्रीष्‍ट नेसुर नरीकी नरी मोवा वुङ्‍शी। आमिन।